రష్మిక మందన్న ‘ఓ మైసా రే’ సాంగ్ వైర‌ల్
మైసా చిత్రం నుండి మొదటి పాట విడుదల
హైద‌రాబాద్ : నేష‌న‌ల్ క్ర‌ష్ రష్మిక మందన్న సంచ‌ల‌నంగా మారారు. త‌ను కీ రోల్ పోషించిన చిత్రం మైసా. ఈ చిత్రం నుండి కీలక అప్ డేట్ వ‌చ్చింది. మూవీ మేక‌ర్స్ సినిమాకు సంబంధించి మొదటి పాట ఓ మైసా రే ను విడుదల చేశారు. ఈ పాట ఇప్పుడు సోషల్ మీడియాను షేక్ చేస్తోంది. త‌ను , తన భ‌ర్త విజ‌య్ దేవ‌ర‌కొండ‌తో కలిసి ఇటీవ‌లే న‌టించిన ర‌ణ‌బాలి మూవీ విడుద‌లైంది. ఈ సినిమాకు మిశ్ర‌మ స్పంద‌న ల‌భించింది. ఇదిలా ఉండ‌గా మైసా మూవీపై ఎక్కువ‌గా ఫోక‌స్ పెట్టారు . రష్మిక మందన్న తన రాబోయే చిత్రం ‘మైసా’తో తన నటనా ప్రస్థానంలో ఒక కొత్త, శక్తివంతమైన కోణాన్ని ఆవిష్కరించడానికి సిద్ధమవుతున్నారు. ఈ చిత్రంపై ఉన్న అంచనాలను మరింత పెంచుతూ చిత్ర బృందం మొదటి పాట ‘ఓ మైసా రే’ను విడుదల చేసింది. ఈ పాట ప్రేక్షకులను ‘మైసా’ ప్రపంచంలోకి తీసుకెళ్లగా ఇందులో రష్మిక ఎంతో ఉద్వేగ భరితమైన , శక్తివంతమైన ప్రదర్శనతో అలరించారు.
సోషల్ మీడియాలో ఈ పాటను పంచుకుంటూ రష్మిక దీనిని “ఒక యుద్ధ పిలుపు, వేదన , ఆగ్రహంతో కూడిన కేక, ఒక చైతన్య వంతమైన మేల్కొలుపు” అని అభివర్ణించారు. ఆమె చెప్పిన మాటలు ఈ పాటలోని మూడ్‌ను ఖచ్చితంగా ప్రతిబింబిస్తాయి; ఇది ధైర్యాన్ని, స్త్రీత్వాన్ని , స్త్రీ శక్తిని గొప్పగా చాటి చెబుతుంది. జేక్స్ బిజోయ్ స్వరపరిచిన ‘ఓ మైసా రే’ పాట శక్తివంతమైన బీట్స్, ఉత్సాహ భరితమైన సంగీతంతో రూపొందింది. ఈ తెలుగు వెర్షన్‌కు సింధుజ శ్రీనివాసన్ గాత్రం అందించగా సుద్దాల అశోక్ తేజ సాహిత్యాన్ని సమకూర్చారు. బృందా మాస్టర్ నృత్య దర్శకత్వం వహించారు. అడవి నేపథ్యంలో సాగే ఈ పాటలో రష్మిక పెద్ద సంఖ్యలో నృత్యకారులతో కలిసి అద్భుతమైన ప్రదర్శన ఇచ్చారు. పాటలోని దృశ్యాలు, నృత్య రీతులు ఈ చిత్రం యాక్షన్ ప్రధానమైనదని స్పష్టం చేస్తున్నాయి.
రవీంద్ర పుల్లె దర్శకత్వంలో తెరకెక్కుతున్న ‘మైసా’ గోండు గిరిజన తెగ నేపథ్యంలో సాగే పీరియడ్ యాక్షన్ డ్రామా. ఇందులో రష్మిక ఒక గోండు మహిళగా నటిస్తున్నారు. ఇది శారీరకంగా కష్టతరమైన, భావోద్వేగంతో కూడిన పాత్ర కానుంది. ఈ చిత్రంలో ఈశ్వరీ రావు, గురు సోమసుందరం, రావు రమేష్, రాహుల్ రవీంద్రన్ , సముద్రఖని కీలక పాత్రల్లో నటిస్తున్నారు.