వాషింగ్టన్: ప్రముఖ అంతరిక్ష ప్రయోగాల సంస్థ యునైటెడ్ లాంచ్ అలయన్స్ (యూఎల్ఏ)కు భారీ ఎదురు దెబ్బ తగిలింది. అమెజాన్కు చెందిన 40 లియో బ్రాడ్బ్యాండ్ శాటిలైట్లను అంతరిక్షంలోకి తీసుకెళ్తున్న వల్కన్ రాకెట్ ప్రయోగం విఫలమైంది. రెండు దశాబ్దాల సంస్థ చరిత్రలో ఇది తొలి సంపూర్ణ ప్రయోగ వైఫల్యం కావడం గమనార్హం. ఫ్లోరిడాలోని కేప్ కెనవెరల్ స్పేస్ ఫోర్స్ స్టేషన్ నుంచి ఆదివారం మధ్యాహ్నం 12:40 గంటలకు (భారత కాలమానం ప్రకారం 1740 జీఎంటీ) ఈ రాకెట్ నింగిలోకి దూసుకెళ్లింది అయితే.. ప్రయోగం మొదలైన 10 నిమిషాల తర్వాత రాకెట్లో సాంకేతిక సమస్య (అనామలీ) తలెత్తినట్లు యూఎల్ఏ ఒక ప్రకటనలో ధ్రువీకరించింది.
దీనివల్ల అమెజాన్ శాటిలైట్లను నిర్దేశిత కక్ష్యలో ప్రవేశపెట్టలేక పోయామని తెలిపింది. వైఫల్యానికి గల కచ్చితమైన కారణాలపై ఇప్పుడే స్పష్టత ఇవ్వలేమని, అమెజాన్తో కలిసి పూర్తిస్థాయిలో దర్యాప్తు చేసి, వీలైనంత త్వరగా మళ్లీ ప్రయోగాలకు సిద్ధమవుతామని పేర్కొంది. వల్కన్ లియో 1గా పిలిచే ఈ మిషన్ అమెజాన్ తలపెట్టిన లియో శాటిలైట్ ఇంటర్నెట్ కాన్స్టలేషన్ (గతంలో ప్రాజెక్ట్ కైపర్) కోసం యూఎల్ఏతో కుదుర్చుకున్న 38 ప్రయోగాల్లో మొదటిది. ఒకే ప్రయోగంలో అత్యధికంగా 40 అమెజాన్ ఉపగ్రహాలను పంపడం కూడా ఇదే తొలిసారి.
అయితే.. ఈ వైఫల్యంపై అమెజాన్ లియో స్పందించింది. ప్రయోగాల్లో, ముఖ్యంగా తొలి మిషన్లలో రిస్క్ సహజమేనని పేర్కొంది. ఈ అనుభవం నుంచి యూఎల్ఏ పాఠాలు నేర్చుకుని, భవిష్యత్ ప్రణాళికలను విజయవంతంగా పూర్తి చేస్తుందని విశ్వాసం వ్యక్తం చేసింది. గతంలో సాలిడ్ రాకెట్ బూస్టర్ల సమస్య కారణంగా ఈ ప్రయోగం తొమ్మిది నెలలు వాయిదా పడింది. అయితే ఈసారి ఆ బూస్టర్లు సరిగ్గానే పనిచేసినా, రాకెట్ పైభాగంలో (అప్పర్ స్టేజ్) సమస్య తలెత్తినట్లు ప్రాథమిక అంచనాలు వెలువడుతున్నాయి.