విద్యార్థుల న‌మోదు త‌గ్గ‌డంపై జ‌గ‌న్ రెడ్డి ఫైర్

తాడేప‌ల్లిగూడెం : మాజీ సీఎం జ‌గ‌న్ మోహ‌న్ రెడ్డి సీరియ‌స్ కామెంట్స్ చేశారు ఏపీ కూట‌మి స‌ర్కార్ పై. రాష్ట్రంలోని ప్రభుత్వ పాఠశాలల్లో విద్యార్థుల నమోదు తగ్గడంపై జగన్ ప్రశ్నలు సంధించారు. విద్యార్థులు ప్రపంచ స్థాయిలో పోటీపడి విజయం సాధించేలా చేసేందుకు ఐబీ విధానాన్ని ప్రవేశపెట్టే ప్రణాళికలతో సహా మరో కీలక సంస్కరణను త‌మ హ‌యాంలో చేపట్టినట్లు జగన్ తెలిపారు. ప్రైవేట్ పాఠశాలల నుండి ప్రభుత్వ పాఠశాలలకు 1.1 లక్షల మందికి పైగా విద్యార్థులు మారారన్న ప్రభుత్వ వాదనకు భిన్నంగా 2025-26 సంవత్సరానికి సంబంధించిన ‘యూనిఫైడ్ డిస్ట్రిక్ట్ ఇన్ఫర్మేషన్ సిస్టమ్ ఫర్ ఎడ్యుకేషన్ ప్లస్’ గణాంకాలు ఉన్నాయని ఆరోపించారు. తద్వారా ఆంధ్రప్రదేశ్‌లోని ప్రభుత్వ పాఠశాలల్లో విద్యార్థుల నమోదు గణనీయంగా తగ్గిందని వైఎస్ జగన్ మోహన్ రెడ్డి ఆదివారం ఆరోపించారు. అయితే, దీనిపై అధికార టీడీపీ నుండి తక్షణ స్పందన రాక పోవ‌డం ప‌ట్ల మండిప‌డ్డారు.

గత వైసీపీ ప్రభుత్వ హయాంలోని చివరి సంవత్సరమైన 2023-24 , 2025-26 సంవత్సరాలకు సంబంధించిన విద్యాశాఖ యుడిఐఎస్ఈ ప్లస్ గ‌ణాంకాలను పోల్చి చూసినప్పుడు, ముఖ్యంగా ప్రభుత్వ పాఠశాలల్లో విద్యార్థుల నమోదు తగ్గిందని మాజీ ముఖ్యమంత్రి పేర్కొన్నారు. ప్రైవేట్ పాఠశాలల నుండి ప్రభుత్వ పాఠశాలలకు 1.1 లక్షల మందికి పైగా విద్యార్థులు మారారన్న రాష్ట్ర ప్రభుత్వ వాదనను 2025-26 నాటి గణాంకాలు స్పష్టంగా ఖండిస్తున్నాయ‌ని పేర్కొన్నారు. ఎందుకంటే వాస్తవానికి ప్రభుత్వ పాఠశాలల్లో విద్యార్థుల నమోదు గణనీయంగా తగ్గింది అని జగన్ పేర్కొన్నారు. ఒకవేళ ప్రభుత్వ పాఠశాలల్లోకి నిజంగానే అంత పెద్ద సంఖ్యలో విద్యార్థులు వచ్చి ఉంటే, వాటి మొత్తం నమోదు సంఖ్య పెరిగి ఉండాలి. ప్రభుత్వ పాఠశాలల్లో విద్యార్థుల నమోదు సంఖ్య 2023-24లో 40,50,116 ఉండగా, 2025-26 నాటికి అది 34,93,450కి పడిపోయిందని, అంటే 5.5 లక్షల మందికి పైగా విద్యార్థుల నమోదు తగ్గిందని ప్రతిపక్ష నాయకుడు ఆరోపించారు.