వాణిజ్య దౌత్యంలో పీయూష్ గోయల్ చురుకైన పాత్ర

మిల్వాకీ : కేంద్ర వాణిజ్య శాఖ మంత్రి పీయూష్ గోయ‌ల్ వాణిజ్య దౌత్యంలో కీల‌క పాత్ర పోషిస్తున్నారు. ఇది ఇండియాకు మేలు చేకూర్చేలా చేస్తోంది. మిల్వాకీలో జరిగిన G20 వాణిజ్య మంత్రుల సమావేశం వేదికగా ప్రధాన ఆర్థిక వ్యవస్థలు ద్వైపాక్షిక వాణిజ్యం , పెట్టుబడుల ప్రాధాన్యతలపై దృష్టి సారించాయి. ఈ క్రమంలో కేంద్ర వాణిజ్య, పరిశ్రమల శాఖ మంత్రి బ్రెజిల్, పోలాండ్ దేశాల సీనియర్ మంత్రులతో చర్చలు జరిపి భారతదేశ వాణిజ్య దౌత్యాన్ని మరింత బలోపేతం చేశారు. ఈ సమావేశాల సందర్భంగా గోయల్ బ్రెజిల్ విదేశాంగ మంత్రి మౌరో వీరా , అభివృద్ధి, పరిశ్రమ, వాణిజ్యం , సేవల శాఖ మంత్రి మార్సియో ఎలియాస్ రోసాలతో సమావేశమయ్యారు. బ్రెజిల్ ప్రతినిధి బృందానికి ఇది అత్యంత రద్దీగా ఉండే వాణిజ్య దౌత్య దినం. వీరా , ఎలియాస్ రోసా అమెరికా వాణిజ్య ప్రతినిధి జేమిసన్ గ్రీర్‌తో కూడా చర్చలు జరిపారు.

సమావేశంపై బ్రెజిల్ వెల్లడించిన వివరాల ప్రకారం సాధ్యమయ్యే వాణిజ్య ఒప్పందంపై చర్చించడానికి ఒక ‘వర్కింగ్ గ్రూప్’ ను ఏర్పాటు చేయడానికి బ్రెజిల్ , అమెరికా అంగీకరించాయి. వాషింగ్టన్ , బ్రెసీలియా మధ్య సుంకాల విషయంలో భిన్నాభిప్రాయాలు ఉన్నప్పటికీ గ్రీర్‌తో సుమారు 40 నిమిషాల పాటు ఈ చర్చలు జరిగాయి. చర్చల తదుపరి దశలను వేగవంతం చేయాలని ఇరు పక్షాలు కోరుకుంటున్నాయని, కొత్త వర్కింగ్ గ్రూప్ పరిధిని అమెరికా ప్రతిపాదించే అవకాశం ఉందని బ్రెజిల్ అధికారులు తెలిపారు. భారతదేశంలో అవకాశాలను పరిశీలించాల్సిందిగా అమెరికన్ తయారీదారులను పీయూష్ గోయల్ ఆహ్వానించారు. గోయల్ ప్రత్యేకంగా పోలాండ్ ఆర్థిక , వాణిజ్య శాఖ మంత్రి ఆండ్రెజ్ డొమాన్‌స్కీతో సమావేశమయ్యారు; భారతదేశం-యూరోపియన్ యూనియన్ మధ్య ప్రతిపాదిత స్వేచ్ఛా వాణిజ్య ఒప్పందం ద్వారా లభించే అవకాశాలతో సహా, ఇరు దేశాల మధ్య వాణిజ్యం , పెట్టుబడులను విస్తరించడంపై ప్ర‌ధానంగా చర్చించారు.