MLA Jagga Reddy : నా వ‌ద్ద డ‌బ్బులు లేవు – జ‌గ్గా రెడ్డి

కాంగ్రెస్ సీనియ‌ర్ నాయ‌కుడు, సంగారెడ్డి ఎమ్మెల్యే జ‌గ్గా రెడ్డి షాకింగ్ కామెంట్స్ చేశారు. తాను పేదోడిన‌ని, త‌న వ‌ద్ద నయా పైసా లేదంటూ వాపోయాడు. ద‌య‌చేసి రాబోయే అసెంబ్లీ ఎన్నిక‌ల్లో ఏ ఒక్క కార్య‌క‌ర్త పార్టీ కోసం , త‌న కోసం ఖ‌ర్చు చేయొద్దంటూ పార్టీ నేత‌లు, కార్య‌క‌ర్త‌ల‌ను కోరాడు జ‌గ్గా రెడ్డి. ప్ర‌స్తుతం ఆయ‌న చేసిన వ్యాఖ్య‌లు క‌ల‌క‌లం రేపుతున్నాయి.

ఇవాళ జ‌గ్గా రెడ్డి పుట్టిన రోజు. ఈ సంద‌ర్భంగా ఎలాంటి వేడుక‌లు నిర్వ‌హించ వ‌ద్ద‌ని సూచించారు. త‌న కోసం ప్ర‌త్యేకంగా క‌టౌట్లు, ఫ్లెక్సీలు పెట్టొద్దంటూ కోరాడు. తన ఆర్థిక ప‌రిస్థితి దారుణంగా ఉంద‌ని, తాను ఎన్నిక‌ల్లో పోటీ చేసినా ఈసారి ఎలాంటి ఖ‌ర్చు చేయ‌ద‌ల్చు కోవ‌డం లేద‌న్నారు. ద‌య‌చేసి వేడుక‌ల‌కు దూరంగా ఉండాల‌ని ఎమ్మెల్యే జ‌గ్గా రెడ్డి పిలుపునిచ్చారు.

ఇదిలా ఉండ‌గా కాంగ్రెస్ పార్టీలో జ‌గ్గా రెడ్డి ముందు నుంచీ రెబ‌ల్ గా ఉన్నారు. క‌డుపులో ఎలాంటి దాప‌రికం అన్న‌ది లేకుండా మాట్లాడే అతి కొద్ది నాయ‌కుల‌లో జ‌గ్గా రెడ్డి ఒక‌రు. ఆయ‌న‌కు విప‌రీత‌మైన ఫ్యాన్ ఫాలోయింగ్ ఉంది. ఇటీవ‌లే వార్త‌ల్లో నిలుస్తూ వ‌చ్చారు. ఆయ‌న చేసిన ఘాటు వ్యాఖ్య‌లు పార్టీలో ప్ర‌కంప‌న‌లు సృష్టించాయి. ఇటీవ‌లే ఢిల్లీకి వెళ్లారు. ఏఐసీసీ మాజీ చీఫ్ రాహుల్ గాంధీతో భేటీ అయ్యారు.