క‌రువును ప‌ట్టించుకోని క‌ర్ణాట‌క స‌ర్కార్

బెంగ‌ళూరు : కేంద్ర మంత్రి కుమార స్వామి సంచ‌ల‌న వ్యాఖ్య‌లు చేశారు. ఆయ‌న క‌ర్ణాట‌క కాంగ్రెస్ స‌ర్కార్ ను ఏకి పారేశారు. కేంద్రంతో కేవలం నామమాత్రపు సంప్రదింపులే జరుపుతోందంటూ మండిప‌డ్డారు. కేంద్రం నుంచి ఆర్థిక సహాయం కోరినప్పటికీ ముఖ్యమంత్రి డి.కె. శివకుమార్ లేదా ఉప ముఖ్యమంత్రి జి. పరమేశ్వర ఎవరూ కూడా ప్రధాన మంత్రి నరేంద్ర మోదీని, కేంద్ర హోం మంత్రి అమిత్ షాను లేదా సంబంధిత కేంద్ర మంత్రులను కలిసి సహాయం కోరలేదని ఆయన ఆరోపించారు. బెంగళూరులోని విజయానగర్‌లో ఉన్న భారత్ హెవీ ఎలక్ట్రికల్స్ లిమిటెడ్ కర్మాగార ప్రాంగణంలో జరిగిన 71వ కర్ణాటక రాజ్యోత్సవ వేడుకల సందర్భంగా ఆయన మీడియాతో మాట్లాడారు. గత రెండు నెలలుగా రాష్ట్ర ప్రభుత్వం కేవలం కేంద్రానికి లేఖలు రాయడానికే పరిమితమైందని ఫైర్ అయ్యారు. రైతుల కోసం సహాయాన్ని పొందేందుకు ఎటువంటి నిజాయితీ గల ప్రయత్నాలు చేయలేదని కుమారస్వామి విమర్శించారు.

కరువు సహాయం కోసం రాష్ట్ర ప్రభుత్వం మొదట రూ. 3,000 కోట్లు కోరగా ఆ తర్వాత ఆ డిమాండ్‌ను రూ. 26,000 కోట్లకు పెంచిందని ఆరోపించారు కుమార స్వామి. అయితే ప్రధాన మంత్రిని లేదా హోం మంత్రిని స్వయంగా కలిసి రాష్ట్ర అవసరాల గురించి వివరించేందుకు ఎటువంటి గంభీరమైన ప్రయత్నం చేయలేదని ఆయన పేర్కొన్నారు. అఖిలపక్ష ప్రతినిధి బృందాన్ని ఢిల్లీకి తీసుకెళ్లాలనే ప్రభుత్వ ప్రతిపాదనను తప్పుబట్టిన ఆయన, కేంద్రంతో చర్చించేందుకు ఎటువంటి నిజమైన ప్రయత్నం చేయకుండానే ఇలాంటి చర్యలకు పాల్పడుతోందని విమర్శించారు. తన ముఖ్యమంత్రి పదవీకాలాన్ని గుర్తుచేసుకుంటూ రైతులు ఇలాంటి కష్టాల్లో ఉన్నప్పుడు కేంద్రం నుంచి ఆర్థిక సహాయం కోసం ఎదురు చూడకుండా, రాష్ట్ర సొంత పన్ను ఆదాయంతో రూ. 25,000 కోట్ల రైతు రుణాలను మాఫీ చేశానని కుమారస్వామి చెప్పారు. అప్పట్లో తాను స్వయంగా భారత రాష్ట్రపతిని కలిసి, ‘రుణ విముక్తి చట్టం’ అమలుకు ఆమోదం పొందానని ఆయన పేర్కొన్నారు.