25 మీటర్ల పిస్టల్ విభాగంలో ఈషా సింగ్ కు రజతం
సత్తా చాటిన భారతీయ మహిళా షూటర్
జపాన్ : ఆసియా క్రీడా పోటీలలో భారత దేశానికి చెందిన క్రీడాకారులు సత్తా చాటుతున్నారు. తాజాగా మహిళల 25 మీటర్ల పిస్టల్ విభాగంలో భారత్కు చెందిన ఈషాకు రజతం దక్కింది. హైదరాబాద్కు చెందిన ఈషా సింగ్ రజత పతక పోటీలో నిలిచేందుకు మూడు ‘షూట్-ఆఫ్’లలో విజయం సాధించింది. ఆ తర్వాత చైనాకు చెందిన జియావో జియారుయిక్సు వాన్తో జరిగిన స్వర్ణ పతక పోరులో మరో రెండు షూట్-ఆఫ్ రౌండ్లలో పాల్గొంది. జపాన్లోని నగోయాలో జరుగుతున్న 20వ ఆసియా క్రీడలలో ఈ పోటీ జరిగింది. ఆమె వరుసగా ఐదు షూట్-ఆఫ్ రౌండ్లలో పోరాడింది, చివరకు కేవలం ఒక షాట్ తేడాతో స్వర్ణ పతకాన్ని కోల్పోయింది. ప్రపంచ నంబర్ వన్ ర్యాంక్లో ఉన్న 21 ఏళ్ల ఈషా సింగ్ రజత పతక పోటీలో నిలిచేందుకు మూడు షూట్-ఆఫ్ రౌండ్లలో గెలిచింది, ఆపై చైనాకు చెందిన జియావో జియారుయిక్సువాన్తో స్వర్ణ పతక పోరులో మరో రెండు రౌండ్లలో తలపడింది.
నిర్ణీత సిరీస్ ముగిసే సమయానికి ఇద్దరూ 38 పాయింట్ల వద్ద సమానంగా నిలిచారు, కానీ చివరి షాట్లో ఈషా సింగ్ తడబడటంతో రెండో స్థానానికి పరిమితం కావాల్సి వచ్చింది. ఈషాతో జరిగిన షూట్-ఆఫ్లో ఓడిపోయిన ఉత్తర కొరియాకు చెందిన కిమ్ హ్యోన్ సుక్ 34 పాయింట్లతో కాంస్య పతకాన్ని దక్కించుకుంది. అంతకు ముందు, రెండుసార్లు ఒలింపిక్ పతకం సాధించిన మను భాకర్ ఈ ఈవెంట్ ఫైనల్కు అర్హత సాధించలేక పతకం లేకుండానే క్రీడల నుండి నిష్క్రమించింది. అయితే ఈషా ఎనిమిదవ స్థానంతో ఫైనల్ పోరుకు అర్హత సాధించి భారత్ ఆశలను సజీవంగా ఉంచింది. మను 579 పాయింట్లు మాత్రమే సాధించ గలిగింది, ఇది ఆమెను ఫైనల్కు చేర్చడానికి సరిపోలేదు.
ఆమె 11వ స్థానంతో సరిపెట్టుకుంది. అర్హత రౌండ్లో ఈషా 580 పాయింట్లు సాధించింది. అంతకు ముందు జరిగిన మహిళల 10 మీటర్ల ఎయిర్ పిస్టల్ ఈవెంట్లో పతకం సాధించడంలో విఫలమైన మనుకు, ఈ బహుళ-క్రీడల పోటీల పర్యాయం అత్యంత నిరాశా జనకంగా మిగిలి పోయింది. మహిళల 25 మీటర్ల పిస్టల్ టీమ్ ఈవెంట్లో కూడా భారత్ పతక రేసులో నిలిచినప్పటికీ, కీలక దశలో రాహి సర్నోబత్ ఒక షాట్ మిస్ చేయడం భారీ మూల్యాన్ని చెల్లించేలా చేసింది.