ఓటీటీలో 17.5 మిలియన్ల వ్యూస్ తో ప్రభాస్ రికార్డ్
ఊహించని రీతిలో ది రాజా సాబ్ కు ఆదరణ
హైదరాబాద్ : దర్శకుడు మారుతి దర్శకత్వం వహించిన చిత్రం ది రాజా సాబ్ థియేటర్లలో తేలి పోయినా ఓటీటీలో మాత్రం దుమ్ము రేపింది. పాన్ ఇండియా హీరోగా గుర్తింపు పొందిన ప్రభాస్ ఇందులో కీ రోల్ పోషించాడు. బాక్సాఫీస్ వద్ద ఆశించిన స్థాయిలో ఆడక పోయినప్పటికీ ప్రభాస్ నటించిన ‘ది రాజా సాబ్’ డిజిటల్ వేదికలపై భారీ విజయాన్ని సాధించింది. ఈ పాన్-ఇండియా హారర్ ఫాంటసీ చిత్రం ఓటీటీ ప్రేక్షకులను విశేషంగా ఆకట్టుకుంది, థియేటర్ వసూళ్లకు మించి దీనికున్న ఆదరణను ఇది నిరూపించింది. ఓర్మాక్స్ మీడియా స్ట్రీమ్ వ్యూ హాఫ్-ఇయర్లీ రిపోర్ట్ 2026 ప్రకారం ది రాజా సాబ్ ఓటీటీలో అత్యధికంగా వీక్షించబడిన భారతీయ చిత్రంగా నిలిచింది. ఈ చిత్రాన్ని జియో హాట్ స్టార్ స్ట్రీమింగ్ చేసింది. ఏకంగా 17.5 మిలియన్ల వ్యూస్ను నమోదు చేసింది. ఈ కాలంలో స్ట్రీమింగ్ ప్లాట్ఫారమ్లలో విడుదలైన భారతీయ చిత్రాలలో ఇది మొదటి స్థానంలో నిలిచి, ప్రభాస్కు దేశవ్యాప్తంగా ఉన్న అపారమైన ఆదరణను మరోసారి చాటిచెప్పింది.
ఆసక్తికరమైన విషయం ఏమిటంటే పీపుల్ మీడియా ఫ్యాక్టరీ నిర్మించిన చిత్రాలు డిజిటల్ రంగంలో ఆధిపత్యం వహించడం ఇదే మొదటిసారి కాదు. గత ఏడాది ఓర్మాక్స్ నివేదికలో కూడా, అత్యధికంగా వీక్షించబడిన టాప్ 5 OTT చిత్రాల జాబితాలో మిరాయ్ , జాట్ సినిమాలకు చోటు దక్కింది. హనుమాన్ సాధించిన భారీ విజయం తర్వాత దేశ వ్యాప్తంగా తేజ సజ్జాకు పెరిగిన ఆదరణ ‘మిరాయ్’ చిత్రంలో స్పష్టంగా కనిపించింది. ఈ చిత్రం థియేటర్లలోనూ, డిజిటల్ వేదికలపైనా మంచి ఫలితాలను సాధించింది. తెలుగు , హిందీ భాషలలో అద్భుతమైన టెలివిజన్ రేటింగ్లను నమోదు చేయడమే కాకుండా జియో హాట్ స్టార్ లో స్ట్రీమింగ్ ప్రారంభమైన తర్వాత నంబర్ 1 ట్రెండింగ్ చిత్రంగా నిలిచింది. అదేవిధంగా సన్నీ డియోల్ నటించిన ‘జాట్’ చిత్రం నెట్ఫ్లిక్స్లో ‘పుష్ప 2’ కంటే ఎక్కువ ఓటీటీ వ్యూస్ను సాధించింది. డిజిటల్ రంగంలో తనకున్న బలమైన ఆదరణను చాటుకుంది.