ఇండియా వేదికగా ఐపీఎల్ 2027 వేలం
మొన్నటి దాకా విదేశాలలో జిరగిన వేలం
హైదరాబాద్ : ఇండియన్ ప్రిమీయర్ లీగ్ (ఐపీఎల్) కు సంబంధించి కీలక అప్ డేట్ వచ్చింది. గత వేలం ప్రక్రియలు విదేశాలలో జరిగిన తర్వాత ఐపీఎల్ 2027 ఆటగాళ్ల వేలం మళ్లీ భారత్లోనే నిర్వహించనున్నారు. ఇటీవలే జరిగిన ఐపీఎల్ పాలక మండలి సమావేశంలో ఈ నిర్ణయం తీసుకున్నట్లు సమాచారం. 2025 సీజన్కు ముందు ‘మెగా వేలం’ నిర్వహించినందున, 2027 వేలం ఒక ‘మినీ-వేలం’గా ఉండనుంది. ఈ మినీ-వేలం ద్వారా ఐపీఎల్ ఫ్రాంచైజీలకు ఖాళీగా ఉన్న స్థానాలను భర్తీ చేసుకోవడానికి , 2027 సీజన్కు తమ జట్లను మరింత బలోపేతం చేసుకోవడానికి అవకాశం లభిస్తుంది.
వేలాన్ని తిరిగి భారత్కు తీసుకు రావాలన్న నిర్ణయం ఫ్రాంచైజీలకు ఎంతో సౌకర్యవంతంగా ఉంటుందని భావిస్తున్నారు. విదేశాలలో వేలం నిర్వహించడం వల్ల జట్టు యజమానులు, అధికారులు , సహాయక సిబ్బందికి ప్రయాణం , ఇతర నిర్వహణ ఏర్పాట్ల పరంగా అదనపు భారం పడుతుంది. ఇటీవలి కాలంలో ఐపీఎల్ వేలం ప్రక్రియలు భారత్ వెలుపల జరిగాయి. 2025 వేలం సౌదీ అరేబియాలోని జెడ్డాలో జరగగా, 2026 వేలం యూఏఈ లోని అబుదాబిలో జరిగింది. 2026 వేలం 2025 డిసెంబర్ 16న నిర్వహించారు.
ఇక ఐపీఎల్ 2027 వేలం ఖచ్చితమైన తేదీ, వేదికను ఇంకా అధికారికంగా ప్రకటించ లేదు. సాధారణంగా వేలం డిసెంబర్లో జరుగుతుంది కాబట్టి 2027 మినీ-వేలం కూడా అదే సమయంలో జరిగే అవకాశం ఉందని సమాచారం. ఆసక్తికరమైన విషయం ఏమిటంటే, భవిష్యత్తులో ఐపీఎల్ మెగా వేలాన్ని కూడా భారత్ వెలుపల నిర్వహించే అంశంపై చర్చలు జరిగాయి. అయితే, ఆ కార్యక్రమం కోసం ఎటువంటి వేదికనూ ఇంకా అధికారికంగా ఖరారు చేయలేదు.