విశ్వక్ సేన్ ‘కల్ట్’ థియేట్రికల్ ట్రైలర్ రిలీజ్
రేపే భారీ తెరపై విడుదల కావడానికి సిద్దం
హైద‌రాబాద్ : ప్ర‌ముఖ న‌టుడు విశ్వక్ సేన్ నటించిన ‘కల్ట్’ చిత్రం థియేట్రికల్ ట్రైలర్ విడుదలైంది. 35 రోజుల వ్యవధిలో మూడు సినిమాలతో ప్రేక్షకుల ముందుకు రాబోతున్నారనే విషయం తెలిసిందే. ఇందులో భాగంగా ఆయన నటించిన ‘కల్ట్’ చిత్రం అక్టోబర్ 30న శుక్ర‌వారం భారీ తెరపై విడుదల కావడానికి సిద్ధంగా ఉంది. సినిమా విడుదలకు కొన్ని గంటల సమయం మాత్రమే మిగిలి ఉండటంతో, చిత్ర బృందం థియేట్రికల్ ట్రైలర్‌ను విడుదల చేసింది. ఇది సినిమాపై అంచనాలను మరింత పెంచింది. ఈ చిత్రానికి విశ్వక్ సేన్ ప్రధాన పాత్ర పోషించడమే కాకుండా, దర్శకత్వం కూడా వహిస్తున్నారు. ఈ ‘స్లాషర్’ తరహా కథాంశానికి యువ దర్శకుడు తరుణ్ భాస్కర్ కథను అందించారు. విశ్వక్ సేన్ తన ట్విట్టర్ ఖాతాలో ఈ ట్రైలర్‌ను పంచుకుని అభిమానులను అలరించారు. ట్రైలర్‌ను గమనిస్తే, విశ్వక్ సేన్ పూర్తి యాక్షన్ అవతారంలో కనిపిస్తున్నారు.
గోవాలోని ఒక ఏకాంత ఎస్టేట్‌లో 300 మందికి పైగా వ్యక్తులు చిక్కుకు పోవడం ఇందులో చూపించారు. వారు సంతోషంగా ఆ ప్రదేశానికి చేరుకున్నప్పటికీ, క్రమంగా అక్కడ బందీలుగా మారిపోతారు. ఆ ఎస్టేట్ చుట్టూ విద్యుత్ కంచె ఉండటం, ప్రధాన ద్వారం వద్ద ఆర్డీఎస్ పేలుడు పదార్థాలను అమర్చడం వల్ల, అక్కడి నుండి తప్పించు కోవడం దాదాపు అసాధ్యంగా మారుతుంది. ప్రాణాలతో బయట పడాలంటే, ప్రాణాంతకమైన ఆటలలో పాల్గొనడం తప్ప వేరే మార్గం ఉండదు. అక్కడ తీసుకునే ప్రతి నిర్ణయం ప్రాణాంతక పరిణామాలకు దారితీయవచ్చు. ఈ పరిస్థితుల్లో, అదే ఎస్టేట్‌లో చిక్కుకున్న డీఎస్పీ సంకల్ప్ నాయక్, అజ్ఞాత ప్రత్యర్థి బారి నుండి అందరినీ కాపాడేందుకు శాయశక్తులా పోరాడుతాడు. టాలీవుడ్‌లో వస్తున్న మొదటి ‘స్లాషర్’ తరహా చిత్రం ఇదే కావడం విశేషం. సరికొత్త కథాంశంతో రూపొందిన ఈ సినిమా, ప్రేక్షకులను సీటు అంచున కూర్చునేలా చేస్తుందని భావిస్తున్నారు.