దీనజ‌న బాంధ‌వుడు బాబు జ‌గ్జీవ‌న్ రామ్

హైద‌రాబాద్ : దీన జ‌న బాంధవుడిగా పేరు పొందిన బాబూ జ‌గ్జీవ‌న్ రామ్ వ‌ర్దంతి ఇవాళ‌. ప్ర‌తి ఏటా జూలై 6న జ‌రుపు కోవ‌డం, నివాళులు అర్పించ‌డం మామూలే. క‌డు పేద కుటుంబంలో పుట్టి భారత ఉప ప్రధానమంత్రిగా ఎదిగిన మహానేత త‌ను. కుల వివక్షను ఎదుర్కొని, ఎన్నో అవమానాలను భరించి, వాటినే తన విజయానికి మెట్లుగా మార్చుకొని దేశ అత్యున్నత పదవుల వరకు ఎదిగిన అరుదైన నాయ‌కుడు . ఒక చిన్న గ్రామంలో పుట్టిన త‌ను. పాఠశాలలో నీళ్లు తాగడానికి కూడా వేరే పాత్ర ఇచ్చిన సమాజం. అదే బాలుడు తర్వాత భారత రక్షణ మంత్రిగా, చివ‌ర‌కు అత్యున్న‌త దేశ డిప్యూటీ పీఎంగా ప‌నిప చేయ‌డం మామూలు విష‌యం కాదు. ఏప్రిల్ 5, 1908 లో బీహార్ రాష్ట్రంలోని చంద్వా గ్రామంలో జగ్జీవన్ రామ్ జన్మించారు. తండ్రి శోభీ రామ్ సైన్యంలో పనిచేసి తరువాత వ్యవసాయం చేశారు. తల్లి వసంతీ దేవి కష్టపడే, విలువలు నేర్పిన మహిళ . చిన్నప్పటి నుంచే జగ్జీవన్ రామ్ చదువులో ప్రతిభ కనబరిచేవారు.కానీ సమాజం మాత్రం ఆయన ప్రతిభను కాకుండా ఆయన కులాన్ని చూసేది. పాఠశాలలో ఆయనకు ఇతర విద్యార్థులతో కలిసి నీళ్లు తాగేందుకు అనుమతి ఉండేది కాదు. ఒకరోజు ఆయన ఆ వివక్షకు వ్యతిరేకంగా నిలబడ్డారు. నేను కూడా మనిషినే. నాకు కూడా సమాన హక్కులు ఉన్నాయి అని ప్ర‌క‌టించాడు. ఆ సంఘటన ఆయన జీవితాన్ని మార్చింది. సామాజిక న్యాయం కోసం పోరాడాలని అప్పుడే నిర్ణయించుకున్నారు.

బనారస్ హిందూ విశ్వవిద్యాలయంలో చదువుతున్నప్పుడు కూడా వివక్ష ఎదురైంది జ‌గ్జీవ‌న్ రామ్ కు. అయినా వెనక్కి తగ్గలేదు. తర్వాత కలకత్తా విశ్వవిద్యాలయంలో పట్టభద్రులయ్యారు. విద్యార్థి దశలోనే అణగారిన వర్గాల హక్కుల కోసం ఉద్యమాలు ప్రారంభించారు. మహాత్మా గాంధీ పిలుపుతో స్వాతంత్ర్య ఉద్యమంలో చేరారు. 1942 క్విట్ ఇండియా ఉద్యమంలో చురుకుగా పాల్గొన్నారు. బ్రిటిష్ ప్రభుత్వం ఆయనను జైలుకు పంపింది. జైలు జీవితంలో కూడా ఆయన ధైర్యం తగ్గలేదు. స్వాతంత్రం తర్వాత కేంద్ర మంత్రిగా ఎన్నో శాఖలను నిర్వహించారు. అందులో కార్మిక సంక్షేమం, రైల్వే అభివృద్ది, వ్య‌వ‌సాయ సంస్క‌ర‌ణ‌లు, ఆహార భ‌ద్ర‌త ఉన్నాయి. వ్యవసాయ మంత్రిగా రైతుల కోసం తీసుకున్న నిర్ణయాలు హరిత విప్లవానికి బలమైన పునాది అయ్యాయి. రక్షణ మంత్రిగా ఉన్న సమయంలో భారత్–పాకిస్తాన్ యుద్ధం జరిగింది .భారత సైన్యానికి పూర్తి మద్దతు ఇచ్చారు. ఈ యుద్ధం ఫలితంగా బంగ్లాదేశ్ ఏర్పడింది. ఈ విజయంలో ఆయన నాయకత్వానికి ప్రత్యేక గుర్తింపు లభించింది.

1979లో భారత ఉప ప్రధానమంత్రిగా బాధ్యతలు చేపట్టారు. అది కేవలం ఆయన వ్యక్తిగత విజయం మాత్రమే కాదు. అణగారిన వర్గాలకు ఒక గొప్ప ప్రేరణగా నిలిచింది. 1986 జూలై 6న ఆయన మరణించారు. అయితే ఆయన ఆలోచనలు, సేవలు, సామాజిక న్యాయం కోసం చేసిన పోరాటం ఈ రోజుకీ కోట్ల మందికి స్ఫూర్తిగా నిలుస్తోంది. మనిషి గొప్పతనం అతని పుట్టుకలో కాదు. అతని పనుల్లో ఉంటుంది. అవమానాలను అవకాశాలుగా మార్చుకుంటే సాధారణ వ్యక్తి కూడా చరిత్ర సృష్టించగలడని ఆయన జీవితం నిరూపించింది.