విదేశీ నిధుల‌తో భార‌త్ లో వ్యతిరేక కార్య‌క‌లాపాలు
సంచ‌ల‌న వ్యాఖ్య‌లు చేసిన మాజీ సీఎం బొమ్మై
బెంగ‌ళూరు : భారత్‌కు వ్యతిరేక కార్యకలాపాలకు విదేశీ నిధులు వాడుతున్నారని సంచ‌ల‌న ఆరోప‌ణ‌లు చేశారు క‌ర్ణాట‌క మాజీ సీఎం బొమ్మై. ఇందుకు సంబంధించి విచార‌ణ జ‌రిపించాల‌ని, త‌క్ష‌ణ‌మే కేంద్రం చర్యలు తీసుకోవాలని విజ్ఞప్తి చేశారు. శ‌నివారం మాజీ సీఎం హుబ్బళ్లిలో మీడియాతో మాట్లాడారు బసవరాజ్ బొమ్మై, స్వచ్ఛంద సంస్థలకు అందుతున్న విదేశీ నిధులు దేశ వ్యతిరేక కార్యకలాపాలకు వినియోగించ బడుతున్నాయని ఆందోళన వ్యక్తం చేశారు. నేపాల్, శ్రీలంక, బంగ్లాదేశ్ వంటి పొరుగు దేశాల మీదుగా కూడా ఇలాంటి నిధులు వస్తున్నాయని ఆయన పేర్కొన్నారు. గత పదేళ్లుగా సోరోస్ ఫౌండేషన్ వంటి సంస్థల నుంచి నిధులు అందుతున్నాయని ఆయన ఆరోపించారు. కాంగ్రెస్ నేత రాహుల్ గాంధీ విదేశీ పర్యటనల్లో భారత్‌కు వ్యతిరేకంగా మాట్లాడుతున్నారని, దేశంలో ప్రజాస్వామ్యం లేదని చిత్రీకరించే ప్రయత్నం చేస్తున్నారని బొమ్మై విమర్శించారు.
దేశంలో ప్రజాస్వామ్యం లేకపోతే, ఆయన ప్రతిపక్ష నాయకుడు ఎలా అయ్యారని ప్ర‌శ్నించారు మాజీ సీఎం. రెండు రాష్ట్రాల్లో ఎన్నికల్లో పోటీ చేయడమే భారత్‌లో ప్రజాస్వామ్యం సజీవంగా ఉందనడానికి నిదర్శనం అని ఆయన పేర్కొన్నారు. బీజేపీని ఎన్నికల్లో ఎదుర్కోలేక, కాంగ్రెస్ పార్టీ సీజేపీ వంటి సంస్థలకు మద్దతు ఇస్తూ దేశంలో అస్థిరత సృష్టించేందుకు ప్రయత్నిస్తోందని బొమ్మై ఆరోపించారు. కాంగ్రెస్ , అటువంటి సంస్థలు విడివిడిగా విఫలం కావడంతో, ఇప్పుడు కలిసి పని చేస్తున్నట్లు కనిపిస్తున్నాయని ఆయన అన్నారు. ఎన్జీఓలకు అందే విదేశీ నిధులపై కేంద్ర ప్రభుత్వం కఠినమైన నిబంధనలను ఎలాగైతే ప్రవేశపెట్టిందో, అదే విధంగా భారతదేశానికి వ్యతిరేక కార్యకలాపాలకు ఉపయోగిస్తున్నట్లు ఆరోపణలున్న నిధుల విషయంలో కూడా కేంద్రం అంతే కఠినంగా వ్యవహరించాలని బొమ్మై అన్నారు.
మహిళా రిజర్వేషన్లను అమలు చేసే ముందు అఖిలపక్ష సమావేశాన్ని ఏర్పాటు చేయాలని ఏఐసీసీ అధ్యక్షుడు మల్లికార్జున ఖర్గే చేసిన విజ్ఞప్తిపై స్పందిస్తూ, పార్లమెంటు ప్రత్యేక సమావేశానికి ముందే అఖిలపక్ష సమావేశాన్ని నిర్వహిస్తామని బొమ్మై తెలిపారు. కర్ణాటకలో పెద్ద వివాదానికి దారితీసిన ‘స్టింగ్ ఆపరేషన్’ గురించి అడిగిన ప్రశ్నకు స్పందిస్తూ, రాజకీయ ప్రత్యర్థులను నేరుగా ఎదుర్కోలేని కొందరు వ్యక్తులు ఇలాంటి స్టింగ్ ఆపరేషన్ల ద్వారా వివాదాలను సృష్టిస్తున్నారని మాజీ ముఖ్యమంత్రి బసవరాజ్ బొమ్మై పేర్కొన్నారు.