ప్ర‌జా స‌మ‌స్య‌ల‌కు ప‌రిష్కార వేదిక ‘సత్యాగ్రహ పోర్ట‌ల్’
ఘ‌నంగా ప్రారంభించిన అమేథీ ఎంపీ రాహుల్ గాంధీ
మ‌ధ్య‌ప్ర‌దేశ్ : నిత్యం స‌మ‌స్య‌ల‌తో ఉక్కిరి బిక్కిరి అవుతున్న ప్రజలకు చైత‌న్య‌వంత‌మైన వేదిక‌గా సత్యాగ్రహ పోర్ట‌ల్ మార‌నుంద‌ని పేర్కొన్నారు కాంగ్రెస్ అగ్ర నేత , ఎంపీ రాహుల్ గాంధీ. శ‌నివారం రాహుల్ గాంధీ ‘సత్యాగ్రహ’ పోర్టల్‌ను ప్రారంభించారు. తమ నిరసనలను నమోదు చేయాలని ప్రజలకు పిలుపునిచ్చారు. మధ్యప్రదేశ్‌లోని బాలాఘాట్ జిల్లాలో పోషకాహార లోపం, వ్యాధుల బారిన పడిన గిరిజన కుటుంబాలతో లోక్‌సభలో ప్రతిపక్ష నాయకుడు రాహుల్ గాంధీ ముచ్చటించారు. మలేరియా, తట్టు , పోషకాహార లోపం వంటి ఆరోగ్య సమస్యల కారణంగా పిల్లలను కోల్పోయిన కుటుంబాలను పరామర్శించడానికి ఆయన ఆ ప్రాంతాన్ని సందర్శించారు, అలాగే వారి సమస్యలను జాతీయ స్థాయిలో లేవనెత్తుతానని వారికి హామీ ఇచ్చారు. దేశ వ్యాప్తంగా జరుగుతున్న వివిధ సమస్యల ఆధారిత నిరసనలను ఏకం చేసే లక్ష్యంతో ‘సత్యాగ్రహ’ డిజిటల్ ప్లాట్‌ఫారమ్‌ను ప్రారంభించిన‌ట్లు తెలిపారు ఎంపీ.
సత్యాన్ని అణచి వేస్తున్నారని తీవ్ర ఆవేద‌న వ్య‌క్తం చేశారు రాహుల్ గాంధీ. అలా జరగకుండా చూడటం తన బాధ్యత అని పేర్కొన్నారు. సత్యం అణచి వేయబడుతున్న చోట ప్రజలకు సహాయం అందేలా చూసేందుకు మహాత్మా గాంధీ 152వ జయంతి మరుసటి రోజున ఆయన ఈ ‘సత్యాగ్రహ’ ప్లాట్‌ఫారమ్‌ను ప్రారంభించారు. ఇందులో తమ నిరసనలను నమోదు చేయాలని ప్రజలను కోరారు. దేశ వ్యాప్తంగా ప్రజలు తమ హక్కుల కోసం పోరాడుతున్నారని, అయితే తరచుగా ఒంటరిగానే పోరాడుతున్నారని పేర్కొన్నారు ఎంపీ. . జెన్ జీ , విద్యార్థులు, రైతులు, ఆదివాసీలు, దళితులు, మహిళలు ఇలా ప్రతి పోరాటానికి ఒక ప్రత్యేక కథనం ఉందన్నారు. కానీ ఒంటరి గళాన్ని అణచి వేయడం సులభం. ‘సత్యాగ్రహ’ అనేది ఆ గళాలన్నింటినీ ఒకే వేదికపైకి తీసుకు వచ్చే ఒక ప్రయత్నం అని పేర్కొన్నారు. సత్యమే మన గొప్ప ఆయుధమని బాపూజీ మనకు బోధించారు. కానీ సత్యం పక్షాన నిలబడటం అంతకంటే గొప్ప ఆయుధం అని అన్నారు.