Rinku Singh : ఇక అప్పుల‌న్నీ తీర్చేస్తా – రింకూ సింగ్

Rinku Singh : రింకూ సింగ్ ఈ పేరు తెలియ‌ని వారంటూ ఉండ‌రు. ఐపీఎల్ 16వ సీజ‌న్ లో ఒక్క‌సారిగా మెరిశాడు. గ‌తంలో అద్భుతంగా ఆడిన‌ప్ప‌టికీ గుజ‌రాత్ లోని అహ్మ‌దాబాద్ వేదిక‌గా జ‌రిగిన ఐపీఎల్ లీగ్ మ్యాచ్ లో గుజ‌రాత్ టైటాన్స్ కు చుక్క‌లు చూపించాడు. ఆఖ‌రి ఓవ‌ర్ వేసిన య‌శ్ ద‌యాల్ కు దిమ్మ తిరిగేలా షాక్ ఇచ్చాడు. ఆ ఓవ‌ర్ లో వ‌రుస‌గా 5 సిక్స‌ర్లు కొట్టాడు. క‌ళ్లు చెదిరే ఆ షాట్స్ తో క్రికెట్ లోకం విస్తు పోయింది. రింకూ సింగ్ కు జేజేలు ప‌లికింది.

ఇది ప‌క్క‌న పెడితే యూపీకి చెందిన రింకూ సింగ్(Rinku Singh) ది పేద కుటుంబం. తండ్రి ఇంటింటికీ వెళ్లి సిలిండ‌ర్లు అంద‌జేసే వాడు. సోద‌రుడు ఆటో రిక్షా న‌డిపే రేకుల షెడ్డులోనే ఉంటాడు. రింకూ సింగ్ కేవ‌లం 9వ త‌ర‌గ‌తి వ‌ర‌కు మాత్ర‌మే చ‌దివాడు. కానీ అత‌డికి క్రికెట్ అంటే పిచ్చి. 2013 నుంచి మెల మెల్ల‌గా క్రికెట్ లోకి ఎంట్రీ ఇచ్చాడు. ఆ త‌ర్వాత ఐపీఎల్ వేలం పాట‌లో మొద‌ట పంజాబ్ ఆ త‌ర్వాత కోల్ క‌తా నైట్ రైడ‌ర్స్ కైవ‌సం చేసుకుంది. కానీ ఒకే ఒక్క మ్యాచ్ అత‌డి పోరాటానికి దాసోహ‌మైంది.

త‌న కోసం , త‌న వారి కోసం ఈ ఇన్నింగ్స్ అంకితం ఇస్తున్నాని ప్ర‌క‌టించాడు రింకూ సింగ్. ఇప్ప‌టి దాకా చాలా అప్పులు ఉన్నాయ‌ని ఐపీఎల్ అయి పోయాక వాట‌న్నింటినీ తీరుస్తాన‌ని చెప్పాడు. అంతే కాదు ఇంకా ఎందుకు నాన్నా ఆ సిలిండ‌ర్లు స‌ర‌ఫ‌రా చేస్తావ‌ని అడిగాన‌ని కానీ మా తండ్రి ఒప్పుకోలేద‌న్నాడు.

Also Read : డుప్లెసిస్ కు షాక్ బీసీసీఐ జ‌రిమానా