డిసెంబర్ లో సాయి దుర్గా తేజ్ కిరణ్‌ల పెళ్లి
10వ తేదీన హైదరాబాద్ లో ఘ‌నంగా కార్య‌క్ర‌మం
హైదరాబాద్ : సాయి దుర్గా తేజ్ , కిరణ్‌లకు చిన్నప్పటి నుండే ఒకరికొకరు తెలుసని సమాచారం. మొదట స్నేహితులుగా ఉన్న వీరి బంధం, కాలక్రమేణా ప్రేమగా మారింది. కుటుంబ సభ్యుల అంగీకారం, ఆశీర్వాదాలతో వీరిద్దరూ వివాహం చేసుకోవాలని నిర్ణయించుకున్నారు. వీరి నిశ్చితార్థం ఇరు కుటుంబాలకు చెందిన సన్నిహితులు, బంధువుల సమక్షంలో అత్యంత ప్రైవేట్‌గా జరిగింది. నిశ్చితార్థం జరిగినప్పటి నుండి సాయి దుర్గా తేజ్ వివాహ తేదీకి సంబంధించి సోషల్ మీడియాలో రకరకాల వార్తలు ప్రచారమయ్యాయి. ఇప్పుడు కుటుంబ సభ్యులు వివాహ తేదీని అధికారికంగా ప్రకటించారు.
సాయి దుర్గా తేజ్ , కిరణ్‌ల వివాహం 2026 డిసెంబర్ 10న హైదరాబాద్‌లో జరగనుంది. ఈ వివాహం అత్యంత వైభవంగా జరగనుంది. ఇందులో మెగా కుటుంబ సభ్యులతో పాటు పలువురు సినీ ప్రముఖులు, రాజకీయ నాయకులు పాల్గొననున్నారు. వివాహ వేడుకలకు సంబంధించిన మరిన్ని చిత్రాలు, తాజా విశేషాల కోసం అభిమానులు ఎంతో ఆసక్తిగా ఎదురు చూస్తున్నారు . నిశ్చితార్థం పూర్తయి వివాహ తేదీ కూడా ఖరారు కావడంతో, మెగా కుటుంబం మరో ప్రత్యేక వేడుకకు సిద్ధమవుతోంది.
తాజాగా మెగా కుటుంబంలో వివాహ వేడుకలు మొదలయ్యాయి. మెగాస్టార్ చిరంజీవి మేనల్లుడు, తెలుగు నటుడు సాయి దుర్గా తేజ్, తన చిరకాల ప్రేయసి కిరణ్‌తో ఇటీవల నిశ్చితార్థం చేసుకున్నారు. ఈ నిశ్చితార్థ వేడుక హైదరాబాద్‌లోని హిల్టన్ హైదరాబాద్ జీనోమ్ వ్యాలీ రిసార్ట్‌లో జరిగింది. ఈ కార్యక్రమానికి కుటుంబ సభ్యులు, సన్నిహితులు హాజరయ్యారు. కొణిదెల, అల్లు కుటుంబాలకు చెందిన పలువురు సభ్యులు ఈ వేడుకల్లో పాల్గొని కాబోయే దంపతులను ఆశీర్వదించారు. మెగాస్టార్ చిరంజీవి, సురేఖ కొణిదెల, రామ్ చరణ్, అల్లు అర్జున్, స్నేహ రెడ్డి, అల్లు బాబీ, నీలా షా, వరుణ్ తేజ్, లావణ్య త్రిపాఠి తదితరులు ఈ వేడుకలో పాల్గొన్నారు.
నిశ్చితార్థ వేడుకకు సంబంధించిన ఫోటోలను రామ్ చరణ్ , ఇతర మెగా కుటుంబ సభ్యులు సోషల్ మీడియాలో పంచుకోవడంతో, ఈ విషయం అభిమానులకు తెలిసింది. అయితే ఆ రోజున సాయి దుర్గా తేజ్ స్వయంగా ఎటువంటి ఫోటోలను పంచుకోలేదు. దీంతో సాయి దుర్గా తేజ్ తన కాబోయే భార్యను ఎప్పుడు పరిచయం చేస్తారా అని మెగా అభిమానులు ఆసక్తిగా ఎదురుచూశారు. కిరణ్‌తో కలిసి ఉన్న ఒక ప్రత్యేక నిశ్చితార్థ ఫోటోను సోషల్ మీడియాలో పంచుకోవడం ద్వారా ఆయన ఆ ఉత్కంఠకు తెరదించారు.
