భవిష్యత్ విద్యుత్ అవసరాలను తీర్చేందుకు ప్రణాళికలు

హైద‌రాబాద్ : 2047 నాటికి తెలంగాణను 3 ట్రిలియన్ డాలర్ల ఆర్థిక వ్యవస్థగా మార్చాలనే లక్ష్యానికి అనుగుణంగా రాష్ట్ర ప్రభుత్వం విద్యుత్ రంగాన్ని బలోపేతం చేస్తోందని ఉప ముఖ్యమంత్రి భట్టి విక్రమార్క స్పష్టం చేశారు. పెట్టుబడులకు అత్యుత్తమ గమ్యస్థానాలలో ఒకటిగా తెలంగాణ నిలిచిందని ఆయన పేర్కొన్నారు. రాష్ట్రంలో విద్యుత్ లేదా నీటి కొరత లేకుండా పారిశ్రామిక రంగానికి అవసరమైన మౌలిక సదుపాయాలను కల్పించడానికి ప్రభుత్వం కట్టుబడి ఉందని తెలిపారు. తయారీ , సేవా రంగాలలో పెట్టుబడులు పెట్టేందుకు దేశవ్యాప్తంగా ఉన్న పరిశ్రమలు , పెట్టుబడిదారులను ఆయన ఆహ్వానించారు. భవిష్యత్ విద్యుత్ అవసరాలను అంచనా వేయడంతో పాటు థర్మల్, సోలార్, జలవిద్యుత్, పంప్డ్ స్టోరేజ్ , బ్యాటరీ స్టోరేజ్ వంటి మార్గాల ద్వారా విద్యుత్ ఉత్పత్తి , సరఫరా సామర్థ్యాలను పెంచడానికి దీర్ఘకాలిక ప్రణాళికలు రూపొందిస్తున్నట్లు ఆయన చెప్పారు. హైదరాబాద్‌లోని నెక్లెస్ రోడ్ వద్ద ఉన్న పీపుల్స్ ప్లాజాలో ఎస్పీడీసీఎల్ ఆధ్వర్యంలో ఏర్పాటు చేసిన ‘పవర్ ఎగ్జిబిషన్-2026’ను ఉప ముఖ్యమంత్రి భట్టి విక్రమార్క ప్రారంభించారు. అనంతరం మీడియాతో మాట్లాడుతూ విద్యుత్ శాఖ సాధించిన విజయాలు, ప్రవేశ పెడుతున్న సంస్కరణలు, ఆధునిక సాంకేతిక పరిజ్ఞాన వినియోగంపై ప్రజల్లో, ముఖ్యంగా విద్యార్థుల్లో అవగాహన కల్పించేందుకు ఈ ప్రదర్శనను ఏర్పాటు చేసినట్లు తెలిపారు. ఈ సందర్భంగా విద్యుత్ శాఖ ఉద్యోగుల సేవలను ఆయన అభినందించారు. వారి పని ఎల్లప్పుడూ బయటకు కనిపించక పోయినప్పటికీ, రాష్ట్ర అభివృద్ధిలో వారి కృషి అత్యంత కీలకమని ఆయన పేర్కొన్నారు.

