ప్రభుత్వ వ్య‌తిరేక నిర‌స‌న‌ల‌పై దాడులు దారుణం

ముంబై : ప్రభుత్వ వ్యతిరేక నిరసనలపై అణచివేతను ‘సామ్నా’లో శివసేన (యుబిటి) ఖండించింది. ఢిల్లీ, ముంబైలలో ప్రభుత్వ వ్యతిరేక నిరసనలను అణచి వేసేందుకు కేంద్రం అనుసరించిన చర్యలను తన అధికారిక పత్రిక లో విమర్శించింది, అలాగే ప్రజాస్వామ్య హక్కుల పట్ల ఆందోళన వ్యక్తం చేసింది. దేశవ్యాప్తంగా జరుగుతున్న విస్తృతమైన ప్రభుత్వ వ్యతిరేక నిరసనలను అణచి వేసేందుకు కేంద్ర ప్రభుత్వం పిరికిపంద తరహా నియంతృత్వ పద్ధతులను అవలంబిస్తోందని శివసేన ఆరోపించింది. 10న జాతీయ రాజధాని , ముంబైలలో భద్రతాపరమైన ఆంక్షలు విధించి, వేలాది మంది నిరసనకారులు, విద్యార్థి కార్యకర్తలు, కీలక ప్రతిపక్ష నాయకులను అదుపులోకి తీసుకున్న నేపథ్యంలో ఈ విమర్శ వచ్చింది. ఛత్తీస్‌గఢ్, జార్ఖండ్, జమ్మూ – కాశ్మీర్ , మణిపూర్ వంటి ప్రాంతాల్లో ఉగ్రవాద వ్యతిరేక , నక్సలైట్ వ్యతిరేక కార్యకలాపాల నుండి వెనక్కి రప్పించిన సాయుధ భద్రతా సిబ్బందిని ఢిల్లీ అంతటా అపూర్వమైన దిగ్బంధనాన్ని అమలు చేయడానికి కేంద్ర ప్రభుత్వం మోహరించిందని థాకరే వర్గం పేర్కొంది.

రాజధాని నగరంలోని ప్రవేశ మార్గాలు, సందులను మూసివేశారు, అలాగే దాదాపు 1,00,000 మంది సాయుధ సిబ్బంది కృష్ణ మీనన్ రోడ్‌లోని కేంద్ర హోం మంత్రి అమిత్ షా నివాసాన్ని చుట్టుముట్టారు. ఈ కఠినమైన భద్రతా వలయం ప్రజా మౌలిక సదుపాయాలకు అంతరాయం కలిగించింది. ఇంటర్నెట్ సేవలు, మెట్రో రవాణా, స్థానిక బస్సు నెట్‌వర్క్‌లు, నగరానికి వచ్చే దూరప్రాంత రైళ్లు , వాణిజ్య విమాన సర్వీసులు నిలిపి వేయబడ్డాయి. దీపాంకర్ భట్టాచార్య ,మనోజ్ ఝాతో సహా కీలక రాజకీయ నాయకులను అదుపులోకి తీసుకోవడానికి పోలీసులు విమానంలోకి కూడా ప్రవేశించారని ఆ సంపాదకీయం పేర్కొంది. విస్తృతమైన రవాణా , సేవల స్తంభన ఉన్నప్పటికీ, విద్యార్థులు , పౌర సమాజ సభ్యుల భారీ సమూహాలు ఢిల్లీలోని నిరసన ప్రదేశాలకు చేరుకున్నారు. ఈ అణచివేత చర్యల సమయంలో పశ్చిమ బెంగాల్ మాజీ సీఎం మమతా బెనర్జీ, ఆప్ కన్వీనర్ అరవింద్ కేజ్రీవాల్‌తో సహా పలువురిని పోలీసులు అరెస్టు చేశారని మండిప‌డింది.

ముంబైలో మహాత్మా గాంధీ మునిమనవడు తుషార్ గాంధీ ఆగస్ట్ క్రాంతి మైదాన్ వైపు శాంతియుత సత్యాగ్రహానికి నాయకత్వం వహించేందుకు ప్రయత్నిస్తుండగా పోలీసులు ఆయనను అదుపులోకి తీసుకున్నారు. ఈ చర్యకు ప్రతిపక్ష నాయకుల నుంచి తక్షణ ప్రతిఘటన ఎదురైంది. శివసేన (యూబీటీ) నాయకుడు ఆదిత్య థాకరే, పార్టీ కార్యకర్తలు ఆయనను వెంటనే విడుదల చేయాలని డిమాండ్ చేస్తూ డీఎన్ నగర్ పోలీస్ స్టేషన్‌కు ర్యాలీగా వెళ్లారని పేర్కొంది. భారతదేశ అంతర్గత భద్రతా కార్యకలాపాలపై పెరుగుతున్న అంతర్జాతీయ పరిశీలనను ఈ సంపాదకీయం ప్రముఖంగా ప్రస్తావించింది. ఏకపక్ష నిర్బంధాలు, పోలీసుల కఠిన ప్రవర్తన, మహిళా ప్రదర్శనకారులను జైలు వ్యాన్లలోకి లాక్కెళ్లి గుర్తు తెలియని ప్రదేశాలకు తరలించారన్న నివేదికలపై ఐక్యరాజ్యసమితి మానవ హక్కుల కార్యాలయం తీవ్ర ఆందోళన వ్యక్తం చేసింది.