సీఎం సింగపూర్ టూర్ పెట్టుబడులపై ఫోకస్
రెండు రోజుల పాటు పర్యటించనున్న చంద్రబాబు
సింగపూర్ : ఏపీ రాష్ట్ర ముఖ్యమంత్రి నారా చంద్రబాబు నాయుడు బిజీగా ఉన్నారు. ఇవాళ ఆయన సింగపూర్ పర్యటన నిమిత్తం బయలుదేరి వెళ్లారు. సోమవారం నుండి రెండు రోజుల పాటు సింగపూర్లో పర్యటించనున్నారు. ప్రపంచ స్థాయి పెట్టుబడులను ఆకర్షించడం, అంతర్జాతీయ భాగస్వామ్యాలను బలోపేతం చేయడం, ఆంధ్రప్రదేశ్లో అమరావతితో పాటు ఇతర కీలక మౌలిక సదుపాయాల ప్రాజెక్టుల అభివృద్ధిని వేగవంతం చేయడంపై ఈ పర్యటనలో ప్రత్యేక దృష్టి సారించనున్నారు. ముఖ్యమంత్రి అధికారిక షెడ్యూల్ ప్రకారం చంద్రబాబు నాయుడు బెంగళూరు నుండి సింగపూర్కు బయలుదేరి వెళ్లారు. ఆంధ్రప్రదేశ్ను ఒక ప్రధాన పెట్టుబడి గమ్యస్థానంగా చాటిచెప్పేలా అనేక ఉన్నత స్థాయి సమావేశాల్లో పాల్గొంటారు. పట్టణ ప్రణాళిక, మౌలిక సదుపాయాల కల్పన, ఆర్థిక వృద్ధిలో ఆంధ్రప్రదేశ్ , సింగపూర్ మధ్య ఉన్న దీర్ఘకాలిక సహకారాన్ని ఈ పర్యటన మరింత బలోపేతం చేస్తుందని భావిస్తున్నారు.
15న మంగళవారం ముఖ్యమంత్రి సింగపూర్లోని భారత హై కమిషనర్ శిల్పక్ అంబులేను కలుస్తారు. ఆ తర్వాత స్టార్టప్ వెంచర్ క్యాపిటలిస్టులతో రౌండ్ టేబుల్ సమావేశంలో పాల్గొంటారు. అనంతరం, ఆయన UN-హాబిటాట్ ఎగ్జిక్యూటివ్ డైరెక్టర్ అనక్లాడియా రోస్బాచ్తో కలిసి భోజన సమావేశంలో పాల్గొంటారు. సింగపూర్ సీనియర్ మంత్రి లో యెన్ లింగ్తో చర్చలు జరపడంతో పాటు, గూగుల్ క్లౌడ్ ఆసియా-పసిఫిక్ అధినేత కరణ్ బాజ్వా, లిమ్ సియాంగ్ గువాన్, రాబర్ట్ యాప్ , టాన్ ఎంగ్ చై వంటి ప్రముఖ వ్యాపార, విద్యా రంగ ప్రముఖులతో ఆయన సమావేశం కానున్నారు. ఈ పర్యటనలో అత్యంత కీలకమైన అంశం సింగపూర్ ప్రధాన మంత్రి లారెన్స్ వాంగ్తో నాయుడు జరిపే సమావేశం; ఇందులో ద్వైపాక్షిక సహకారానికి సంబంధించిన వివిధ అంశాలపై చర్చలు జరగనున్నాయి.
అలాగే సింగపూర్ విదేశాంగ మంత్రి వివియన్ బాలకృష్ణన్, హోం వ్యవహారాల మంత్రి కె. షణ్ముగం ,మానవ వనరుల శాఖ మంత్రి టాన్ సీ లెంగ్లతో కూడా ఆయన సమావేశమవుతారు. కాన్ఫెడరేషన్ ఆఫ్ ఇండియన్ ఇండస్ట్రీ కి చెందిన ఆంధ్రప్రదేశ్ ప్రతినిధి బృంద సభ్యులతో సమావేశం కావడం కూడా కార్యక్రమాల్లో భాగంగా ఉంది. 16న బుధవారం కాకతీయ కల్చరల్ అసోసియేషన్ ఏర్పాటు చేసిన ‘CBN@361’ కార్యక్రమాన్ని నాయుడు ప్రారంభిస్తారు చంద్రబాబు నాయుడు. అపాక్ సెమీకండక్టర్ రౌండ్ టేబుల్ సమావేశంలో పాల్గొంటారు. రాజధాని నగరం అభివృద్ధిపై రాష్ట్ర ప్రభుత్వం ఇస్తున్న ప్రాధాన్యతను ప్రతిబింబిస్తూ ఆయన సుర్బానా జురాంగ్-అమరావతి ప్రణాళికా సమావేశానికి హాజరవుతారు. అనంతరం ముఖ్యమంత్రి, సింగపూర్ ఉప ప్రధాని, వాణిజ్య, పరిశ్రమల శాఖ మంత్రి గాన్ కిమ్ యోంగ్ నేతృత్వంలోని ప్రతినిధి బృందంతో సమావేశమవుతారు.
