వన్డే, టెస్టు సీరీస్ లకు టి20 టీం పునాది వేసింది
సంచ‌ల‌న వ్యాఖ్య‌లు చేసిన హెడ్ కోచ్ గంభీర్
న్యూజిలాండ్ : భారత జట్టు హెడ్ కోచ్ గౌతమ్ గంభీర్ ఆస‌క్తిక‌ర వ్యాఖ్య‌లు చేశాడు. న్యూజిలాండ్‌తో జరగనున్న వన్డే, టెస్టు సిరీస్‌లకు భారత్ టీ20 జట్టు పునాది వేసిందని పేర్కొన్నారు. న్యూజిలాండ్‌లో పర్యటిస్తున్న భారత జట్టు అక్కడ అడుగు పెట్టిన కొద్ది రోజులకే టీ20 సిరీస్‌ను ప్రారంభించాల్సి వచ్చిందని పేర్కొన్నాడు. నాలుగు వేర్వేరు వేదికల్లో జరిగిన ఈ సిరీస్‌లో తగినంత విశ్రాంతి లేదా కోలుకునే సమయం లేక పోయినప్పటికీ భారత్ ఆతిథ్య జట్టుపై 3-2 తేడాతో విజయం సాధించింద‌ని చెప్పారు. భారత ప్రధాన కోచ్ గౌతమ్ గంభీర్ మాట్లాడుతూ శ్రేయస్ అయ్యర్ నాయకత్వంలోని టీ20 జట్టు, తగినంత ప్రాక్టీస్ లేక పోయినప్పటికీ ఈ ఫార్మాట్‌లో విజయం సాధించడం ద్వారా రాబోయే వన్డే , టెస్టు సిరీస్‌లకు బలమైన పునాది వేసిందని పేర్కొన్నారు. డ్రెస్సింగ్ రూమ్‌లో ఆటగాళ్లతో మాట్లాడారు గంభీర్., ఈ సిరీస్‌లో మీరు చూపిన కృషికి గర్వపడవచ్చు. సరైన సన్నద్ధతకు ఒక్క రోజు మాత్రమే సమయం ఉన్నప్పుడు, న్యూజిలాండ్ వంటి బలమైన జట్టును వారి సొంత గడ్డపై ఓడించడం గొప్ప విషయం. మీరు గర్వంగా తల ఎత్తుకుని తిరిగి వెళ్లవచ్చు అని అన్నారు.
ఈ ప్రసంగానికి సంబంధించిన వీడియోను బీసీసీఐ తన సోషల్ మీడియా ఖాతాల్లో పంచుకుంది. అవును, మీరు చివరి రెండు మ్యాచ్‌లలో కూడా గెలవాలని అనుకున్నారు, కానీ కొన్నిసార్లు ఇలాంటివి జరుగుతుంటాయి. అయితే, మిగిలిన పర్యటన కోసం మీరు మంచి పునాది వేశారని నేను భావిస్తున్నాను. సిరీస్ ప్రారంభానికి ముందే, సరైన దిశను నిర్దేశించాల్సిన బాధ్యత మీపై ఉందని నేను చెప్పాను. ఇప్పుడు, మీరు ఎక్కడైతే ఆపారో, అక్కడి నుండే వన్డే , టెస్ట్ జట్టు సభ్యులు ముందుకు కొనసాగించాల్సి ఉంటుంది అని ఆయన అన్నారు. బుధవారం నుంచి ప్రారంభం కానున్న ఐదు మ్యాచ్‌ల వన్డే సిరీస్ తర్వాత నవంబర్ 19 నుంచి రెండు టెస్టు మ్యాచ్‌లు జరగనున్నాయి. డిసెంబర్‌లో శ్రీలంకతో స్వదేశంలో జరగనున్న సిరీస్ కోసం, టీ20 ఆటగాళ్లు శారీరక దృఢత్వాన్ని కాపాడు కోవాలని గంభీర్ సూచించారు. మనం నిరంతరం మెరుగు పడుతూ ఉండటం చాలా ముఖ్యం. మనకు తగినన్ని టీ20 మ్యాచ్‌లు ఆడే అవకాశం లభించడం లేదని మనకు తెలుసు. ఇప్పుడు మనకు ఒక నెల విరామం ఉంది, కాబట్టి అందరూ తమ ఫిట్‌నెస్‌ను కాపాడుకుంటూ, తదుపరి సిరీస్‌కు సిద్ధం కావాలి అని పిలుపునిచ్చారు.