దీపికా పదుకొనే కాషాయ రంగు దుస్తులపై వివాదం

ముంబై : షారుఖ్ ఖాన్, దీపికా పదుకొనేల‌ రాబోయే చిత్రం ‘కింగ్’లోని ఒక పాట కారణంగా ఈ చిత్రం కొత్త వివాదంలో చిక్కుకుంది. ‘తూ మిల్ జాయే’ అనే ఈ పాటలో దీపిక ధరించిన కాషాయ రంగు దుస్తులపై బీజేపీ ఎమ్మెల్యే రవీందర్ సింగ్ నేగి తీవ్ర అభ్యంతరం వ్యక్తం చేశారు. ఈ పాట ఇటీవల విడుదలై సోషల్ మీడియాలో సంచలనం సృష్టించింది. చాలా మంది అభిమానులు షారుఖ్ ఖాన్, దీపికల మధ్య విజువల్స్, కెమిస్ట్రీ గురించి చర్చించుకుంటుండగా, ఆమె కాషాయ రంగు దుస్తులు ప్రధాన చర్చనీయాంశంగా మారాయి.

దీపిక దుస్తులపై బీజేపీ ఎమ్మెల్యే రవీందర్ సింగ్ నేగి అభ్యంతరం వ్యక్తం చేస్తూ అది హిందూ మత మనోభావాలను దెబ్బ తీస్తుందని ఆరోపించారు. త‌ను ధ‌రించిన‌ దుస్తుల రంగును మార్చాలని ఆయన చిత్ర నిర్మాతలను డిమాండ్ చేశారు. చిత్ర నిర్మాతలు మార్పులు చేయకపోతే దేశ వ్యాప్తంగా నిరసనలు జరగవచ్చని ఆయన హెచ్చరించారు. ఈ వివాదం చాలా మందికి షారుఖ్ ఖాన్ చిత్రం ‘పఠాన్’లోని ‘బేషరమ్ రంగ్’ పాటను గుర్తు చేసింది. ఆ సమయంలో దీపిక కాషాయ బికినీపై కూడా పలు వర్గాల నుంచి అభ్యంతరాలు వెల్లువెత్తడంతో, నిరసనలు, బహిరంగ చర్చలు జరిగాయి.

ఆసక్తికరంగా, ‘పఠాన్’, ‘కింగ్’ చిత్రాలకు సిద్ధార్థ్ ఆనంద్ దర్శకత్వం వహించారు. ఈ తాజా వివాదం, దీపిక తెరపై ధరించే దుస్తులు, బాలీవుడ్ పాటలలో కాషాయ రంగు వాడకాన్ని మరోసారి బహిరంగ చర్చలోకి తీసుకు వచ్చింది. ఈ తాజా అభ్యంతరాలపై షారుఖ్ ఖాన్ గానీ, దీపికా పడుకోన్ గానీ ఇప్పటి వరకు ఎలాంటి స్పందన వెల్లడించ లేదు. ‘కింగ్’ చిత్రంలో కూడా భారీ తారాగణం ఉంది . ఇది 2026 డిసెంబర్ 24న థియేటర్లలో విడుదల కానుంది.