US Consulate Notification: రూ. 4.47 లక్షల వార్షిక వేతనంతో తాపీమేస్త్రీకి నోటిఫికేషన్ !

US Consulate Notification: తాపీమేస్త్రీకి రూ. 4.47 లక్షలు వార్షిక వేతనం అందిస్తామని ప్రకటిస్తూ హైదరాబాద్‌ లోని యూఎస్‌ కాన్సులేట్‌ జనరల్‌ ఇచ్చిన నోటిఫికేషన్ ఇప్పుడు సోషల్ మీడియాలో వైరల్ గా మారుతోంది. డిగ్రీలు, పీజీలు, బీటెక్, ఎంటెక్ లు చేసిన వారికి మూడు లక్షల వార్షిక వేతనంతో ఉద్యోగం దొరకడం కష్టంగా ఉన్న ఈ రోజుల్లో… ఓ తాపీమేస్త్రీకి రూ. 4.47 లక్షలు వార్షిక వేతనంతో ఇచ్చిన ప్రకటన చూసి అంతా అవాక్కవుతున్నారు. తాపీమేస్త్రీ పని అంత ఈజీ కాదు… అలాగే డిగ్నిటీ ఆఫ్ లేబర్ క్రింద వారిని అంత తక్కువ కూడా అంచనా వేయలేం. అయితే అన్ స్కిల్డ్ లేబర్ క్రింద వచ్చే ఈ పనికి యూఎస్ కాన్సులేట్ నోటిఫికేషన్ విడుదల చేయడం సోషల్ మీడియాలో చర్చకు దారితీస్తోంది. ఇక పూర్తి వివరాల్లోకి వెళితే…

US Consulate Notification Updates

తాపీ మేస్త్రీ నియామానికి సంబంధించి హైదరాబాద్‌ లోని యూఎస్‌(US) కాన్సులేట్‌ జనరల్‌ నోటిఫికేషన్ ను విడుదల చేసింది. ఈ నోటిఫికేషన్ క్రింద ధరఖాస్తు చేసుకునే అభ్యర్ధులకు తప్పనిసరిగా ఇంగ్లీషు భాష వచ్చి ఉండాలని, హిందీ లేదా తెలుగు భాషలు మాట్లాడగలిగి ఉండాలని నిబంధన విధించారు. కనీస విద్యార్హత ఎనిమిదో తరగతిగా నిర్ణయిస్తూ… ఫ్లోరింగ్‌, మార్బుల్‌ ఫ్లోరింగ్‌, కాంక్రీట్‌ బ్లాక్స్‌ వాల్‌, స్టోన్‌ లేయింగ్‌, కట్టింగ్‌, బ్రిక్‌వర్క్‌ తదితర పనుల్లో రెండు సంవత్సరాల అనుభవం ఉండాలని పేర్కొన్నారు. అర్హత పరీక్షతోపాటు, ఇంటర్వ్యూ నిర్వహించిన తరువాత తుది ఎంపిక జరుగుతోందని స్పష్టం చేసింది. దరఖాస్తు చేయడానికి చివరి తేదీ ఫిబ్రవరి 25 కాగా పూర్తి వివరాల కోసం https://in.usembassy.gov/embassyconsulates/jobs/hyderabad/ వెబ్‌సైట్‌ను సందర్శించాలని నోటిఫికేషన్ లో పేర్కొంది.

ఈ నోటిఫికేషన్ ద్వారా నియామకం అయిన తాపీమేస్త్రీకి రూ. 4.47 లక్షల వార్షిక వేతనంతో పాటు ఇతర ప్రయోజనాలు ఉంటాయని తెలిపింది. ‘యూఎస్‌ కాన్సులేట్‌ జనరల్‌ హైదరాబాద్‌’ తన అధికారిక ఎక్స్‌ఖాతాలో పోస్టు చేసిన ఈ నోటిఫికేషన్‌ సోషల్ మీడియాలో వైరల్ గా మారుతోంది. తాపీమేస్త్రీకి కూడా నోటిఫికేషన్ ను విడుదల చేయడం… వార్షిక వేతనం రూ. 4.47 లక్షలతో పాటు ఇతర ప్రయోజనాలు కల్పించడంపై నిరుద్యోగులు అవాక్కవుతున్నారు. బీటెక్, ఎంటెక్ లతో పాటు తాపీమేస్త్రీ పని నేర్చుకున్నా హాయిగా యూఎస్ కాన్సులేట్ లో ఉద్యోగం దొరికేది అంటూ కామెంట్లు పెడుతున్నారు.

అయితే కొందరు తాపీమేస్త్రీలు మాత్రం యూఎస్ కాన్సులేట్ ఇచ్చిన నోటిఫికేషన్ లో పెద్దగా ప్రయోజనం లేదని అంటున్నారు. ఒక్క ఉద్యోగ భద్రత తప్ప అందులో తాపీమేస్త్రీకు ఆర్ధికంగా పెద్దగా ప్రయోజనం ఉండదని అంటున్నారు. సంవత్సరానికి రూ. 4.47 లక్షలు అంటే నెలకు రూ. 37,250… అంటే రోజుకి సుమారు రూ. 1241 వస్తుంది. ప్రస్తుతం తాపీమేస్త్రీలకు ఇంచుమించు ఇదే వేతనం బయట దొరుకుతుంది అంటున్నారు.

Also Read : AP DSC : ఎట్టకేలకు ఏపీ నిరుద్యోగ యువతకు శుభవార్త చెప్పిన జగన్ సర్కార్