తమిళనాట దళపతి విజయ్ ప్రభంజనం
రెండేళ్లలో చరిత్ర సృష్టించిన అగ్ర నటుడు
తమిళనాడు : దేశ వ్యాప్తంగా సంచలనంగా మారిన ఐదు రాష్ట్రాల ఎన్నికల ఫలితాలు సోమవారం వెల్లడయ్యాయి. ఎవరూ ఊహించని రీతిలో కేవలం రెండు సంవత్సరాల కాలంలోనే పార్టీని ఏర్పాటు చేసి ఏకంగా ప్రధాన పార్టీలకు ఝలక్ ఇచ్చాడు అగ్ర నటుడు స్థాపించిన టీవీకే పార్టీ. 234 స్థానాలకు గాను భారీ ఎత్తున స్థానాలను కైవసం చేసుకుని ఒంటరిగానే ప్రభుత్వాన్ని ఏర్పాటు చేసేందుకు రెడీ అయ్యాడు విజయ్. ఎంజీఆర్, జయలలిత తర్వాత తమిళనాడు రాజకీయాలలో పెను విస్పోటనంగా మారాడు . యావత్ భారతమంతా తన వైపు తిప్పుకునేలా చేశాడు. అస్సాంలో భారతీయ జనతా పార్టీ విక్టరీ నమోదు చేయగా పశ్చిమ బెంగాల్ లో సుదీర్ఘ పాలనకు తెర దించుతూ కమలం జెండా ఎగుర వేసింది. టీఎంసీ దీదీకి షాక్ ఇచ్చింది.
పుదుచ్చేరిలో బీజేపీ అలయెన్స్ పవర్ లోకి రాగా తమిళనాట టీవీకే , పశ్చిమ బెంగాల్ లో బీజేపీ దుమ్ము రేపింది. అస్సాంలో కమలం మరోసారి జెండా ఎగుర వేసింది. ఇక తమిళనాడు రాష్టంలో మాత్రం ఈసారి భిన్నంగా ఫలితాలు వెల్లడి అయ్యాయి. 1977లో ఎం. జి. రామచంద్రన్ రాష్ట్ర రాజకీయ ముఖచిత్రాన్ని మార్చినప్పటి నుండి ఏ సినీ నటుడు సాధించని దానిని చేసే అంచున విజయ్ నిలబడి ఉన్నారు. తమిళనాడు రాజకీయాల్లో విజయ్ ఎదుగుదల ఆకట్టుకుంటోంది. విజయ్ కథ ఇకపై కేవలం సినిమాకు సంబంధించినది కాదు. ఇది దాదాపు ఐదు దశాబ్దాలలో చూడని విధంగా తమిళనాడు రూపురేఖలను మార్చగల ఒక రాజకీయ ఘట్టం. ఫోర్ట్ సెయింట్ జార్జ్లో సినిమా నేరుగా అధికారంగా మారిన చివరిసారి అదే. అప్పుడు ఎంజీఆర్ అభిమాన భక్తిని ఒక శక్తివంతమైన రాజకీయ యంత్రంగా మార్చి, ఒక దశాబ్దం పాటు పాలించారు.