హైదరాబాద్ లో లోరియల్ తొలి బ్యూటీ టెక్ హబ్
ప్రకటించిన సంస్థ చీఫ్ ఎగ్జిక్యూటివ్ ఆఫీసర్
హైదరాబాద్ : ప్రపంచంలోనే తొలి బ్యూటీ టెక్ హబ్ హైదరాబాద్ లో ఏర్పాటు కానుంది. ఈ విషయాన్ని ప్రముఖ బ్యూటీ ఉత్పత్తుల తయారీ సంస్థ లోరియల్ ప్రకటించింది. ఈ విషయాన్ని దావోస్ లో జరుగుతున్న ప్రపంచ ఆర్థిక సదస్సు వేదికగా ప్రకటించారు లోరియల్ సీఈవో నికోలస్ హిరోనిమస్. సీఎం రేవంత్ రెడ్డి నేతృత్వంలోని ప్రతినిధి బృందం తనతో విస్తృతంగా చర్చలు జరిపింది. బ్యూటీ టెక్ హబ్ ను ఏర్పాటు చేయనున్నట్లు ప్రకటించారు. ఇదిలా ఉండగా తెలంగాణ రైజింగ్ ప్రతినిధి బృందం మరో గ్లోబల్ క్యాపబిలిటీ సెంటర్ పెట్టుబడిని సాధించింది, ఈసారి బ్యూటీ-టెక్ రంగంలో నవంబర్ 2026లో హైదరాబాద్లో ప్రారంభం కానున్న లోరియల్ కేంద్రం బ్యూటీ-టెక్ రంగంలో ప్రపంచంలోనే మొట్టమొదటిది కానుండడం విశేషం.
భారీ పెట్టుబడితో హైదరాబాద్లో పెద్ద ఎత్తున బ్యూటీ-టెక్ జీసీసీని ఏర్పాటు చేయడం పట్ల సీఈఓ సంతోషం వ్యక్తం చేశారు. ప్రపంచ ప్రఖ్యాత సౌందర్య సాధనాల కంపెనీకి గ్లోబల్ ఇన్నోవేషన్, టెక్నాలజీ, డేటా , సరఫరా గొలుసు కేంద్రంగా పనిచేస్తుంది. ఈ కొత్త కేంద్రం లోరియల్ డిజిటల్ పరివర్తన, ఏఐ, అనలిటిక్స్ కార్యక్రమాలకు ప్రపంచ వ్యాప్తంగా మద్దతు ఇస్తుంది, తద్వారా గ్లోబల్ ఎంటర్ప్రైజ్ కార్యకలాపాలకు కీలక కేంద్రంగా హైదరాబాద్ పెరుగుతున్న హోదాను బలోపేతం చేస్తుంది. హైదరాబాద్ జీసీసీ నుండి రూపొందించిన టెక్ పరిష్కారాలు ప్రపంచ వ్యాప్తంగా ఉన్న తమ కేంద్రాలకు సరఫరా చేయబడతాయని వెల్లడించారు లోరియల్ సీఈవో.