బ్లింకిట్ భివండి గిడ్డంగి ఫుడ్ లైసెన్స్ ర‌ద్దు
ఎఫ్ఐఆర్ నమోదు చేసిన అధికారులు
ముంబై : గడువు ముగిసిన ఆహార నిల్వలను తిరిగి వ్యాపారులకు పంపిస్తున్నాయని అనుమానిస్తున్న గిడ్డంగులు, డార్క్ స్టోర్‌లు , పారవేసే నెట్‌వర్క్‌లను లక్ష్యంగా చేసుకుని మహారాష్ట్ర ఎఫ్డీఏ దాడులు చేప‌ట్టింది. విస్తృత చర్యలలో భాగంగా బ్లింకిట్ భివండి గిడ్డంగి లైసెన్స్‌ను నిలిపి వేసింది, ఎగ్జిక్యూటివ్‌లపై ఎఫ్ఐఆర్ నమోదు చేసింది . గడువు ముగిసిన, పాడైన , తిరస్కరించ బడిన రూ. 32.71 లక్షలకు పైగా విలువైన ఆహార ఉత్పత్తులకు సంబంధించిన నియంత్రణ ఉల్లంఘనల ఆరోపణలపై మెస్సర్స్ బ్లింక్ కామర్స్ ప్రైవేట్ లిమిటెడ్ వారిచే నిర్వహించ బడుతున్న బ్లింకిట్ భివండి కేంద్రంలోని ఆహార వ్యాపార లైసెన్స్‌ను మహారాష్ట్ర ఆహార , ఔషధ పరిపాలన సంస్థ నిలిపి వేసింది. ఈ విష‌యాన్ని అధికారికంగా ప్ర‌క‌టించింది.
విస్తృత తనిఖీలలో గడువు ముగిసిన, పాడైన లేదా తిరస్కరించ బడినవిగా వర్గీకరించబడిన సుమారు 18,405 ఆహార వస్తువులకు సంబంధించి కంపెనీ ఎండ్-టు-ఎండ్ ట్రేసబిలిటీ లేదా నాశనం చేసినట్లు రుజువును అందించలేక పోయిందని తేలింది. ప్రజారోగ్యానికి సంభావ్య ముప్పును ఉటంకిస్తూ ఆ ప్రాంగణంలో లైసెన్స్ పొందిన కార్యకలాపాలను తక్షణమే నిలిపి వేయాలని ఎఫ్‌డిఎ ఆదేశించింది. అమ్మకానికి పనికిరాని, లెక్కల్లో లేని సరుకును దారి మళ్లించి వినియోగదారులకు అమ్మే అవకాశం ఉందని ఆందోళ‌న వ్య‌క్తం చేసింది.
లైసెన్స్ సస్పెన్షన్ తర్వాత, స్క్రాప్ పారవేయడంలో పాలుపంచుకున్న ఒక పూర్తికాల డైరెక్టర్ , ఫెసిలిటీ మేనేజర్‌లతో సహా కీలకమైన బ్లింకిట్ సిబ్బందిపై, అలాగే పలువురు విక్రేతలపై భివండి తాలూకా పోలీస్ స్టేషన్‌లో ఎఫ్‌డిఎ ఒక ప్రథమ సమాచార నివేదిక (ఎఫ్ఐఆర్) నమోదు చేసింది. నిందితులపై భారతీయ న్యాయ సంహిత 2023లోని మోసం, నేరపూరిత కుట్రకు సంబంధించిన నిబంధనలతో పాటు, ఆహార భద్రత , ప్రమాణాల చట్టం, 2006లోని సెక్షన్ 59(i) కింద కూడా కేసులు నమోదు చేయబడ్డాయి.
