మ‌న‌సు దోచుకునేలా ‘తెల్ల కాగితం’ మూవీ

హైద‌రాబాద్ : తాజా తెలుగు చిత్రం ‘తెల్ల కాగితం’ థియేటర్లలో విడుదలకు ముందే ఆన్‌లైన్‌లో ప్రత్యక్షం కావడంతో చ‌ర్చ‌కు దారితీసేలా చేసింది. గతంలో బాల నటుడిగా ఆ తర్వాత ‘కోర్ట్’ చిత్రంలో ప్రధాన నటుడిగా ప్రేక్షకులను అలరించిన హర్ష్ రోషన్ ఇందులో హీరోగా నటించారు. నక్షత్ర కథానాయికగా పరిచయం కాగా రమేష్ బండ్రెడ్డి ఈ చిత్రానికి దర్శకత్వం వహించారు. ‘తెల్లకాగితం’ అక్టోబర్ 2న థియేటర్లలో విడుదలైంది. ఇక క‌థ విష‌యానికి వ‌స్తే ఈ కథ భీమవరం సమీపంలోని ఒక గ్రామంలో జరుగుతుంది. రాము (హర్ష్ రోషన్) తన అన్నయ్య, వదినలతో కలిసి నివసిస్తుంటాడు. ఆశ (నక్షత్ర) అదే గ్రామానికి చెందిన పాఠశాల విద్యార్థిని, రాము చదివే పాఠశాలలోనే ఆమె కూడా చదువుతుంటుంది.

వారిద్దరి మధ్య పరిచయం అనుకోకుండా వారి లంచ్ బాక్సులు మారడంతో మొదలవుతుంది. ఒక సాధారణ పరిచయంతో మొదలైన ఈ బంధం క్రమంగా స్నేహంగా, ఆపై టీనేజ్ ప్రేమగా మారుతుంది. అయితే తాము తీసుకునే నిర్ణయాల పర్యవసానాలను పూర్తిగా అర్థం చేసుకోకుండా వ్యవహరించినప్పుడు వారి బంధం ఒక గంభీరమైన మలుపు తిరుగుతుంది. ఈ జంట ఒక ఊహించని పరిస్థితిలో చిక్కుకున్న తర్వాత ఏం జరిగింది, తలెత్తిన సమస్యలను వారు ఎలా ఎదుర్కొన్నారు అనే అంశాల చుట్టూ ఈ సినిమా సాగుతుంది.

ప్రేమ నేపథ్యంలో సినిమా తీయడంలో కొత్తదనం ఏమీ లేదు. తెలుగు చలనచిత్ర పరిశ్రమ టీనేజ్ ప్రేమకథలను, సంబంధాలను అనేక విధాలుగా ఆవిష్కరించింది. అయితే, చిన్న వయసులో తీసుకునే కీలక నిర్ణయాల పర్యవసానాల గురించి చర్చించడానికి టీనేజ్ ప్రేమకథను ఉపయోగించుకున్న విధానం ‘తెల్లకాగితం’ను ప్రత్యేకంగా నిలబెడుతుంది. అన్నీ తామే స్వయంగా నిర్వహించగల పరిపక్వత తమకు ఉందని భావించే టీనేజర్ల మనస్తత్వాన్ని ఈ సినిమా ప్రధానంగా చూపిస్తుంది. వారు తరచుగా తల్లిదండ్రుల సలహాలను విస్మరిస్తూ, తమ తప్పులను దాచగలమని నమ్ముతుంటారు. అటువంటి నిర్ణయాలు ఎంత పెద్ద సమస్యలకు దారితీస్తాయో చూపించే ప్రయత్నం ‘తెల్లకాగితం’ చేసింది.