CSK vs LSG IPL 2023 : తిప్పేసిన అలీ చెన్నై విక్ట‌రీ

CSK vs LSG IPL 2023 : ఐపీఎల్ 16వ సీజ‌న్ లో రెండో లీగ్ మ్యాచ్ లో ధోనీ సార‌థ్యంలోని చెన్నై సూప‌ర్ కింగ్స్ ఎట్ట‌కేల‌కు బోణీ కొట్టింది. మిస్ట‌ర్ కూల్ మ‌రోసారి త‌న‌దైన మార్క్ చూపించాడు. టోర్నీ తొలి మ్యాచ్ లో డిఫెండింగ్ ఛాంపియ‌న్ గుజ‌రాత్ టైటాన్స్ చేతిలో ఓట‌మి పాలైంది. త‌న రెండో మ్యాచ్ లో షాన్ దార్ ప్ర‌ద‌ర్శ‌న‌తో ఆక‌ట్టుకుంది. ల‌క్నో సూప‌ర్ జెయింట్స్ జ‌ట్టును 12 ప‌రుగుల తేడాతో ఓడించింది.

ఇక మ్యాచ్ విష‌యానికి వ‌స్తే మొద‌ట చెన్నై సూప‌ర్ కింగ్స్ బ్యాటింగ్ చేసింది. రుతురాజ్ గైక్వాడ్ 57 ర‌న్స్ తో రాణిస్తే డెవాన్ కాన్వే 47 ర‌న్స్ తో దుమ్ము రేపాడు. త‌మకు అచ్చొచ్చిన చెన్నైలోని చెపాక్ స్టేడియంలో ధోనీసేన అద్భుత ప్ర‌ద‌ర్శ‌న‌తో ఆక‌ట్టుకుంది. నిర్ణీత 20 ఓవ‌ర్ల‌లో 217 ర‌న్స్ చేసింది. భారీ టార్గెట్ తో బ‌రిలోకి దిగిన ల‌క్నో సూప‌ర్ జెయింట్స్ (CSK vs LSG IPL 2023) ప్రారంభంలోనే ధాటిగా ఆడింది.

కైల్ మెయిర్స్ ఆకాశ‌మే హ‌ద్దుగా చెల‌రేగాడు. 22 బంతులు ఎదుర్కొన్న మేయ‌ర్స్ 8 ఫోర్లు 2 సిక్స‌ర్ల‌తో రెచ్చి పోయాడు. నికోల‌స్ పూరన్ 18 బంతులు ఆడి 2 ఫోర్లు మూడు సిక్స‌ర్ల‌తో 32 ర‌న్స్ చేసినా ఫ‌లితం లేక పోయింది.

ఆయుష్ బ‌దోనీ, కృష్ణ‌ప్ప గౌత‌మ్ ప‌రుగులు చేసేందుకు య‌త్నించినా వ‌ర్క‌వుట్ కాలేదు. చెన్నై బౌల‌ర్ మొయిన్ అలీ 26 ప‌రుగులు ఇచ్చి 4 వికెట్లు కూల్చాడు. చెన్నై గెలుపులో కీల‌క పాత్ర పోషించాడు.

Also Read : మ‌హేంద్ర సింగ్ ధోనీ అరుదైన రికార్డ్