‘సెమికాన్ 2.0’ కింద 200 చిప్ డిజైన్ స్టార్టప్లు
కంపెనీలే లక్ష్యం అని ప్రకటించిన అశ్విని వైష్ణవ్
న్యూఢిల్లీ : కేంద్ర రైల్వే, ఐటీ శాఖ మంత్రి అశ్విని వైష్ణవ్ సంచలన ప్రకటన చేశారు. దేశ సెమీకండక్టర్ మిషన్లో తదుపరి దశ అయిన ‘సెమికాన్ 2.0’ కింద భారతదేశంలో చిప్లను డిజైన్ చేసే కనీసం 200 స్టార్టప్లు, కంపెనీలను లక్ష్యంగా పెట్టుకోనున్నట్లు స్పష్టం చేశారు. గురువారం ‘సెమికాన్ ఇండియా 2026’ ప్రారంభోత్సవ కార్యక్రమంలో మాట్లాడారు. సెమికాన్ 2.0లోని ఆరు ప్రధాన స్తంభాలలో ‘చిప్ డిజైన్’ మొదటిదిగా ఉంటుందని ఆయన పేర్కొన్నారు. మిషన్ మునుపటి దశలో 105కు పైగా స్టార్టప్లు చిప్ డిజైన్ ప్రయత్నాలు చేయగా, వాటిలో సుమారు 20 సంస్థలు దాదాపు రూ. 800 కోట్ల వెంచర్ క్యాపిటల్ నిధులను పొందాయని చెప్పారు. దీనితో ప్రభుత్వం తన లక్ష్యాలను మరింత విస్తృతం చేస్తోందని వెల్లడించారు. అది కేవలం ఆరంభం మాత్రమేనని అన్నారు. ఈసారి మా లక్ష్యం చాలా పెద్దది అని ప్రకటించారు అశ్విని వైష్ణవ్.
సెమీ కండక్టర్ అవసరాల పరిధిలో భారతదేశంలో చిప్లను డిజైన్ చేసే కనీసం 200 స్టార్టప్లు , కంపెనీలను తయారు చేయాలని టార్గెట్ పెట్టుకున్నామన్నారు. ప్రతిభను పెంపొందించడం , పర్యావరణ వ్యవస్థను నిర్మించడంపై దృష్టి సారించిన ‘సెమికాన్ 1.0’ కార్యక్రమం ద్వారా గత కొన్నేళ్లుగా దేశీయ సెమీకండక్టర్ పరిశ్రమకు అవసరమైన పునాదిని దేశం నిర్మించిందని మంత్రి తెలిపారు. ఇప్పుడు, ఆ పునాదిపై మనం పూర్తి స్థాయి నిర్మాణాన్ని చేపట్టాలి అని వైష్ణవ్ పేర్కొన్నారు. మిషన్ తదుపరి దశ దాని ఆరు స్తంభాలైన డిజైన్, యంత్రాలు , ముడి పదార్థాలు, తయారీ యూనిట్లు (ఫ్యాబ్రికేషన్), అధునాతన ప్యాకేజింగ్, పరిశోధన , అభివృద్ధి, ప్రతిభ గురించి వివరించారు. రెండవ స్తంభమైన ‘యంత్రాలు , ముడి పదార్థాలు’ అనేది క్యాపిటల్ పరికరాలు, నిర్వహణ సదుపాయాలు, రసాయనాలు , వాయువులకు సంబంధించిన మొత్తం పర్యావరణ వ్యవస్థను కవర్ చేస్తుందని వైష్ణవ్ చెప్పారు.
ఈ సమావేశంలో 28కి పైగా దేశాల భాగస్వామ్యం ఉందని ఆయన ఈ సందర్భంగా ప్రస్తావించారు. ఐదేళ్ల క్రితం ఈ కార్యక్రమం ప్రారంభంలో ప్రధానమంత్రి ఇచ్చిన మార్గదర్శకత్వాన్ని గుర్తు చేశారు. స్వల్ప కాలికంగా ఆలోచించ వద్దు, దీర్ఘకాలికంగా ఆలోచించండి. ఫ్యాబ్ గురించి ఆలోచించ వద్దు, ఎకోసిస్టమ్ గురించి ఆలోచించండి అని అన్నారు. ఈ తత్వమే మిషన్ రూపకల్పనను ప్రభావితం చేస్తూ వచ్చిందని ఆయన తెలిపారు. మూడవ స్తంభం మరిన్ని డిస్ప్లే, మెమరీ, సిలికాన్, కాంపౌండ్ , లాజిక్ ఫ్యాబ్రికేషన్ యూనిట్లను ఏర్పాటు చేయడంపై దృష్టి సారిస్తుందని అన్నారు. ఇది ఎకోసిస్టమ్పై గుణకార ప్రభావాన్ని చూపుతుందని వైష్ణవ్ అన్నారు.
నాల్గవ స్తంభం అధునాతన ప్యాకేజింగ్ యూనిట్లను విస్తరించడంపై దృష్టి సారిస్తుందని చెప్పారు . ఒడిశాలో ఇప్పటికే ఉన్న 3D ప్యాకేజింగ్ సదుపాయాన్ని ఆధారంగా చేసుకుని దీనిని నిర్మిస్తామని ఆయన చెప్పారు. విద్యాసంస్థల సహకారంతో పరిశ్రమలచే నడపబడే, అనువర్తిత ఆర్ అండ్ డి ప్రాజెక్టులను చేపడతామని వైష్ణవ్ తెలిపారు. ఈ సహకార విధానం కోసం ప్రాజెక్టులను సూచించ వలసిందిగా పరిశ్రమ భాగస్వాములను ఆయన ఆహ్వానించారు. ఆరవ స్తంభమైన ప్రతిభ గురించి మాట్లాడుతూ సెమికాన్ 1.0 కింద 10 సంవత్సరాలలో 85,000 మంది డిజైన్ ఇంజనీర్లకు శిక్షణ ఇవ్వాలన్న లక్ష్యానికి బదులుగా, ప్రభుత్వం కేవలం నాలుగేళ్లలోనే 70,000 మంది డిజైన్ ఇంజనీర్లకు శిక్షణ ఇచ్చిందని వైష్ణవ్ చెప్పారు.