Alla Nani: వైసీపీకు మరో షాక్‌ ! పార్టీకు మాజీ మంత్రి ఆళ్ల నాని గుడ్‌ బై !

Alla Nani: వైసీపీకు మరో షాక్‌ తగిలింది. ఆ పార్టీకి మాజీ డిప్యూటీ సీఎం, ఏలూరు జిల్లాకు చెందిన ముఖ్యనేత ఆళ్ల కాళీకృష్ణ శ్రీనివాస్‌ (నాని) రాజీనామా చేశారు. ఏలూరు జిల్లా అధ్యక్ష పదవితో పాటు అసెంబ్లీ నియోజకవర్గ ఇన్‌ ఛార్జ్‌ కు రాజీనామా చేస్తున్నట్లు ఆయన ప్రకటించారు. వ్యక్తిగత కారణాలతో రాజకీయాలకు దూరంగా ఉండాలని నిర్ణయించుకున్నట్లు ఆళ్ల నాని పేర్కొన్నారు. ఈ మేరకు రాజీనామా లేఖను వైసీపీ అధ్యక్షుడు జగన్‌కు పంపించారు. వైసీపీ హయాంలో డిప్యూటీ సీఎం పదవితో పాటు వైద్య ఆరోగ్యశాఖ మంత్రిగా ఆళ్ల నాని(Alla Nani) పనిచేశారు. ఎన్నికల్లో ఓటమి తర్వాత నుంచి పార్టీ కార్యకలాపాలకు ఆయన దూరంగా ఉంటున్నారు. ఈ నేపథ్యంలో రాజీనామా చేస్తున్నట్లు ప్రకటించారు. ఇటీవలే పిఠాపురం మాజీ ఎమ్మెల్యే పెండెం దొరబాబు కూడా వైకాపాను వీడిన సంగతి తెలిసిందే.

Alla Nani Resign

మరోవైపు నెల్లూరు జిల్లా రాజకీయాలు ఒక్కసారి వేడెక్కాయి. వైసీపీ రాష్ట్ర కార్యదర్శి ఆనం విజయకుమార్ రెడ్డి ఆయన‌ సతీమణి, జెడ్పీ ఛైర్‌పర్సన్ అరుణమ్మ టీడీపీలో చేరుతున్నారంటూ వార్తలు గుప్పుమంటున్నాయి. పురపాలక, పట్టణాభివృద్ధి శాఖ మంత్రి నారాయణ నివాసానికి విజయకుమార్ రెడ్డి, అరుణమ్మ దంపతులు వెళ్లడంతో నెల్లూరు రాజకీయాలు రసవత్తరంగా మారాయి. వారు వైసీపీకి గుడ్ బై చెప్పబోతున్నట్లు జిల్లావ్యాప్తంగా విస్తృత చర్చలు నడుస్తున్నాయి.

తాజాగా జరిగిన ఆంధ్రప్రదేశ్ అసెంబ్లీ ఎన్నికల్లో కూటమి భారీ మెజార్టీ సాధించడం, ఫ్యాన్ పార్టీ కేవలం 11స్థానాలకే పరిమితం కావడంతో ఆ పార్టీ నేతలు కూటమిలో చేరేందుకు ఆసక్తి చూపుతున్నారు. ఇప్పటికే పిఠాపురం మాజీ ఎమ్మెల్యే పెండెం దొరబాబు, వైసీపీ ముఖ్య నేత, మాజీ మంత్రి శిద్ధా రాఘవరావు ఫ్యాన్ పార్టీకి గుడ్ బై చెప్పారు. అలాగే గుంటూరు పశ్చిమ నియోజకవర్గ మాజీ ఎమ్మెల్యే మద్దాలి గిరి, పొన్నూరు మాజీ ఎమ్మెల్యే కిలారి రోశయ్య సైతం ఇటీవల వైసీపీ(YCP)కి రాజీనామా చేశారు. వీరంతా కూటమిలోని ఏదో పార్టీలో చేరే అవకాశం ఉంది.

అయితే ఆనం విజయకుమార్ రెడ్డి దంపతులు పార్టీకి రాజీమానా చేస్తున్నారంటూ వచ్చే వార్తలను ఫ్యాన్ పార్టీ నేతలు కొట్టిపారేస్తున్నారు. ఈనెల 10వ తేదీన జరిగే జెడ్పీ సమావేశానికి మంత్రి నారాయణను ఆహ్వానించేందుకే వారు ఆయన నివాసానికి వెళ్లినట్లు చెప్తున్నారు. ఒకవేళ వారు టీడీపీలోకి చేరితే నెల్లూరు జిల్లాలో వైసీపీకి గట్టి దెబ్బ తగిలినట్లు అవుతుంది.

Also Read : Telangana Secretariat: మళ్లీ ఎస్పీఎఫ్‌ చేతుల్లోకి తెలంగాణా సచివాలయం భద్రత !