ఇంటర్నెట్ పిల్లలకు ప్రాథమిక హక్కు : సుప్రీంకోర్టు
సంచ‌ల‌న తీర్పు చెప్పిన భారత దేశ స‌ర్వోన్న‌త ప్ర‌ధాన న్యాయ‌స్థానం
న్యూఢిల్లీ : భారత దేశ స‌ర్వోన్న‌త ప్ర‌ధాన న్యాయ‌స్థానం సుప్రీంకోర్టు సంచ‌ల‌న వ్యాఖ్యలు చేసింది. పిల్లలకు సంబంధించి ఇంట‌ర్నట్ ఉప‌యోగించే విష‌యంలో స్పందించింది. ఈ సంద‌ర్బంగా ఇంటర్నెట్ (నెట్ క‌నెక్టివిటీ) అనేది పిల్లలకు ప్రాథమిక హక్కు అని తేల్చింది . సంచ‌ల‌న తీర్పు వెలువ‌రించింది. వయసు ఆధారిత నిషేధానికి సుప్రీంకోర్టు నిరాక‌రించింది. ఇంటర్నెట్ సదుపాయాన్ని పిల్లలకు కూడా ప్రాథమిక హక్కుగా గుర్తించింది. ఇంటర్నెట్ వాడకంపై వయసు ఆధారిత నిషేధాన్ని ఒప్పుకునేది లేదని తేల్చింది. రాజ్యాంగంలోని ఆర్టికల్ 19(1)(ఎ)తో కలిపి చదివిన ఆర్టికల్ 21 ప్రకారం, ఇంటర్నెట్‌ను వినియోగించుకునే , పొందే హక్కు ప్రతి వ్యక్తి ప్రాథమిక హక్కు అని చెప్పడానికి త‌మ‌కు ఎలాంటి సంకోచం లేదని తేల్చి చెప్పింది. మన పిల్లలు, వారి వయస్సుతో సంబంధం లేకుండా, అవే హక్కులను అనుభవిస్తారు. ఒక నిర్దిష్ట వయస్సు కంటే తక్కువ వయస్సు ఉన్న పిల్లలకు రక్షించదగిన మనస్సాక్షి లేదా వ్యక్తీకరించదగిన వాక్ స్వాతంత్రం లేదని చెప్పడం ఎంత అసంబద్ధమో, ఈ హక్కులను పూర్తిగా నిరాకరించడం కూడా అంతే అసంబద్ధం అని కోర్టు పేర్కొంది.
అయితే సోషల్ మీడియా ప్లాట్‌ఫారమ్‌లు బాలల లైంగిక దోపిడీ , దుర్వినియోగ సామగ్రి గురించి భారత అధికారులకు నివేదించడంలో తమ చట్టపరమైన బాధ్యతలను నెరవేర్చడంలో విఫలమవుతున్నాయని ఆరోపిస్తూ బాలల హక్కుల స్వచ్ఛంద సంస్థ ‘జస్ట్ రైట్స్ ఫర్ చిల్డ్రన్ అలయన్స్’ మరో దరఖాస్తుదారు దాఖలు చేసిన దరఖాస్తులపై విచారణ జరిపింది సుప్రీంకోర్టు. జస్టిస్‌లు జె.బి. పర్దివాలా , కె.వి. చంద్రన్ ఈ వ్యాఖ్యలు చేశారు. మన పిల్లల భద్రత , వారి స్వేచ్ఛ ఒకదానికొకటి విరుద్ధం కాదు. మన పిల్లలకు ఈ రెండింటికీ హక్కు ఉంది అని ధర్మాసనం పేర్కొంది. వయస్సు ఆధారిత పూర్తిస్థాయి నిషేధాన్ని విధించడానికి నిరాకరిస్తూ, సోషల్ మీడియా ప్లాట్‌ఫారమ్‌లపై కఠినమైన తల్లిదండ్రుల నియంత్రణలు, లైంగిక దుర్వినియోగ సామగ్రిని తొలగించడం , చైల్డ్ మోడ్ నియంత్రణలు ఉండాలని కోర్టు పిలుపునిచ్చింది. కేవలం చట్టం నిషేధించినంత మాత్రాన పిల్లలు ఇంటర్నెట్ వాడకాన్ని మానుకోరని గమనించాల‌ని పేర్కొంది. ఆన్‌లైన్ బాలల లైంగిక దుర్వినియోగ సామగ్రి నుండి పిల్లలను రక్షించడానికి సుప్రీంకోర్టు ఒక కఠినమైన చట్రాన్ని ప్రతిపాదించింది.