విద్య తోనే వికాసం పురోభివృద్దికి సోపానం : ఈవో

తిరుప‌తి : విద్య తోనే వికాసం క‌లుగుతుంద‌ని స్ప‌ష్టం చేశారు టీటీడీ ఈవో ముద్దాడ ర‌విచంద్ర‌. అర్థవంతమైన, ప్రయోజనకరమైన, ఆనంద దాయకమైన విద్యను అభ్యసించి ఉన్నత స్థాయికి ఎదగాలని ఆకాంక్షించారు. టిటిడి విద్యాసంస్థల్లో విద్యను అభ్యసించే విద్యార్థులు క్రమశిక్షణ, పట్టుదలతో చదువుకుని, తమ వ్యక్తిగత అభివృద్ధితో పాటు సంస్థ పేరు ప్రతిష్టలను మరింత ఇనుమడింప జేయాలని సూచించారు. తిరుపతిలోని శ్రీ పద్మావతీ మహిళా జూనియర్ కళాశాలలో నిర్వహించిన విద్యార్థి సంఘం (స్టూడెంట్స్ కౌన్సిల్) ప్రారంభోత్సవానికి ఆయన ముఖ్య అతిథిగా హాజరయ్యారు. ఈ సందర్భంగా విద్యార్థినులను ఉద్దేశించి ఈవో ప్రసంగించారు.
ఇంటర్మీడియట్ రెండేళ్లతో పాటు ఆపై మూడేళ్లు కలిపి మొత్తం ఐదేళ్లపాటు కష్టపడి చదివితే విద్యార్థులు తమ లక్ష్యాలను సాధించి ఉన్నత స్థాయికి చేరుకోవచ్చని ఈవో తెలిపారు. కళాశాల స్థాయి నుంచే విద్యార్థినులు నాయకత్వ లక్షణాలను అలవర్చు కోవాలని, వ్యక్తిత్వ వికాసంపై దృష్టి సారించాలని సూచించారు. ముఖ్యంగా గ్రామీణ ప్రాంతాల నుంచి వచ్చిన విద్యార్థినులు తమకు లభిస్తున్న అవకాశాలను సద్వినియోగం చేసుకుని జీవితంలో అద్భుత విజయాలు సాధించాలని ఆకాంక్షించారు.
పోటీ పరీక్షల్లో ఎదురయ్యే సవాళ్లు, వాటిని అధిగమించేందుకు తాను అనుసరించిన విధానాలను తన అనుభవాలను విద్యార్థినులతో ఈవో పంచుకున్నారు. శ్రీవారి నిధులతో విద్యనభ్యసిస్తున్న విద్యార్థినులు ప్రతి రూపాయిని సద్వినియోగం చేసుకుని ఉన్నత స్థాయికి ఎదగాలని కోరారు

టిటిడిలో విద్య, వైద్య రంగాల్లో మరింత సమర్థవంతంగా, నాణ్యమైన సేవలు అందించాలని ముఖ్యమంత్రి నారా చంద్రబాబు నాయుడు ఆదేశించారని, ఆ దిశగా చర్యలు చేపడుతున్నట్లు చెప్పారు.టిటిడి విద్యాసంస్థల్లో మౌలిక సదుపాయాలను మరింత మెరుగు పరిచి, ఉన్నత ప్రమాణాలతో విద్యా సేవలు అందించేలా చర్యలు తీసుకోవాలని సూచించారు. ఢిల్లీలోని శ్రీ వేంకటేశ్వర కళాశాల టాప్-10 కళాశాలల్లో స్థానం పొందే స్థాయికి ఎదిగిందని, అదే విధంగా టిటిడి ఆధ్వర్యంలోని అన్ని విద్యాసంస్థలు ఉన్నత ప్రమాణాలు సాధించేలా కృషి చేయాలని అన్నారు.శ్రీ పద్మావతీ మహిళా జూనియర్ కళాశాలలో ప్రవేశం కోసం ప్రస్తుతం సుమారు 1:30 నిష్పత్తిలో పోటీ ఉందని పేర్కొన్న ఈవో, వచ్చే విద్యా సంవత్సరంలో వంద శాతం ఉత్తీర్ణత సాధించే దిశగా అధ్యాపకులు, విద్యార్థినులు కృషి చేయాలని కోరారు. వివిధ సబ్జెక్టుల్లో వంద శాతం ఫలితాలు సాధించేందుకు కృషి చేసిన అధ్యాపకులను ఈ సందర్భంగా ఈవో సత్కరించారు. విద్యతో పాటు క్రీడలు, సాంస్కృతిక కార్యక్రమాలు, ఇతర అన్ని రంగాల్లోనూ విద్యార్థినులు రాణించాలని సూచించారు.