Akunuri Murali KTR : కారు రేసులు ఎవ‌రు అడిగిండ్రు – ముర‌ళి

Akunuri Murali KTR : ఎస్డీఎఫ్ క‌న్వీన‌ర్, మాజీ ఐఏఎస్ ఆఫీస‌ర్ ఆకునూరి ముర‌ళి నిప్పులు చెరిగారు. ఆయ‌న ట్విట్ట‌ర్ వేదికగా సీరియ‌స్ కామెంట్స్ చేశారు. ఓ వైపు జాబ్స్ లేక నిరుద్యోగులు ఇబ్బంది ప‌డుతుంటే ఇంకో వైపు కారు రేసులు నిర్వ‌హించ‌డం ఎంత వ‌ర‌కు స‌బ‌బు అని ప్ర‌శ్నించారు. ఎవ‌రు అడిగార‌ని వీటిని నిర్వ‌హిస్తున్నారంటూ నిల‌దీశారు ఆకునూరి ముర‌ళి(Akunuri Murali) .

డ‌బ్బులు ఉన్న వాళ్లు ఎలాగూ విదేశాల‌కు వెళ్లి ఎంజాయ్ చేస్తున‌న్నార‌ని ఇక్క‌డ ఎందుకు పెట్టారంటూ మండిప‌డ్డారు. ఎట్లాగు మీరు కూడా ప‌దే ప‌దే అమెరికాకు వెళుతుంటార‌ని అక్క‌డే చూసి రాక ఈ గ‌జ్జిని ఇక్క‌డ ఎందుకు ఇంప్లిమెంట్ చేయాల‌ని చూస్తున్నారంటూ ఫైర్ అయ్యారు ఆకునూరి ముర‌ళి.

ఇప్ప‌టికే తెలంగాణ పేరుతో రాష్ట్రంలో వ‌న‌రుల‌ను ధ్వంసం చేసిన మీరు ఇక ఇలాంటి రేసులు నిర్వ‌హించడం ఆపాల‌ని సూచించారు. ఈ కారు రేసుల వ‌ల్ల ట్రాఫిక్ జామ్ ఏర్ప‌డుతుంద‌ని దీని వ‌ల్ల ఎంతో మంది తీవ్ర ఇబ్బంది ప‌డుతున్నార‌ని ఆవేద‌న వ్య‌క్తం చేశారు. సామాన్యుల‌కు న‌ర‌కం చూపిస్తున్నారంటూ ధ్వ‌జ‌మెత్తారు ఆకునూరి ముర‌ళి.

విద్యా, ఆరోగ్య రంగాల‌ను భ్ర‌ష్టు ప‌ట్టించార‌ని, ప్ర‌జ‌లు ఎదుర్కొంటున్న స‌మ‌స్య‌ల‌ను ప‌క్క‌న పెట్టార‌ని ఇక పాల‌న ప్ర‌స్తుతం ప‌డ‌కేసింద‌ని ఎద్దేవా చేశారు.

నియోజ‌క‌వ‌ర్గాల‌లో ఎక్క‌డిక‌క్క‌డ స‌మ‌స్య‌లు పేరుకు పోయినా ఒక్క‌టి కూడా ప‌రిష్క‌రించిన పాపాన పోలేద‌న్నారు. డ‌బుల్ బెడ్రూమ్ లు నిర్మించినా వాటిని ఇంత వ‌ర‌కు పేద‌ల‌కు మంజూరు చేయ‌లేద‌ని ఎందుక‌ని నిల‌దీశారు ఎస్డీఎఫ్ క‌న్వీన‌ర్ ఆకునూరి మురళి.

Also Read : అధునాత‌న కూర‌గాయ‌ల మార్కెట్లు