తెలంగాణలో డిసెంబర్ 11 నుంచి ఖేలో ఇండియా పోటీలు
కీల‌క ప్ర‌క‌ట‌న చేసిన క్రీడా శాఖ మంత్రి మన్సుఖ్ మాండవియా
హైదరాబాద్: కేంద్ర యువజన వ్యవహారాలు, క్రీడల శాఖ మంత్రి డాక్టర్ మన్సుఖ్ మాండవియా హైదరాబాద్‌లో జరగనున్న ఖేలో ఇండియా యూత్ గేమ్స్ 2026 పూర్తి షెడ్యూల్‌ను ప్రకటించారు. సోమ‌వారం ఆయ‌న మీడియాతో మాట్లాడారు. క్రీడా మంత్రిత్వ శాఖ ప్రతిష్టాత్మక ఈవెంట్ అయిన కేఐవైజీ పోటీలు డిసెంబర్ 11-22 వరకు తెలంగాణలో జరగనుందని తెలిపారు. ఇందులో 27 పోటీ క్రీడలు, ఒక ప్రదర్శన క్రీడ ఉంటాయన్నారు. హైదరాబాద్‌లోని బషీర్‌బాగ్‌లో ఉన్న లాల్ బహదూర్ శాస్త్రి స్టేడియం కాంప్లెక్స్, ఆధునిక గచ్చిబౌలి స్పోర్ట్స్ కాంప్లెక్స్‌తో సహా పలు వేదికలపై 22 పతక క్రీడలు జరగనున్నాయి. మిగిలిన క్రీడలకు ఖమ్మం (విలువిద్య), హనుమాన్‌కొండ (అథ్లెటిక్స్), కరీంనగర్ (జూడో), నిజామాబాద్ (టేబుల్ టెన్నిస్), మహబూబ్‌నగర్ (కబడ్డీ) నగరాలు ఆతిథ్యం ఇవ్వనున్నాయి.
ఖేలో ఇండియా యూత్ గేమ్స్ 2026 షెడ్యూల్‌ను ప్రకటించడం నాకు చాలా ఆనందంగా ఉందన్నారు మన్సుఖ్ మాండవియా. ఈ పథకాల ద్వారా ప్రతిభావంతులైన క్రీడాకారులు తమ సత్తాను చాటుకోవడానికి, ఉన్నత స్థాయికి ఎదగడానికి ఎన్నో ఏళ్లుగా ఒక వేదికను అందిస్తున్న ఖేలో ఇండియా ఈవెంట్ల పరంపరకు ఇది నాంది పలుకుతుందని అన్నారు.. ఐచి-నగోయాలో జరిగిన ఆసియా క్రీడల తర్వాత కేఐవైజీ లు వస్తున్నందున, మనం కొన్ని నాణ్యమైన ప్రదర్శనలను ఆశించవచ్చ ని డాక్టర్ మాండవియా అన్నారు.
ఖేలో ఇండియా కార్యక్రమాల చరిత్రలో తొలిసారిగా తెలంగాణ రాష్ట్రం ఆతిథ్యం ఇవ్వనున్న 12 రోజుల క్రీడా ఉత్సవంలో సుమారు 6000 మంది క్రీడాకారులు, 1800 మంది సహాయక సిబ్బంది పాల్గొంటారని అంచనా. సాఫ్ట్‌బాల్ ఒక పోటీ క్రీడగా తొలిసారిగా అరంగేట్రం చేయనుండగా కేఐవైజీ కార్యక్రమంలో సెయిలింగ్‌ను తొలిసారిగా చేర్చారు. ఇది ఒక ప్రదర్శన కార్యక్రమంగా ఉంటుందన్నారు కేంద్ర మంత్రి.
