ఉద్యోగాలకు నైపుణ్య, భాషా శిక్షణే కీలకం

హైద‌రాబాద్ : జర్మనీ అవకాశాలపై దృష్టి పెట్టాల‌ని , విదేశీ ఉద్యోగ నియామకాలకు నైపుణ్య, భాషా శిక్షణే అత్యంత కీలకం అని మంత్రి వివేక్ వెంకటస్వామి అన్నారు . రాష్ట్రంలోని ఇతర విద్యావంతులైన యువతలో ఉత్సాహం నింపేందుకు, యువతలో అధిక శాతం మందికి సరైన నైపుణ్యాభివృద్ధి, భాషా ప్రావీణ్యం కల్పించి, విదేశాలకు, ముఖ్యంగా జర్మనీకి పంపి ఉద్యోగాలు కల్పించడంపై దృష్టి పెట్టాలని
అధికారులను ఆదేశించారు. విజయవంతమైన ఉద్యోగ నియామకాలు రాష్ట్రంలోని మరింత మంది యువతను విదేశీ ఉపాధి అవకాశాలను అంది పుచ్చుకోవడానికి ప్రేరేపిస్తాయని ఆయన నొక్కి చెప్పారు.

సామర్థ్య నిర్మాణ ప్రాముఖ్యతను హైలైట్ చేస్తూ, డా. వెంకటస్వామి శిక్షకులకు శిక్షణ” ఇవ్వాల్సిన అవసరాన్ని నొక్కి చెప్పారు. అత్యంత అర్హత కలిగిన భాషా బోధకులను తక్షణమే నియమించాలని పిలుపునిచ్చారు. జర్మన్ భాషా శిక్షణ కీలకమని ఆయన నొక్కిచెప్పారు. భాషా నైపుణ్యాభివృద్ధి కార్యక్రమాలను బలోపేతం చేయాల‌ని స్ప‌ష్టం చేశారు. సచివాలయంలోని తన ఛాంబర్‌లో తెలంగాణ ఓవర్సీస్ మ్యాన్ పవర్ కంపెనీ (టామ్‌కామ్) బోర్డు సమావేశానికి మంత్రి అధ్యక్షత వహించారు, ఈ సందర్భంగా విదేశీ ఉపాధికి సంబంధించిన పలు కీలక అంశాలపై చర్చించారు.

తెలంగాణకు చెందిన నైపుణ్యం గల కార్మికులకు, విద్యావంతులైన యువతకు జర్మనీలో విస్తారమైన అవకాశాలు ఉన్నాయని మంత్రి పేర్కొన్నారు. ఈ నియామకాలను సులభతరం చేయడంలో టామ్‌కామ్ చురుకుగా వ్యవహరించాలని ఆయన ప్రోత్సహించారు. విదేశీ ఉద్యోగ అవకాశాలను కల్పించడంలో టామ్‌కామ్ రాష్ట్ర అధికారిక, విశ్వసనీయ సంస్థ అని ఆయన పునరుద్ఘాటించారు. జీసీసీ దేశాలలో సెమీ-స్కిల్డ్ కార్మికులకు నియామకాలు కల్పించేందుకు జరుగుతున్న ప్రయత్నాలపై అధికారులు మంత్రికి వివరించారు. విదేశాలలో పనిచేస్తున్న కార్మికుల నుండి క్రమం తప్పకుండా అభిప్రాయాలు సేకరించి, సహాయక వ్యవస్థలు, ప్రక్రియలను మెరుగు పరచడానికి ఎప్పటికప్పుడు నివేదికలు సమర్పించాలని డాక్టర్ వెంకటస్వామి అన్నారు.

ప్రతి దేశానికి దాని స్వంత సంస్కృతి ఉంటుందని, ఆయా దేశాల సాంస్కృతిక అవగాహనపై యువతకు శిక్షణ ఇవ్వాల్సిన అవసరం ఉందని మంత్రి అన్నారు. టామ్‌కామ్ ద్వారా యువతకు శిక్షణ, నియామకాల విషయంలో లక్ష్యాల ఆధారిత ప్రతిపాదనలతో ముందుకు రావాలని కోరారు. విదేశీ ఉపాధి కార్యక్రమాలలో తెలంగాణ ఇతర రాష్ట్రాలకు ఆదర్శంగా నిలవాలని పేర్కొంటూ, టామ్‌కామ్ తన సామర్థ్యాన్ని, పని ప్రమాణాలను మెరుగుప రచుకోవాలని ఆయన ఆదేశించారు. యువతకు ప్రపంచవ్యాప్త ఉపాధి అవకాశాలను కల్పించడానికి తెలంగాణ ప్రభుత్వం కట్టుబడి ఉందని, ఈ లక్ష్యాన్ని సాధించడానికి అవసరమైన అన్ని చర్యలు తీసుకుంటోందని మంత్రి పునరుద్ఘాటించారు.