హైదరాబాద్ : దిగ్గజ దర్శకుడు ఎస్ఎస్ రాజమౌళి దర్శకత్వం వహించిన చిత్రం వారణాసి. ఇందులో మహేష్ బాబు, ప్రియాంక చోప్రా కీ రోల్స్ పోషించారు. ఇప్పటికే ఈ సినిమా విడుదల తేదీని కూడా ప్రకటించారు మూవీ మేకర్స్. భారీ బడ్జెట్ తో దీనిని తెర కెక్కించారు దర్శకుడు. సినిమాపై రోజు రోజుకు అంచనాలు పెరిగాయి. వచ్చే ఏడాది 2027 ఏప్రిల్ లో దీనిని విడుదల చేయనున్నారు. ఇదిలా ఉండగా ఇప్పటికే ప్రమోషన్స్ కూడా మొదలు పెట్టాడు రాజమౌళి. తాజాగా వారణాసికి సంబంధించి కీలక అప్ డేట్ వచ్చింది. ఈ సినిమా ఓటీటీ రైట్స్ కోసం ఓటీటీ సంస్థలు అమెజాన్, నెట్ ఫ్లిక్స్ భారీ ఎత్తున పోటీ పడుతున్నట్లు సమాచారం. దీంతో ఈ సినిమా థియేట్రికల్ విడుదలతో పాటు దాని ఓటీటీ వ్యాపారం కూడా ప్రధాన చర్చనీయాంశంగా మారింది.
‘వారణాసి’ డిజిటల్ స్ట్రీమింగ్ హక్కులను కొనుగోలు చేసేందుకు నెట్ఫ్లిక్స్ చిత్ర నిర్మాతలతో చర్చలు జరుపుతోంది. ఈ ఓటీటీ ఒప్పందం విలువ రూ. 400 కోట్ల నుంచి రూ. 450 కోట్ల మధ్య ఉంటుందని అంచనా. అయితే ఈ ఒప్పందం ఇంకా అధికారికంగా ధృవీకరించలేదు. నిర్మాతలు నవంబర్ నెలాఖరులోగా ఈ ఓటీటీ ఒప్పందాన్ని పూర్తి చేయాలని యోచిస్తున్నట్లు సమాచారం. ఈ చర్చలు విజయవంతమైతే ఈ చిత్రం భారతీయ సినిమా చరిత్రలోనే అతిపెద్ద డిజిటల్ ఒప్పందాలలో ఒకటిగా నిలిచే అవకాశం ఉంది. పోస్ట్-ప్రొడక్షన్ పనులు వేగంగా జరుగుతున్నాయి. నిర్మాతలు జనవరి 2027 నాటికి ప్రధాన పోస్ట్-ప్రొడక్షన్ పనులను, ఆ తర్వాత ఫిబ్రవరి, మార్చి నెలల్లో ఇతర సాంకేతిక సన్నాహాలను పూర్తి చేయాలని లక్ష్యంగా పెట్టుకున్నట్లు సమాచారం.
ఈ చిత్రం తెలుగు రాష్ట్రాల్లో ఒక పెద్ద థియేట్రికల్ వ్యాపార ఒప్పందాన్ని కూడా కుదుర్చుకున్నట్లు సమాచారం. మైత్రి మూవీ మేకర్స్ సుమారు రూ. 290 కోట్లకు థియేట్రికల్ పంపిణీ హక్కులను కొనుగోలు చేసినట్లు సమాచారం . వారణాసి చిత్రంలో మహేష్ బాబు ప్రధాన పాత్రలో నటించగా, ప్రియాంక చోప్రాతో పాటు పృథ్వీరాజ్ సుకుమారన్ ముఖ్య పాత్రలు పోషించారు. నిర్మాతలు ఏప్రిల్ 7, 2027ను ప్రపంచవ్యాప్త థియేట్రికల్ విడుదల తేదీగా ప్రకటించారు. థియేట్రికల్ , డిజిటల్ వ్యాపారంపై భారీ అంచనాలతో, వారణాసి అత్యంత ఆసక్తిగా ఎదురు చూస్తున్న భారతీయ చిత్రాలలో ఒకటిగా నిలిచింది.
వార్తల్లో వస్తున్న రూ. 450 కోట్ల ఓటీటీ ఒప్పందాన్ని నెట్ఫ్లిక్స్ ఖరారు చేస్తుందో లేదో వేచి చూడాలి. చిత్రనిర్మాతల నుండి అధికారిక ప్రకటన వెలువడాల్సి ఉంది.
