అమరావతి : అక్వాన్ తుఫాను ఒడిశా తీరం సమీపంలో తీరాన్ని దాటింది. దీంతో ఆంధ్రప్రదేశ్లోని కొన్ని ప్రాంతాలకు భారీ వర్షాలు , బలమైన గాలులను తీసుకు వస్తోంది. రాష్ట్ర వాతావరణ సంస్థ ఎండీ, సీఈఓ ప్రఖర్ జైన్ ఈ సందర్బంగా కీలక సూచనలు చేశారు. తుఫాను బాహ్య వర్షపు మేఘాలు ఇప్పటికే ఉత్తర ఆంధ్రప్రదేశ్ , దక్షిణ ఒడిశా తీరాలను చేరుకున్నాయని తెలిపారు. శుక్రవారం ఉదయం ఒడిశాలోని గోపాల్పూర్ సమీపంలో తీరాన్ని పూర్తిగా దాటిందని పేర్కొన్నారు. ఆంధ్రప్రదేశ్ రాష్ట్ర విపత్తు నిర్వహణ అథారిటీ ప్రకారం తుఫాను గంటకు సుమారు 21 కిలోమీటర్ల వేగంతో కదులుతోంది. ఇది కళింగపట్నం నుండి సుమారు 110 కిలోమీటర్లు, విశాఖపట్నం నుండి 170 కిలోమీటర్లు , గోపాల్పూర్ నుండి 170 కిలోమీటర్ల దూరంలో ఉందని వెల్లడించారు ఎండీ.
ఈ తుఫాను ఉత్తర కోస్తా ఆంధ్రప్రదేశ్లోని పలు ప్రాంతాలకు భారీ వర్షాలను తీసుకు వస్తోంది. శ్రీకాకుళం జిల్లాలో ముఖ్యంగా భారీ వర్షం కురిసే అవకాశం ఉండగా, ఇతర ఉత్తర ఆంధ్ర జిల్లాల్లో తేలికపాటి నుండి మోస్తరు వర్షపాతం నమోదయ్యే అవకాశం ఉంది. లోతట్టు ప్రాంతాల్లో నివసించే ప్రజలు అప్రమత్తంగా ఉండాలని, అవసరమైన జాగ్రత్తలు తీసుకోవాలని సూచించారు ప్రఖర్ జైన్. శ్రీకాకుళంలోని పలు ప్రాంతాల్లో ఇప్పటికే గణనీయమైన వర్షపాతం నమోదైంది. ఇచ్ఛాపురంలో 16 సెం.మీ., కంచిలి, కవిటిలో చెరో 10 సెం.మీ. వర్షం కురిసింది. పలాసలో 9.9 సెం.మీ., సోంపేటలో 9.2 సెం.మీ., వజ్రపుకొట్టూరులో 4.9 సెం.మీ. వర్షపాతం నమోదైంది.
తుఫాను ప్రభావంతో తెలంగాణలోని కొన్ని ప్రాంతాల్లో చెదురు మదురుగా వర్షాలు కురిసే అవకాశం ఉందని, ముఖ్యంగా తూర్పు జిల్లాల్లోని కొన్ని ప్రాంతాల్లో తేలికపాటి నుంచి మోస్తరు వర్షాలు కురుస్తాయని వాతావరణ శాఖ అంచనా వేసింది. ఉరుములు, గాలుల సమయంలో చెట్లు, విద్యుత్ స్తంభాలు, హోర్డింగ్లకు దూరంగా ఉండాలని ప్రజలకు సూచించారు ఎండీ .అధికారులు పరిస్థితిని నిశితంగా పర్యవేక్షిస్తున్నారు. ప్రభావిత తీర ప్రాంతాల్లోని ప్రజలు అధికారిక వాతావరణ సమాచారాన్ని అనుసరించాలని కోరారు. పరిస్థితులు మెరుగు పడే వరకు మత్స్యకారులు సముద్రానికి దూరంగా ఉండాలని సూచించారు.