రాష్ట్రంలో విద్యుత్ డిమాండ్ గణనీయంగా పెరిగినప్పటికీ ఎటువంటి ఇబ్బందులు లేకుండా నిరంతర విద్యుత్ సరఫరాను ప్రభుత్వం అందించగలుగుతోందని ఉప ముఖ్యమంత్రి చెప్పారు. గతంలో సుమారు 13,000 మెగావాట్లుగా ఉన్న గరిష్ట విద్యుత్ డిమాండ్ (పీక్ డిమాండ్) ఇప్పుడు 18,000 మెగావాట్లను దాటిందని ఆయన తెలిపారు. ట్రాన్స్‌మిషన్ వ్యవస్థను బలోపేతం చేయడం, ముందస్తు ప్రణాళిక, అవసరమైన విద్యుత్‌ను సకాలంలో సమకూర్చు కోవడం వంటి చర్యల వల్ల వినియోగదారులకు అంతరాయం లేకుండా విద్యుత్ సరఫరా చేయడం సాధ్యమైందని ఆయన వివరించారు.1912 టోల్-ఫ్రీ సేవ మరియు ‘పవర్ అంబులెన్స్’ల ద్వారా వినియోగదారుల సమస్యలను వేగంగా పరిష్కరిస్తున్నట్లు ఆయన తెలిపారు. 1912 నంబర్‌కు కాల్ చేసి ఫిర్యాదు నమోదు చేయగానే, ఆ సమస్యను తక్షణమే పరిష్కరించేలా వ్యవస్థ పనిచేస్తుందని చెప్పారు. అవసరమైన పరికరాలు, ట్రాన్స్‌ఫార్మర్లు , సిబ్బందితో కూడిన ‘పవర్ అంబులెన్స్’ వ్యవస్థను రాష్ట్రవ్యాప్తంగా విస్తరిస్తున్నామని, తద్వారా విద్యుత్ సమస్యలు ఉన్న ప్రాంతాలకు బృందాలు వెంటనే చేరుకుని వాటిని పరిష్కరించ గలుగుతాయని ఆయన పేర్కొన్నారు. సాంకేతిక పరిజ్ఞాన వినియోగాన్ని పెంచడం, అంతర్గతంగా (in-house) సాఫ్ట్‌వేర్‌ను అభివృద్ధి చేయడం పట్ల విద్యుత్ శాఖను భట్టి అభినందించారు. వినియోగదారుని నంబర్ ఆధారంగా వారి లొకేషన్ , విద్యుత్ సరఫరా అవుతున్న మూలం వంటి వివరాలను అందించడం వల్ల విద్యుత్ సేవలలో పారదర్శకత, సామర్థ్యం పెరుగుతాయని ఆయన పేర్కొన్నారు.

భవిష్యత్తు విద్యుత్ అవసరాలను దృష్టిలో ఉంచుకుని, 2047 నాటికి లక్ష్యాలను నిర్దేశించు కోవాలని , ఇప్పటి నుండే ప్రణాళికలు రూపొందించాలని అధికారులను ఆదేశించినట్లు ఆయన తెలిపారు. విద్యుత్ ఉత్పత్తి ప్రాజెక్టులను ఏర్పాటు చేయడానికి కనీసం నాలుగైదు ఏళ్లు పడుతుంది కాబట్టి, భవిష్యత్తు అవసరాలను తీర్చడానికి ముందస్తు ప్రణాళిక అత్యవసరమని ఉప ముఖ్యమంత్రి అన్నారు. థర్మల్ విద్యుత్‌తో పాటు హరిత శక్తికి (green energy) ప్రభుత్వం ప్రాధాన్యతనిస్తోందని, అలాగే సౌర, జల, పంప్డ్ స్టోరేజ్ , బ్యాటరీ స్టోరేజ్ సామర్థ్యాలను పెంచేందుకు చర్యలు తీసుకుంటున్నామని ఆయన చెప్పారు. వ్యవసాయం, పరిశ్రమలు , సేవా రంగాలతో సహా ప్రతి ఉత్పాదక రంగానికి విద్యుత్ రంగమే పునాది అని, రాష్ట్ర GSDP వృద్ధికి నిరంతర విద్యుత్ సరఫరా కీలకమని ఆయన పేర్కొన్నారు. రాష్ట్రంలో విద్యుత్ డిమాండ్ ఊహించని విధంగా పెరిగినప్పటికీ, ముందస్తు ప్రణాళిక కారణంగా ప్రభుత్వం ఆ ఒత్తిడిని సమర్థవంతంగా నిర్వహించ గలిగిందని ఆయన అన్నారు. భవిష్యత్తులో రాష్ట్రంలో విద్యుత్ కొరత లేకుండా చూడటానికి, పరిశ్రమల అవసరాలకు తగినంత విద్యుత్ సరఫరా చేయడానికి ఒక కార్యాచరణ ప్రణాళికను సిద్ధం చేస్తున్నట్లు ఆయన తెలిపారు. విద్యుత్ శాఖ ఉద్యోగుల సంక్షేమానికి ప్రభుత్వం ప్రత్యేక ప్రాధాన్యత ఇస్తోందని ఉప ముఖ్యమంత్రి భట్టి విక్రమార్క అన్నారు. పెండింగ్‌లో ఉన్న పదోన్నతులను కల్పించామని, ప్రమాదకర పరిస్థితుల్లో పనిచేస్తున్న విద్యుత్ శాఖ ఉద్యోగులందరికీ రూ. 1 కోటి ప్రమాద బీమా సౌకర్యం కల్పించామని ఆయన చెప్పారు. ఉద్యోగులు , వారి కుటుంబాల సంక్షేమం పట్ల ప్రభుత్వం పూర్తి నిబద్ధతతో ఉందని ఆయన స్పష్టం చేశారు.