కాంగ్రెస్ తో కటీఫ్ అఖిలేష్ పాదయాత్ర స్టార్ట్
ఉత్తర ప్రదేశ్ లో వేడెక్కిన రాజకీయ ప్రచారం
ఉత్తర ప్రదేశ్ : కాంగ్రెస్తో విభేదాల మధ్య నేడు రాయ్బరేలీ నుంచి ప్రజా పాదయాత్రకు శ్రీకారం చుట్టారు సమాజ్ వాది పార్టీ అధ్యక్షుడు, మాజీ సీఎం అఖిలేష్ యాదవ్. సమాజ్వాదీ పార్టీ, కాంగ్రెస్ ప్రతిపక్ష ఇండియాస కూటమిలో మిత్రపక్షాలుగా ఉన్నాయి. ఉత్తరప్రదేశ్లో 2027 అసెంబ్లీ ఎన్నికల ప్రచారంలో భాగంగా సమాజ్వాదీ పార్టీ అధినేత యాత్రకు కొత్తగా శ్రీకారం చుట్టారు. ఈ సందర్బంగా ఆయన అధికారంలో ఉన్న బీజేపీ సర్కార్ ను, సీఎం యోగి హయాంలో చోటు చేసుకున్న వైఫల్యాలను ఎండగట్టనున్నారు. సంప్రదాయ బద్ధంగా కాంగ్రెస్ కంచుకోటగా ఉన్న రాయ్బరేలీ నియోజకవర్గం నుండి యాత్రను మొదలు పెట్టడం ఇప్పుడు హాట్ టాపిక్ గా మారింది రాజకీయ వర్గాలలో. అఖిలేష్ యాదవ్ ఒక బస్సును ప్రత్యేకంగా తీర్చిదిద్దిన కాషాయ రంగు రథంలో ప్రయాణించారు. కాంగ్రెస్ నేత , లోక్సభలో ప్రతిపక్ష నాయకుడు రాహుల్ గాంధీ ప్రాతినిధ్యం వహిస్తున్న పార్లమెంటరీ నియోజకవర్గం కావడంతో, ఈ స్థానం నుండే కార్యక్రమాన్ని ప్రారంభించాలన్న అఖిలేష్ నిర్ణయం రాజకీయ వర్గాల్లో మరింత ఆసక్తిని రేకెత్తించింది.
ప్రతిపక్ష ‘ఇండియా’ కూటమిలో సమాజ్వాదీ పార్టీ , కాంగ్రెస్ మిత్రపక్షాలుగా ఉన్నాయి. కూటమి 2027 అసెంబ్లీ ఎన్నికల సన్నాహాల నేపథ్యంలో ఈ తాజా పరిణామం చోటు చేసుకుంది. అంతకు ముందే ఎస్పీ అధినేత సీనియర్ పార్టీ నేతలు ఇంద్రజీత్ సరోజ్ , ఆనంద్ భదౌరియాలను అమేథీ , రాయ్బరేలీ పార్లమెంటరీ నియోజకవర్గాలకు ఇన్ఛార్జ్లుగా నియమించారు . ఈ రెండు నియోజకవర్గాలు చాలా కాలంగా కాంగ్రెస్ బలమైన స్థానాలుగా ఉన్నాయి. ‘ఇండియా’ కూటమి బలంగా ఉన్న సమయంలో ప్రతిపక్ష కూటమిలో భాగంగా కలిసి ఎన్నికల్లో పోటీ చేయడానికి సమాజ్వాదీ పార్టీ, కాంగ్రెస్ అంగీకరించిన తరుణంలో ఈ నియామకాలు జరిగాయి. అయితే రాజకీయ ప్రచారం, నాయకత్వం , ప్రతిపక్ష కూటమిలో రెండు పార్టీల ప్రాధాన్యత వంటి అంశాలపై విభేదాలు తలెత్తడంతో ఉత్తరప్రదేశ్లో ఈ రెండు పార్టీల మధ్య రాజకీయ సంబంధాలలో ఒత్తిడి సంకేతాలు కనిపిస్తున్నాయి.
ప్రస్తుతం సమాజ్వాదీ పార్టీ ఎంపీ ఇక్ర హసన్ , కాంగ్రెస్ ఎంపీ ఇమ్రాన్ మసూద్ మధ్య వివాదం నడుస్తోంది; వీరి వ్యాఖ్యలు మిత్రపక్షాల మధ్య తలెత్తిన విస్తృత విభేదాలను ప్రతిబింబిస్తున్నాయి. ఉత్తరప్రదేశ్లో బీజేపీని ఓడించే సామర్థ్యం ఎస్పీ అధినేత అఖిలేష్ యాదవ్కు మాత్రమే ఉందని కాంగ్రెస్ ఒంటరిగా పెద్దగా సాధించలేదని హసన్ వ్యాఖ్యానించినట్లు సమాచారం. బీజేపీని సవాలు చేయగల లేదా కలవరపెట్టగల జాతీయ స్థాయి గుర్తింపు ఉన్న ఏకైక ప్రతిపక్ష నాయకుడు కాంగ్రెస్ నేత, లోక్సభలో ప్రతిపక్ష నాయకుడు రాహుల్ గాంధీ మాత్రమేనని నొక్కిచెప్పడం ద్వారా మసూద్ స్పందించినట్లు సమాచారం.
