తన బాడీ లాంగ్వేజ్ పై సీఎం విజయ్ కామెంట్స్
ఎవరి మనో భావాలను తాను కించపర్చ లేదు
చెన్నై : తమిళనాడు సీఎం జోసెఫ్ విజయ్ చంద్రశేఖర్ కీలక వ్యాఖ్యలు చేశారు. గత కొన్ని రోజులుగా తన బాడీ లాంగ్వేజ్ పై విపక్షాలు పనిగట్టుకుని విమర్శలు చేస్తుండడాన్ని తీవ్రంగా తప్పు పట్టారు. ఇవాళ ఆయన శాసన సభ సాక్షిగా అభ్యంతరం తెలిపారు. దీనిపై క్లారిటీ ఇచ్చే ప్రయత్నం చేశారు. తన హావభావాలను ఎవరి మనోభావాలనైనా దెబ్బతీసే ఉద్దేశంతో చేసిన చర్యగా భావించవద్దని విజయ్ ప్రజలను కోరారు. అసెంబ్లీలో పోలీసు , అగ్నిమాపక శాఖల నిధుల కేటాయింపుపై చర్చ సందర్భంగా తాను ప్రదర్శించిన బాడీ లాంగ్వేజ్ (శరీర కదలికలు)పై వచ్చిన విమర్శలకు ముఖ్యమంత్రి స్పష్టతనిచ్చారు. కొందరు అభ్యంతరకరంగా భావించిన ఆ చర్య ఉద్దేశ పూర్వకంగా చేసింది కాదని, పొరపాటున లేదా అనుకోకుండా జరిగిందని ఆయన పేర్కొన్నారు.
ఎవరినీ బాధపెట్టాలనే ఉద్దేశం తనకు లేదని ఆయన స్పష్టం చేశారు. తన హావభావాలను వ్యక్తిగత స్థాయిలో ఎవరి మనోభావాలనైనా దెబ్బతీసే చర్యగా అర్థం చేసుకోవద్దని ప్రజలను కోరారు. అసెంబ్లీలో ప్రసంగిస్తున్నప్పుడు విజయ్ తన చేతిని దవడపై ఉంచారు. అత్యవసర పరిస్థితి (ఎమర్జెన్సీ) సమయంలో జైలులో ఉన్నప్పుడు మాజీ ముఖ్యమంత్రి, డీఎంకె అధినేత ఎం.కె. స్టాలిన్కు దవడకు గాయమైంది. విజయ్ చర్య ఆ గాయాన్ని ఎగతాళి చేసేలా ఉందని విమర్శలు వచ్చాయి. విమర్శకులు దీనిని ‘బాడీ షేమింగ్’ (శారీరక వైకల్యాన్ని లేదా రూపాన్ని ఎగతాళి చేయడం)గా అభివర్ణించారు. డీఎంకెతో పాటు టీవీకే ప్రభుత్వానికి మద్దతు ఇస్తున్న సీపీఎం వంటి రాజకీయ పార్టీలు కూడా దీనిని తీవ్రంగా తప్పుబట్టాయి. దీనికి నిరసనగా సభలోని డీఎంకె సభ్యులు స్పీకర్ జె.సి.డి. ప్రభాకర్ పోడియంను చుట్టుముట్టారు. సోషల్ మీడియాలో కూడా ఆ వ్యాఖ్య , హావభావాలు అభ్యంతరకరంగా ఉన్నాయని నెటిజన్లు అభిప్రాయపడ్డారు.