పెట్టుబ‌డుల‌కు స్వ‌ర్గ‌ధామం తెలంగాణ : సీఎం
కీల‌క ప్ర‌క‌ట‌న చేసిన ఎ. రేవంత్ రెడ్డి
హైద‌రాబాద్ : పెట్టుబ‌డుల‌కు తెలంగాణ రాష్ట్రం స్వ‌ర్గ‌ధామంగా ఉందని అన్నారు సీఎం ఎ. రేవంత్ రెడ్డి. తెలంగాణ పెట్టుబడులు, ఆవిష్కరణలు, పారిశ్రామిక వృద్ధికి ప్రపంచ కేంద్రంగా ఆవిర్భవించడానికి సిద్ధంగా ఉందని చెప్పారు. .ప్రపంచ స్థాయి మౌలిక సదుపాయాలు, నైపుణ్యం కలిగిన శ్రామిక శక్తి, సంస్థలు వృద్ధి చెందడానికి వీలు కల్పించే వ్యాపార వాతావరణంతో మన రాష్ట్రాన్ని భవిష్యత్తుకు సిద్ధంగా నిర్మించి, మన ప్రజలకు శాశ్వత శ్రేయస్సును అందించాలన్నదే మా నిబద్ధత అని స్పష్టం చేశారు.
#ఇన్వెస్ట్ తెలంగాణ గ్లోబల్ సమ్మిట్ ప్రారంభోత్సవంలో కేంద్ర వాణిజ్య, పరిశ్రమల శాఖ మంత్రి పీయూష్ గోయల్ తో పాటు పరిశ్రమల నాయకులు, పెట్టుబడిదారులకు స్వాగతం పలుకుతున్నాన‌ని తెలిపారు సీఎం. ప్రతి పెట్టుబడిదారునికి నా హామీ స్పష్టం చేస్తున్న‌ట్లు చెప్పారు: తెలంగాణ ప్ర‌భుత్వం మీ పెట్టుబడికి అండగా నిలుస్తుందని అన్నారు. స్థిరమైన, సహాయక విధాన వాతావరణాన్ని అందిస్తుంది, అవకాశాలను శాశ్వత విజయాలుగా మార్చడానికి మీతో కలిసి పని చేస్తుందని పేర్కొన్నారు.
డిసెంబర్ 7, 8, 9 తేదీలలో హైదరాబాద్‌లోని భారత్ ఫ్యూచర్ సిటీలో జరగనున్న ఇన్వెస్ట్ తెలంగాణ గ్లోబల్ సమ్మిట్‌లో మాతో చేరాల్సిందిగా ప్రపంచ వ్యాప్తంగా ఉన్న పారిశ్రామికవేత్తలు, పెట్టుబడిదారులను ఆహ్వానిస్తున్నట్లు తెలిపారు. తెలంగాణ వృద్ధిలో తదుపరి అధ్యాయానికి సిద్ధంగా ఉందని పేర్కొన్నారు.. అవకాశాలను సృష్టిస్తూ, ఆవిష్కరణలను ప్రోత్సహిస్తూ, ఉమ్మడి శ్రేయస్సుతో కూడిన భవిష్యత్తును తీర్చిదిద్దుతూ మనమందరం కలిసి దీనిని నిర్మిద్దాం అని పిలుపునిచ్చారు రేవంత్ రెడ్డి.