జనవరి 2027 నుండి UPI ఛార్జీలా మోత‌..?

హైద‌రాబాద్ : నిత్యం కోట్లాది మంది వినియోగించే యూపీఐ లావాదేవీల‌పై ఛార్జీల మోత మోపేందుకు రెడీ అయ్యింది కేంద్ర స‌ర్కార్. ఎంపిక చేసిన యూపీఐ లావాదేవీలపై ‘మర్చంట్ డిస్కౌంట్ రేట్’ ఛార్జీల అమలు జనవరి 1, 2027 వరకు వాయిదా పడే అవకాశం ఉంది. వాస్తవానికి ఈ కొత్త విధానం అక్టోబర్ 15, 2026 నుండే అమల్లోకి రావాల్సి ఉంది. అందిన సమాచారం ప్రకారం వ్యాపారులు, ఫిన్‌టెక్ కంపెనీలు , పేమెంట్ సంస్థల అభ్యర్థనల మేరకు నేషనల్ పేమెంట్స్ కార్పొరేషన్ ఆఫ్ ఇండియా ఈ వాయిదాను పరిశీలిస్తోంది. ఈ నిర్ణయం వల్ల వ్యాపార సంస్థలకు, ముఖ్యంగా రద్దీగా ఉండే పండుగ సీజన్‌లో, కొత్త చెల్లింపు విధానానికి సిద్ధమయ్యేందుకు అదనపు సమయం లభిస్తుంది.

ప్రతిపాదిత ఎండీఆర్ విధానం ప్రకారం రూ. 2,000 కంటే ఎక్కువ విలువైన లావాదేవీల విషయంలో వ్యాపారులకు చేసే కొన్ని యూపీఐ చెల్లింపులపై 0.4% ఛార్జ్ వర్తిస్తుంది. రూ. 75,000 లేదా అంతకంటే ఎక్కువ విలువైన లావాదేవీలకు ఈ ఛార్జ్ గరిష్టంగా రూ. 300గా పరిమితం చేయబడుతుంది. ఉదాహరణకు ఎండీఆర్ పరిధిలోకి వచ్చే రూ. 10,000 విలువైన వ్యాపార లావాదేవీపై 0.4% చొప్పున రూ. 40 ఛార్జ్ పడుతుంది. ఇక ఎండీఆర్ అనేది వ్యాపారులకు సంబంధించిన ఛార్జ్, దీనిని వినియోగదారుల నుండి నేరుగా వసూలు చేయకూడదు. వ్యక్తుల మధ్య జరిగే యూపీఐ బదిలీలు ఉచితంగానే కొనసాగుతాయి. అలాగే, రూ. 2,000 వరకు జరిగే యూపీఐ చెల్లింపులు కూడా ఉచితంగానే ఉంటాయి. కొత్త ఎండీఆర్ విధానం వల్ల దాదాపు 96% వ్యాపార యూపీఐ లావాదేవీలపై ఎలాంటి ప్రభావం ఉండదని ప్రభుత్వం పేర్కొంది.

సాధారణంగా యూపీఐ లావాదేవీలు పెరిగే పండుగ షాపింగ్ సీజన్‌కు ముందే ఈ వాయిదా ప్రతిపాదన వచ్చింది. కొత్త ఛార్జీల గురించి అర్థం చేసుకోవడానికి , తమ వ్యవస్థలలో అవసరమైన మార్పులు చేసుకోవడానికి వ్యాపారులు, పేమెంట్ కంపెనీలు అదనపు సమయాన్ని కోరాయి. అయితే ఈ వాయిదాపై ఎన్పీసీఐ ఇంకా తుది నిర్ణయం తీసుకోలేదు. ప్రస్తుతానికి, వినియోగదారులు ఎటువంటి ప్రత్యక్ష ఎండీఆర్ రుసుము చెల్లించకుండానే యథావిధిగా యూపీఐని ఉపయోగించడం కొనసాగించవచ్చు.