హైదరాబాద్‌కు మరో 60 ఓలెక్ట్రా ఎలక్ట్రిక్ బస్సులు

హైదరాబాద్ : హైదరాబాద్ పర్యావరణ అనుకూల ప్రజా రవాణా వ్యవస్థను బలోపేతం చేసే దిశగా ఒక కీలక అడుగు వేస్తోంది. ఇందులో భాగంగా తెలంగాణ రాష్ట్ర రోడ్డు రవాణా సంస్థ (టీజీఎస్ఆర్టీసీ) నగర బస్సుల సముదాయానికి 60 కొత్త ఎలక్ట్రిక్ బస్సులను చేర్చింది. తన ఎలక్ట్రిక్ మొబిలిటీ కార్యక్రమాన్ని విస్తరించింది. సుస్థిర పట్టణ రవాణా, పర్యావరణ అనుకూల రవాణాను ప్రోత్సహించే నగర ప్రయత్నాలలో ఈ చర్య మరో ప్రధాన మైలురాయిగా నిలుస్తుంది. ఈవీ ట్రాన్స్ ప్రైవేట్ లిమిటెడ్ భాగస్వామ్యంతో అమలు చేస్తున్న ప్రతిష్టాత్మక టీజీఎస్ఆర్టీసీ 500 బస్సుల ఎలక్ట్రిక్ మొబిలిటీ ప్రాజెక్టులో భాగంగా, ఓలెక్ట్రా తయారు చేసిన 60 కొత్త 12-మీటర్ల లో-ఫ్లోర్ ఎలక్ట్రిక్ బస్సులను నగర సేవల్లోకి ప్రవేశ పెట్టింది ఇవాళ నుంచి.

రవాణా శాఖ మంత్రి పొన్నం ప్రభాకర్, టీజీఎస్ఆర్టీసీ వైస్ చైర్మన్, మేనేజింగ్ డైరెక్టర్ నాగిరెడ్డి, సీనియర్ అధికారులు, ప్రజాప్రతినిధుల సమక్షంలో కూకట్‌పల్లి డిపో వద్ద ఈ బస్సులను లాంఛనంగా జెండా ఊపి ప్రారంభించారు. ఈ కొత్త బస్సుల ప్రవేశంతో, టీజీఎస్ఆర్టీసీ 500-బస్సుల ఎలక్ట్రిక్ ప్రాజెక్ట్ ఇప్పుడు విజయవంతంగా పూర్తయింది. ఇది హైదరాబాద్‌ను మరింత స్వచ్ఛమైన, సుస్థిరమైన ప్రజా రవాణా వ్యవస్థ వైపు నడిపించడంలో ఒక ముఖ్యమైన మైలురాయిగా నిలిచింది. ఈ ప్రాజెక్ట్ కింద, హైదరాబాద్ వ్యాప్తంగా పట్టణ ప్రజా రవాణా సేవలను మెరుగు పరచడానికి టీజీఎస్ఆర్టీసీ మొత్తం 500 లో-ఫ్లోర్ ఎలక్ట్రిక్ సిటీ బస్సులను ప్రవేశపెట్టింది. వీటిలో 450 నాన్-ఏసీ బస్సులు, 50 ఏసీ బస్సులు ఉన్నాయి.

వీటిలో, కంటోన్మెంట్ (సీఎన్‌టీ), హెచ్‌సీయూ, మియాపూర్, హయత్‌నగర్, రాణిగంజ్ వంటి డిపోల నుండి 440 ఎలక్ట్రిక్ బస్సులు ఇప్పటికే విజయవంతంగా నడుస్తున్నాయి. కూకట్‌పల్లి డిపో నుండి చివరి విడత బస్సులు కూడా చేరడంతో, 500 ఎలక్ట్రిక్ బస్సుల పూర్తి ఫ్లీట్ ఇప్పుడు పూర్తిస్థాయిలో అందుబాటులోకి వస్తుంది. విద్యుత్ బస్సులు అందించే సౌకర్యవంతమైన ప్రయాణం, విశ్వసనీయత, పర్యావరణ అనుకూల లక్షణాల కారణంగా ప్రయాణికుల నుండి ప్రోత్సాహకరమైన స్పందన లభించింది. ప్రస్తుతం, హైదరాబాద్ వ్యాప్తంగా ప్రతిరోజూ సుమారు లక్ష మంది ప్రయాణికులు ఈ విద్యుత్ బస్సులను ఉపయోగిస్తున్నారు. అదనంగా 60 బస్సులను ప్రవేశపెట్టడంతో, రోజువారీ ప్రయాణికుల సంఖ్య దాదాపు 1.2 లక్షలకు పెరుగుతుందని అంచనా.