YS Sharmila: జగన్‌ ‘విశాఖ విజన్‌’ ప్రకటనపై వైఎస్ షర్మిల సెటైర్లు ?

YS Sharmila: గుట్టల్ని కొట్టడం, పోర్టులను అమ్మడం, భూములను మింగడమే… సీఎం వైఎస్ జగన్ ‘విశాఖ విజన్‌’ అని ఏపీపీసీసీ చీఫ్ వైఎస్ షర్మిల ఆరోపించారు. ‘విశాఖ విజన్‌’ పేరుతో సీఎం జగన్‌ చేసిన ప్రకటనపై ఏపీ పీసీసీ చీఫ్‌ వైఎస్‌ షర్మిల(YS Sharmila) తనదైన శైలిలో అధికార వైసీపీపై వ్యంగ్యాస్త్రాలు సంధించారు. పరిపాలనా రాజధానిలో ఇన్నాళ్లూ పాలన మొదలు పెట్టడానికి ఏం అడ్డొచ్చిందని ప్రశ్నించారు. ఎన్నికల ముందు పదేళ్ల వ్యూహాల పేరుతో కొత్త నాటకాలు కాదా ? అంటూ తీవ్ర స్థాయిలో ధ్వజమెత్తారు. ఈ మేరకు సీఎం జగన్ ప్రకటించిన ‘విశాఖ విజన్‌’ పై ఆమె తన సోషల్ మీడియా ఎక్స్‌ (ట్విటర్‌) వేదికగా సెటైర్లు వేసారు.

YS Sharmila Slams YS jagan

‘‘పరిపాలనా రాజధాని అని చెప్పి విశాఖ ప్రజలను మూడేళ్లుగా మోసం చేయడం మీ చేతకాని కమిట్‌ మెంట్‌. ఐటీ హిల్స్‌ నుంచి దిగ్గజ కంపెనీలు వెళ్లిపోతున్నా… చూస్తూ ఉండటం మీ రోడ్‌ మ్యాప్‌. ఆంధ్రుల తలమానికం విశాఖ స్టీల్‌ ప్లాంట్‌ ను కేంద్ర ప్రభుత్వం అమ్మేస్తుంటే ప్రేక్షక పాత్ర వహించడం మీ విజన్‌. రైల్వే జోన్‌ పట్టాలు ఎక్కకపోయినా మౌనం వహించడం మీకు ప్రాక్టికల్‌. గుట్టల్ని కొట్టడం, పోర్టులను అమ్మడం, భూములను మింగడం.. ఇదే విశాఖపై వైకాపా విజన్‌’’ అని షర్మిల వ్యంగ్యంగా పోస్ట్ చేసారు. ప్రస్తుతం షర్మిల చేసిన పోస్టు సోషల్ మీడియాలో వైరల్ గా మారుతోంది. ఇప్పటికే ‘విశాఖ విజన్‌’ పేరుతో ప్రభుత్వం విడుదల చేసిన గ్రాఫిక్ టవర్… కోడికత్తిని పోలి ఉందంటూ సోషల్ మీడియాలో విపరీతంగా మీమ్స్, పోస్టులు పెడుతున్నారు. వీటికి షర్మిల వ్యంగ్యాస్త్రాలు కూడా తోడవడంతో ‘విశాఖ విజన్‌’ సోషల్ మీడియాలో ట్రెండింగ్ లో కొనసాగుతోంది.

Also Read : Nara Chandrababu Naidu: చంద్రబాబుతో పవన్ కళ్యాణ్ భేటీ !