గోదావ‌రి నీళ్ల‌ను స‌మ‌ర్థవంతంగా వినియోగించుకోవాలి

క‌రీంన‌గ‌ర్ జిల్లా : తెలంగాణ మంత్రులు ఉత్త‌మ్ కుమార్ రెడ్డి, వివేక్ వెంక‌ట‌స్వామి, అడ్లూరి ల‌క్ష్మ‌ణ్, దుద్దిళ్ల శ్రీ‌ధ‌ర్ బాబు ఎస్ఆర్ఎస్పీ, క‌డెం, ఎల్లంప‌ల్లి ప్రాజెక్టుల‌ను సంద‌ర్శించారు. మిడ్ మానేరు వైపు నీటిని తరలించేందుకు ఎల్లంపల్లి వద్ద ఐదు పంపుల వినియోగిస్తున్న‌ట్లు తెలిపారు . శాస్త్రీయ పద్ధతులు , నిపుణుల సలహాలతోనే మేడిగడ్డ, అన్నారం, సుందిళ్ల ప్రాజెక్టుల పునరుద్ధరణ సాధ్యమని వెల్లడించారు ఈ సంద‌ర్భంగా మంత్రులు. ఉత్తర తెలంగాణ రైతుల ప్రయోజనాల కోసం గోదావరి జలాలను గరిష్టంగా వినియోగించు కునేందుకు అన్ని విధాలా కృషి చేస్తున్నామని నీటిపారుదల, పౌర సరఫరాల శాఖ మంత్రి ఎన్. ఉత్తమ్ కుమార్ రెడ్డి స్ప‌ష్టం చేశారు.

ఈ సీజన్‌లో గోదావరి నది నుంచి తొలిసారిగా గణనీయమైన నీటి ప్రవాహాన్ని అందుకున్న శ్రీరాంసాగర్ , కడ్డం, శ్రీపాద ఎల్లంపల్లి ప్రాజెక్టులను పరిశీలించారు. ఎల్లంపల్లి వద్ద ఐదు పంపులను ఆన్ చేసి, ‘ఫ్లడ్ ఫ్లో కెనాల్’ (వరద ప్రవాహ కాలువ) ద్వారా మిడ్ మానేరుకు నీటిని తరలించే ప్రక్రియను ప్రారంభించారు. గోదావరి నీటిలోని ప్రతి చుక్కను సమర్థవంతంగా వినియోగించు కోవడమే మా లక్ష్యం అని ఆయన అన్నారు. నీటి ప్రవాహం, నిల్వ స్థాయిలు, పంపింగ్ కార్యకలాపాలను సమీక్షించారు. నీటి వృథాను అరికట్టేందుకు ప్రాజెక్టుల నిర్వహణలో సమన్వయం పాటించాలని, గంటల వారీగా పర్యవేక్షణ జరపాలని సూచించారు.

ఎల్లంపల్లి నుంచి పంప్ చేస్తున్న నీరు “కాళేశ్వరం నీరు” అనే వాదనలను మంత్రి గట్టిగా ఖండించారు. శ్రీపాద ఎల్లంపల్లి ప్రాజెక్టు కాంగ్రెస్ హయాంలో ‘ప్రాణహిత-చేవెళ్ల’ ప్రాజెక్టులో భాగంగా రూపొందించ బడిందని స్పష్టం చేశారు. ప్రస్తుతం ఎల్లంపల్లికి వస్తున్న నీరు సహజ సిద్ధమైన గోదావరి ప్రవాహమే తప్ప, కాళేశ్వరం ప్రాజెక్టులోని మూడు బ్యారేజీల నుంచి ఎత్తిపోసిన నీరు కాదంటూ కుండ బ‌ద్ద‌లు కొట్టారు.కాంగ్రెస్ ప్రభుత్వాల హయాంలో నిర్మించిన ఎస్ఆర్సీపీ (1963లో జవహర్‌లాల్ నెహ్రూ శంకుస్థాపన చేశారు), కడ్డం (1959), నాగార్జున సాగర్, శ్రీశైలం మరియు ఫ్లడ్ ఫ్లో కెనాల్ వంటి కీలక ప్రాజెక్టులు ఇప్పటికీ రాష్ట్రానికి సమర్థవంతంగా సేవలందిస్తున్నాయని ఉత్తమ్ కుమార్ రెడ్డి గుర్తుచేశారు. దీనికి భిన్నంగా, గత బీఆర్ఎస్ ప్రభుత్వ హయాంలో 2016-2019 మధ్య నిర్మించిన మేడిగడ్డ, అన్నారం , సుందిళ్ల బ్యారేజీలు 2023 నాటికే తీవ్రమైన నిర్మాణపరమైన సమస్యలకు గురయ్యాయని పేర్కొన్నారు.