30న బెజవాడలో 24,057 ఇళ్ల పట్టాలు పంపిణీ
పేదలకు పట్టాభిషేకం కార్యక్రమంలో సీఎం
విజయవాడ : ఏపీ కూటమి ప్రభుత్వం ప్రతి ఒక్కరికీ ఇల్లు ఉండాలని సంకల్పించిందని , ఆ దిశగా ప్రయత్నం చేస్తోందని చెప్పారు సీఎం నారా చంద్రబాబు నాయుడు. సెప్టెంబర్30వ తేదీన విజయవాడలో 24,057 కుటుంబాలకు ఇంటి స్థల పట్టాలను అందచేయనున్నారు. ‘పేదలకు పట్టాభిషేకం’ కార్యక్రమాన్ని ప్రభుత్వం కొత్తగా తీసుకు వచ్చింది. దీని ద్వారా పేదలకు ఇళ్లు, పట్టాలు పంపిణీ చేయడం లక్ష్యంగా పెట్టుకుంది. ఏ ఒక్కరూ ఇల్లు లేదని అనకూడదని , దీని ద్వారా వారికి సమాజంలో కూడా గౌరవం కూడా దక్కుతుందని ఇప్పటికే ప్రకటించారు సీఎం. ఇదిలా ఉండగా విజయవాడలోని మూడు అసెంబ్లీ నియోజకవర్గాల పరిధిలోని కొండ ప్రాంతాల నివాసితులకు దశాబ్దాలుగా ఉన్న సమస్యకు శాశ్వత పరిష్కారం చూపేలా చర్యలు తీసుకున్నామని చెప్పారు.
దీనివల్ల ఎన్టీఆర్ హయాంలో జారీ చేసిన పాత ఇంటి స్థల పట్టాల పరిధిలోని ఆస్తులపై వారికి పూర్తి యాజమాన్య హక్కులు లభిస్తాయి. పాత ఎన్టీఆర్ ఇంటి స్థల పట్టాల పరిధిలోని భూముల్లో నిర్మించిన ఇళ్లను ప్రభుత్వం క్రమబద్ధీకరించి, లబ్ధిదారులకు వారి ఆస్తులపై చట్టపరమైన యాజమాన్య హక్కులను కల్పిస్తుంది. విశాఖపట్నంలో ₹8,874 కోట్ల విలువైన భూములకు సంబంధించి 28,445 కుటుంబాలకు క్రమబద్ధీకరణ పట్టాలను ముఖ్యమంత్రి ఇటీవల పంపిణీ చేసిన నేపథ్యంలో ఈ చర్య చేపట్టారు. విజయవాడలో 617 ఎకరాల (సుమారు 29.86 లక్షల చదరపు గజాలు) భూమి క్రమబద్ధీకరణ పరిధిలోకి వస్తుంది. ఈ కార్యక్రమం కోసం క్రమబద్ధీకరిస్తున్న భూమి విలువ సుమారు ₹9,800 కోట్లు ఉంటుందని అంచనా వేయగా, దాని మార్కెట్ విలువ సుమారు ₹24,297 కోట్లుగా ఉంది.
ఒక్కో లబ్ధిదారు కుటుంబానికి సుమారు ₹40–45 లక్షల విలువైన ఆస్తి లభించే అవకాశం ఉంది. ఎన్టీఆర్ , కృష్ణా జిల్లాల్లోని ఎనిమిది అసెంబ్లీ నియోజకవర్గాలు , 15 మండలాల పరిధిలోని కుటుంబాలకు ఈ పట్టాలు ప్రయోజనం చేకూరుస్తాయి. విజయవాడ తూర్పు, పడమర మరియు మధ్య నియోజకవర్గాల పరిధిలోని కొండ ప్రాంతాలలో నిర్మించుకున్న ఇళ్లలో నివసిస్తున్న అనేక మందికి ఈ ప్రయోజనం చేకూరనుంది. చట్టపరమైన యాజమాన్య హక్కులు లభిస్తే తమ ఇళ్లకు భద్రతతో పాటు ఆస్తిపై స్పష్టమైన హక్కు లభిస్తుందని భావిస్తూ, ఈ ప్రాంతాల నివాసితులు దశాబ్దాలుగా తమ ఇళ్ల స్థలాల క్రమబద్ధీకరణ కోసం కోరుతున్నారు.