Ganja Chocolates: హైదరాబాద్ లో వెలుగుచూసిన గంజాయి చాక్లెట్ల మాఫియా !

Ganja Chocolates: కాదేదీ అనర్హం గంజాయి సరఫరాకు అన్నట్లు మారింది తెలుగు రాష్ట్రాల్లో గంజాయి మాఫియా ఆగడాలు. చెడు వ్యసనాలకు బానిసలుగా మారిన కొంతమంది యువత బలహీనతను ఆసరగా తీసుకుని గంజాయి మాఫియా రెచ్చిపోతుంది. వేరు వేరు రూపాల్లో తన మాఫియాని విస్తరిస్తూ కోట్లు కూడబెట్టుకోవడంతో పాటు బంగారం లాంటి పిల్లల భవిష్యత్ ను నాశనం చేస్తుంది. ఆకు, సిగరెట్లు, పొడి, లిక్విడ్ రూపంలో గంజాయి(Ganja) రవాణా, అమ్మకాలు చేసే మాఫియా… దానిని ఇప్పుడు చాక్లెట్ల రూపంలో మార్చి చిన్న పిల్లలను సైతం గంజాయికి బానిసలుగా మార్చుతోంది. దీనికి ఇటీవల హైదరాబాద్ లో వెలుగుచూసిన గంజాయి చాక్లెట్ల మాఫియా నిలువెత్తు నిదర్శనంగా నిలుస్తోంది. ఇక పూర్తి వివరాల్లోకి వెళితే…

కొత్తూరు ప్రభుత్వ పాఠశాలలో చదువుతున్న విద్యార్ధులు సమీపంలోని పాన్ షాప్ లో చాక్లెట్లు కొనుకుని తిన్న తరువాత వారి ప్రవర్తనలో మార్పు వచ్చింది. మత్తులోకి జోగడం, వింతవింతగా ప్రవర్తిస్తుండంతో అనుమానం వచ్చిన ఉపాధ్యాయులు కొత్తూరు పోలీసులకు సమాచారం ఇచ్చారు. దీనితో రంగంలోనికి దిగిన శంషాబాద్ డీసీపీ నారాయణరెడ్డి… అవి గంజాయి చాక్లెట్లని నిర్ధారించుకుని సమీపంలోని పాన్ షాపుల్లో సోదాలు నిర్వహించారు.

Ganja Chocolates Viral

ఈ సోదాల్లో సుమారు 8 కేజీల గంజాయి(Ganja) కలిపిన ‘చార్మి నార్‌ గోల్డ్‌ మునకా’అనే పేరుతో ఉన్న 42 చాక్లెట్ల డబ్బాలు స్వాదీనం చేసుకున్నారు. వీటి విలువ రూ. 1.3 లక్షల విలువైన ఉంటుందని నిర్ధారించిన పోలీసులు చాక్లెట్లను తీసుకొచ్చి విక్రయిస్తున్న ముగ్గురిని అరెస్ట్‌ చేసి రిమాండ్‌కు తరలించారు. దీనితో పబ్బులకే పరిమితం అయిన గంజాయి మాఫియా పాఠశాలలకు కూడా విస్తరించడంతో ఆ ప్రాంతంతో కలకలం రేపింది. గంజాయి చాక్లెట్ల అమ్మకాలు వెలుగు చూడటంతో విద్యార్ధుల తల్లిదండ్రుల్లో కలవరం మొదలైయింది.

యూపీలో తయారీ, ఒడిశా వ్యక్తుల అమ్మకాలతో హైదరాబాదీ విద్యార్ధుల బలి ?

అయితే ఈ గంజాయి చాక్లెట్ల అమ్మకాల వెనుక ఉత్తరప్రదేశ్ టూ హైదరాబాద్(Hyderabad) వయా ఒడిశా కేంద్రంగా పెద్ద మాఫియా ఉన్నట్లు పోలీసుల ప్రాధమిక విచారణలో తేలింది. శంషాబాద్ డీసీపీ నారాయణరెడ్డి కథనం ప్రకారం…. ఒడిశాలోని జస్పూర్‌ జిల్లాకు చెందిన ధీరేంద్ర బహేరా( 33) కొత్తూరులోని ఓ పరిశ్రమలో కార్మికుడిగా పనిచేసేందుకు కొంత కాలం కిందట వచ్చాడు. అయితే ఈజీగా మనీ సంపాదించాలనే దురాశతో అదే రాష్ట్రానికి చెందిన సోమ్‌నాథ్‌ బెహ్రే (33) సూర్యమని సాహు (35)తో పాటు పరారీలో ఉన్న మరో వ్యక్తితో కలిసి ఒడిశా నుంచి గంజాయి చాక్లెట్లను తీసుకొచ్చి స్థానికంగా విక్రయించడం మొదలు పెట్టారు.

ఉత్తర్‌ప్రదేశ్‌ లోని ఉన్నావ్‌ జిల్లా మగర్‌ వారా నెహ్రూబాగ్‌ లోని ఏఎం ఫార్మా పేరిట తయారైన ‘చార్మి నార్‌ గోల్డ్‌ మునకా’అనే బ్రాండ్ తో ఈ గంజాయి చాక్లెట్లు అమ్ముతున్నట్లు పోలీసుల ప్రాధమిక విచారణలో వెల్లడైయింది. కొంత పంచదార, బెల్లం వంటి పదార్థాల్లో చాక్లెట్‌ ఫ్లేవర్‌ కలిపి అందులో గంజాయిని కలిపినట్లు ప్రాథమికంగా గుర్తించారు. ప్రభుత్వ పాఠశాలకు సమీపంలో ఓ పాన్‌ డబ్బాను ఏర్పాటు చేసి విద్యార్థులకు దానిని నెమ్మదిగా అలవాటుగా మార్చారు. అంతేకాకుండా సమీపంలోని మరికొన్ని కిరాణా దుకాణాల్లో కూడా వాటిని కార్మి కులు, కళాశాల విద్యార్థులకు విక్రయిస్తున్నారు. ఒక్కో చాక్లెట్‌ను రూ. 20 లేదా 30కి విక్రయిస్తున్నారు. చాక్లెట్ల పై భాగంలో మాత్రం పూర్తి గా హిందీ అక్షరాలతో చార్మి నార్‌ గోల్డ్‌ మునకా అని ఉందని… అక్కడ నుంచి ఎలా తీసుకొస్తున్నారు అనే దానిపై లోతైన దర్యాప్తు జరుగుతోందని శంషాబాద్‌ డీసీపీ మీడియాకు వెల్లడించారు.

Also Read : Jagga Reddy: ఢిల్లీకి హుటాహుటిన బయలుదేరిన జగ్గారెడ్డి !