C. P. Radhakrishnan: తెలంగాణ గవర్నర్‌గా సీపీ రాధాకృష్ణన్‌ ప్రమాణస్వీకారం !

C. P. Radhakrishnan: తెలంగాణ గవర్నర్‌ గా సీపీ రాధాకృష్ణన్‌ ప్రమాణస్వీకారం చేశారు. రాజ్‌భవన్‌లో రాష్ట్ర హైకోర్టు ప్రధాన న్యాయమూర్తి జస్టిస్‌ ఆలోక్‌ అరాధే ఆయనతో ప్రమాణం చేయించారు. ప్రస్తుతం ఝార్ఖండ్‌ గవర్నర్‌ గా ఉన్న రాధాకృష్ణన్‌… అదనంగా తెలంగాణ బాధ్యతలు స్వీకరించారు. తెలంగాణా గవర్నర్ తమిళిసై రాజీనామా నేపథ్యంలో రాష్ట్రపతి ద్రౌపదీముర్ము… రాధాకృష్ణన్ ను గవర్నర్ గా నియమించిన విషయం తెలిసిందే. తెలంగాణతో పాటు పుదుచ్చేరి లెఫ్టినెంట్‌ గవర్నర్‌ గానూ ఆయనకు అదనపు బాధ్యతలు అప్పగించారు. రెండు చోట్లా పూర్తిస్థాయి గవర్నర్లను నియమించేంత వరకూ సీపీ రాధాకృష్ణన్‌ బాధ్యతలు నిర్వర్తిస్తారని రాష్ట్రపతి కార్యాలయం మంగళవారం విడుదల చేసిన ప్రకటనలో పేర్కొంది. ఈ ప్రమాణస్వీకార కార్యక్రమానికి సీఎం రేవంత్‌రెడ్డి, పలువురు మంత్రులు, ప్రజాప్రతినిధులు హాజరయ్యారు.

C. P. Radhakrishnan As a Telangana Governer

1957 మే 4న జన్మించిన సీపీ రాధాకృష్ణన్‌… తమిళనాడులోని కోయంబత్తూరు లోక్‌ సభ స్థానం నుంచి రెండు సార్లు బీజేపీ తరఫున ఎంపీగా ఎన్నికయ్యారు. తమిళనాడు బీజేపీ రాష్ట్ర అధ్యక్షుడిగానూ పనిచేశారు. 2016 నుంచి 2019 వరకు ఆల్‌ ఇండియా కాయర్‌ బోర్డ్‌ ఛైర్మన్‌గా సేవలందించారు. తమిళనాడు బీజేపీ సీనియర్‌ నాయకుల్లో ఒకరిగా గుర్తింపు పొందిన రాధాకృష్ణన్‌(C. P. Radhakrishnan) … 2023 ఫిబ్రవరి 18 నుంచి ఝార్ఖండ్‌ గవర్నర్‌ గా బాధ్యతలు నిర్వహిస్తున్నారు. ఇప్పటి వరకు తెలంగాణ గవర్నర్లుగా పనిచేసిన ఈఎస్‌ఎల్‌ నరసింహన్‌, తమిళిసై సౌందరరాజన్‌తోపాటు ప్రస్తుతం బాధ్యతలు చేపట్టిన సీపీ రాధాకృష్ణన్‌… ముగ్గురూ తమిళనాడు వారే కావడం గమనార్హం.

Also Read : Sadhguru Jaggi Vasudev: సద్గురు జగ్గీ వాసుదేవ్‌ కు బ్రెయిన్ సర్జరీ !