విమానాశ్రయాలు తెలంగాణ సంస్కృతిని ప్ర‌తిబింబించాలి

హైద‌రాబాద్ : సీఎం ఎ. రేవంత్ రెడ్డి కీల‌క వ్యాఖ్య‌లు చేశారు. ఆదిలాబాద్, వరంగల్ విమానాశ్రయాలు అలాగే ఢిల్లీలోని తెలంగాణ భవన్ తెలంగాణ సంస్కృతికి ప్రతీకలుగా నిలిచేలా ఉండాలని అధికారులను ఆదేశించారు. తెలంగాణ చరిత్ర , సంస్కృతికి నిదర్శనమైన కాకతీయ కళాతోరణం, రామప్ప ఆలయం, పిల్లలమర్రి ఆలయం వంటి వాటితో పాటు శిల్పకళ, వాస్తు కళలను అధ్యయనం చేసి, వాటిని ప్రతిబింబించేలా నిర్మాణాలను చేపట్టాలని ఆయన సూచించారు. డాక్టర్ బి.ఆర్. అంబేద్కర్ రాష్ట్ర సచివాలయంలో ఆదిలాబాద్, వరంగల్ విమానాశ్రయాలు, ఢిల్లీలోని తెలంగాణ భవన్ నిర్మాణాలపై ముఖ్యమంత్రి ఉన్నత స్థాయి సమీక్ష నిర్వహించారు.

ఆదిలాబాద్ , వరంగల్ విమానాశ్రయాల నిర్మాణ ప్రాంతాల్లో విద్యుత్ లైన్ల తరలింపు, కాలువల ప్రవాహ మార్పులు, రోడ్ల మళ్లింపు, బీఎస్ఎన్ఎల్ లైన్లు , తాగునీటి సరఫరా లైన్ల వంటి అంశాల గురించి అధికారులు ముఖ్యమంత్రికి వివరించారు. ఈ విషయాలపై పూర్తి వివరాలు తెలుసుకున్న తర్వాత ముఖ్యమంత్రి అధికారులకు పలు సూచనలు చేశారు. విమానాశ్రయ కాంపౌండ్ గోడల సమీపం నుండి రోడ్లను నిర్మించి, వాటిని సమీపంలోని జిల్లా, రాష్ట్ర , జాతీయ రహదారులకు అనుసంధానించాలని ఆదేశించారు.

ప్రతి శాఖ విడివిడిగా పనులు చేపడితే అనేక ఇబ్బందులు తలెత్తుతాయని ఆయన పేర్కొన్నారు. పనులు ఏకకాలంలో జరిగేలా చూసేందుకు విద్యుత్, రోడ్లు, భవనాలు , తాగునీటి సరఫరా , నీటిపారుదల శాఖల అధికారులు బీఎస్ఎన్ఎల్ అధికారులతో సమావేశమై చర్చించాలని సీఎం సూచించారు. ప్రస్తుత అవసరాలకు మించి భవిష్యత్తు అవసరాలను కూడా పరిగణనలోకి తీసుకుని, సమగ్ర ప్రణాళికను రూపొందించి, తదనుగుణంగా పనులను ముందుకు తీసుకెళ్లాలని ఆదేశించారు. కాలువలు లేదా ఇతర నీటి ప్రవాహాలను మళ్లించాల్సి వస్తే, విమానాశ్రయ ప్రాంగణంలో లేదా సమీపంలో రిజర్వాయర్లను నిర్మించి, అక్కడి నుండి ప్రవాహాలను మళ్లించాలని సూచించారు.

విమానాశ్రయాలకు వెళ్లే మరియు అక్కడి నుండి వచ్చే రోడ్లు వెడల్పుగా ఉండాలన్నారు. సమీపంలోని ప్రధాన రహదారులకు అనుసంధానించబడి ఉండాలని, నిర్ణీత సమయంలో పనులు పూర్తి చేయాలని ఆయన ఆదేశించారు.