పాలనా పరంగా కాంగ్రెస్ సర్కార్ ఫెయిల్ : కేటీఆర్
బీఆర్ఎస్ ప్రజా ప్రతినిధులు అరెస్ట్
హైదరాబాద్ : కాంగ్రెస్ ప్రభుత్వానికి వ్యతిరేకంగా నిరసనగా నల్లని టీ-షర్టులు ధరించి అసెంబ్లీలోకి వెళ్లేందుకు ప్రయత్నించిన భారత్ రాష్ట్ర సమితి వర్కింగ్ ప్రెసిడెంట్ కేటీ రామారావు, మాజీ మంత్రి టి. హరీష్ రావు , ఇతర పార్టీ ఎమ్మెల్యేలను సోమవారం పోలీసులు అసెంబ్లీ బయట అదుపులోకి తీసుకున్నారు. వారిని తెలంగాణ భవన్కు తరలించారు. తమ ఎమ్మెల్యేలు , ఎమ్మెల్సీలు అసెంబ్లీకి హాజరు కాకుండా ప్రభుత్వం అడ్డుకుంటోందని ఆరోపిస్తూ బీఆర్ఎస్ పార్టీ రాష్ట్రవ్యాప్తంగా నిరసనలకు పిలుపునిచ్చింది. నల్లని దుస్తులు ధరించిన బీఆర్ఎస్ ప్రజా ప్రతినిధులకు ప్రవేశం నిరాకరించడంతో అసెంబ్లీ గేటు వద్ద భద్రతా సిబ్బందితో వాగ్వాదం జరిగి ఉద్రిక్తత నెలకొంది. అనంతరం పోలీసులు కేటీఆర్, హరీష్ రావుతో పాటు పార్టీకి చెందిన ఎమ్మెల్యేలు, ఎమ్మెల్సీలను అదుపులోకి తీసుకుని స్థానిక పోలీస్ స్టేషన్లకు తరలించారు. పెద్ద సంఖ్యలో పార్టీ కార్యకర్తలు, పోలీసులు అక్కడ గుమిగూడటంతో సుమారు 30 నుండి 40 నిమిషాల పాటు ట్రాఫిక్ జామ్ ఏర్పడి, అసెంబ్లీ బయట రాకపోకలకు తీవ్ర అంతరాయం కలిగింది.
దీంతో పరిస్థితి అదుపులోకి రాక పోవడంతో సోమవారం తొలి రోజు అసెంబ్లీని వాయిదా వేస్తున్నట్లు ప్రకటించారు స్పీకర్ గడ్డం ప్రసాద్ కుమార్. కాంగ్రెస్ ప్రభుత్వం అధికారంలో ఉన్న 1,000 రోజుల్లో వైఫల్యం చెందిందని ఆరోపిస్తూ కేటీఆర్, హరీష్ రావు, ఇతర నాయకులు గన్పార్క్ వద్ద నిరసన తెలిపారు. నిరసన తెలుపుతున్న నాయకులు హామీల అమలులో కాంగ్రెస్ వైఫల్యం, 1,000 రోజుల పాలన ఒక వైఫల్యం వంటి నినాదాలు ఉన్న నల్లని టీ-షర్టులను ధరించారు. ఈ సందర్భంగా మాజీ మంత్రి కేటీఆర్ తీవ్ర ఆగ్రహం వ్యక్తం చేశారు. ఆయన మీడియాతో మాట్లాడుతూ సర్కార్ పనితీరు బాగోలేదని మండిపడ్డారు. అవివేక పూరితమైన, అబద్ధపు హామీలు ఇచ్చి అధికారంలోకి వచ్చిందని, సమాజంలోని అన్ని వర్గాల ప్రజలను మోసం చేసిందని కేటీఆర్ ఆరోపించారు.
100 రోజుల్లో అమలు చేస్తామని చెప్పి 420 హామీలు ఇచ్చింది. ఈ హామీలను బాండ్ పేపర్పై లిఖిత పూర్వకంగా కూడా ఇచ్చారు. 100 రోజుల్లో హామీలు అమలు చేస్తామని చెప్పినప్పటికీ, 1,000 రోజులు గడిచినా ఇప్పటి వరకు ఒక్క హామీ కూడా నెరవేరలేదని ఆగ్రహం వ్యక్తం చేశారు.