సీఈసీ జ్ఞానేష్ కుమార్‌పై చ‌ర్య‌లు తీసుకోవాలి

న్యూఢిల్లీ : ప్ర‌ధాన ఎన్నిక‌ల కమిష‌న‌ర్ జ్ఞానేష్ కుమార్ పై క్రిమిన‌ల్ చ‌ర్య‌లు తీసుకోవాల‌ని సుప్రీంకోర్టులో పిటిష‌న్ దాఖ‌లు చేశారు ఓ న్యాయ‌వాది. భార‌త రాజ్యాంగంలోని ఆర్టికల్ 141 కింద సుప్రీంకోర్టు ప్రకటించిన చట్టాన్ని ఉద్దేశ పూర్వకంగా ధిక్కరించడమే అవుతుందని పేర్కొన్నారు. “పూర్తి కమిషన్” పేరుతో నిర్ణయాలు లేదా ప్రకటనలు జారీ చేసేటప్పుడు ఇతర ఎన్నికల కమిషనర్లను పక్కన పెట్టడంపై ఈ ధిక్కార అభ్యర్థనలో ఆరోపించారు. ప్రధాన ఎన్నికల కమిషనర్ జ్ఞానేష్ కుమార్. మీడియాలో ప్రచురితమైన సంచలనాత్మక కథనం నేపథ్యంలో భారత ఎన్నికల సంఘం పనితీరుకు సంబంధించిన సుప్రీంకోర్టు తీర్పులను ఉద్దేశ పూర్వకంగా ధిక్కరించారని మండిప‌డ్డారు. ప్రధాన ఎన్నికల కమిషనర్ జ్ఞానేష్ కుమార్‌పై క్రిమినల్ ధిక్కార చర్యలు ప్రారంభించేందుకు భారత అటార్నీ జనరల్ చట్టబద్ధమైన అనుమతిని ఒక సుప్రీంకోర్టు న్యాయవాది కోరారు.

భారత ఎన్నికల సంఘం లో బహుళ-సభ్యుల ఏకాభిప్రాయం పూర్తిగా విచ్ఛిన్నమైంది అని ఆరోపిస్తున్న మీడియా నివేదికను ప్రస్తావించారు న్యాయవాది బ్రజేష్ సింగ్ . ఈనెల 24న అటార్నీ జనరల్ ఆర్. వెంకటరమణికి రాసిన లేఖలో ఆ నివేదికలో పేర్కొన్నట్లుగా మిగిలిన ఇద్దరు ఎన్నికల కమిషనర్లు సుఖ్‌బీర్ సింగ్ సంధు , వివేక్ జోషి, గత 10 నెలల్లో కనీసం 14 సార్లు అధికారికంగా లిఖిత పూర్వక అభ్యంతరాలను నమోదు చేశారని సమర్పించారు. సింగ్ లేఖ ప్రకారం ఆ ఇద్దరు ఎన్నికల కమిషనర్లు అనేక నిర్ణయాలను అనధికారికమైనవి, చట్ట విరుద్ధమైనవిగా అభివర్ణించారు. ఈ చర్యలు ముగ్గురు సభ్యుల ఎన్నికల సంఘం రాజ్యాంగ బద్ధంగా నిర్దేశించిన పనితీరు నుండి వైదొలగడాన్ని ప్రదర్శిస్తున్నాయని ఆయన ఆరోపించారు.