భద్రతా సిబ్బందితో మోదీ దీపావళి వేడుక‌లు
ఛ‌త్తీస్ గ‌ఢ్ రాష్ట్రంలోని బస్తర్ లో ప్రధానమంత్రి
ఛ‌త్తీస్ గ‌ఢ్ : దీపావళి పండుగను ఛత్తీస్‌గఢ్‌లోని బస్తర్‌లో భద్రతా సిబ్బందితో కలిసి జరుపుకున్నారు ప్రధానమంత్రి నరేంద్ర మోదీ. వారి త్యాగాలను, అంకితభావాన్ని గౌరవించడంతో పాటు ఆ ప్రాంతంలో అభివృద్ధి , భద్రతా పరంగా సాధించిన పురోగతిని ఈ సందర్భంగా ఎత్తి చూపారు. మావోయిజం ప్రభావంతో గతంలో ఇబ్బందులు ఎదుర్కొన్న ఛత్తీస్‌గఢ్‌లోని బస్తర్ ప్రాంతంలో అక్కడ విధులు నిర్వర్తిస్తున్న భద్రతా సిబ్బందితో కలిసి ప్రధాని నరేంద్ర మోదీ దీపావళిని జ‌ర‌ప‌డం ఆస‌క్తిని రేపింది. ఈ ప్రాంతంలో పరిస్థితులు ఎలా మారాయో , అభివృద్ధి ఎలా వేగం పుంజుకుందో ఆయన తెలుసుకునే ప్ర‌య‌త్నం చేశారు. భద్రతా సిబ్బంది చేసిన త్యాగాలకు, నిస్వార్థ సేవలకు తాను వందనం చేస్తున్నాన‌ని ప్ర‌క‌టించారు. మన ధైర్యవంతులైన భద్రతా దళాలతో దీపావళి జ‌రుపు కోవ‌డం సంతోషంగా ఉంద‌న్నారు.
ఒకప్పుడు నక్సలిజం ప్రభావం ఎక్కువగా ఉన్న ఈ ప్రాంతంలో, ఇప్పుడు అభివృద్ధి విరాజిల్లుతోంది అని పేర్కొన్నారు .
గత దశాబ్ద కాలంగా ప్రధాని నరేంద్ర మోదీ ప్రతి ఏటా దీపావళిని దేశ సాయుధ దళాలతో కలిసి జరుపుకోవడాన్ని ఒక సంప్రదాయంగా మార్చుకున్నారు. దేశంలోని అత్యంత కఠినమైన సరిహద్దుల్లో, మైదాన ప్రాంతాల్లో లేదా పర్వత ప్రాంతాల్లో ఆయన ఈ పండుగను జరుపుకుంటూ వస్తున్నారు. 2025లో, గోవా-కార్వార్ తీరం సమీపంలో ఉన్న స్వదేశీ విమాన వాహక నౌక ‘ఐఎన్‌ఎస్ విక్రాంత్’ పై ప్రధాని దీపావళిని జరుపుకున్నారు. భారత నౌకాదళంతో ఆయన ఇలా పండుగ జరుపుకోవడం అదే మొదటిసారి. గమనించదగ్గ విషయం ఏమిటంటే, 2022 సెప్టెంబర్ 2న కొచ్చిన్ షిప్‌యార్డ్ లిమిటెడ్‌లో దేశపు మొట్టమొదటి స్వదేశీ విమాన వాహక నౌక ‘ఐఎన్‌ఎస్ విక్రాంత్’ను ఆయన స్వయంగా ప్రారంభించారు. 2014లో ప్రధానిగా బాధ్యతలు చేపట్టిన తర్వాత తన మొదటి దీపావళిని ప్రపంచంలోనే అత్యంత ఎత్తైన యుద్ధభూమి అయిన సియాచిన్ గ్లేసియర్‌లో సైనికులతో కలిసి జరుపుకోవడం విశేషం.
ఆ తర్వాతి సంవత్సరాలలో మోదీ దేశంలోని అత్యంత సున్నితమైన సరిహద్దు ప్రాంతాలైన 2015లో పంజాబ్ సరిహద్దు, 2016లో హిమాచల్ ప్రదేశ్‌లో చైనా సరిహద్దు సమీపంలోని సుమ్దోహ్ అనే ఎత్తైన పోస్టు, 2017లో ఉత్తర కాశ్మీర్‌లోని గురేజ్ సెక్టార్‌లోని కఠినమైన భూభాగంలో పర్యటించారు. ఆయన ఉత్తరాఖండ్‌లోని హర్సిల్ (2018), జమ్మూ కాశ్మీర్‌లోని రాజౌరి (2019), రాజస్థాన్‌లోని ప్రసిద్ధ ఎడారి పోస్టు లాంగేవాలా (2020), జమ్మూ కాశ్మీర్‌లోని నౌషెరా (2021), లడఖ్‌లోని కార్గిల్ (2022), హిమాచల్ ప్రదేశ్‌లోని లెప్చా (2023), గుజరాత్‌లోని సర్ క్రీక్ (2024)లలో రక్షణ దళాలతో కలిసి దీపావళిని కూడా జరుపుకున్నారు.
