విద్య, ఆరోగ్యం అనేవి పెట్టుబడులు : సీఎం

హైద‌రాబాద్ : తెలంగాణ ముఖ్య‌మంత్రి ఎ. రేవంత్ రెడ్డి కీల‌క వ్యాఖ్య‌లు చేశారు. విద్య‌, వైద్యం, ఆరోగ్యం అనేది పెట్టుబ‌డులు లాంటివ‌ని అవి ఓటు బ్యాంకులు కావ‌ని పేర్కొన్నారు. 2034 నాటికి కోటి మంది మహిళలను లక్షాధికారులుగా తీర్చిదిద్దే కార్యక్రమంతో సహా రాష్ట్ర ప్రభుత్వం ప్రవేశపెట్టిన మహిళా సాధికారత పథకాలను రేవంత్ రెడ్డి ప్రస్తావించారు. హైదరాబాద్‌లోని నాచారం IDA ప్రాంతంలో తెలంగాణ ఫుడ్ కార్పొరేషన్ ఆధ్వర్యంలో ‘బాలామృతం’ తయారీ ప్లాంట్‌ను ముఖ్యమంత్రి ఎ. రేవంత్ రెడ్డి ప్రారంభించారు. ప్రజల ఆరోగ్యాన్ని కాపాడేందుకు విద్యార్థులు , మహిళల కోసం సంక్షేమ , పౌష్టికాహార పంపిణీ పథకాలను ప్రవేశ పెట్టడం ద్వారా, దేశంలోనే అత్యంత పిన్న వయసు కలిగిన ఈ రాష్ట్రాన్ని ‘అభివృద్ధి చెందిన , ఆరోగ్యకరమైన తెలంగాణ’గా తీర్చిదిద్దుతామని ముఖ్యమంత్రి ఎ. రేవంత్ రెడ్డి అన్నారు.

ఆరోగ్యకరమైన, అభివృద్ధి చెందిన రాష్ట్రాన్ని నిర్మించడానికి రాష్ట్ర ప్రభుత్వం అనేక కార్యక్రమాలను చేపట్టిందని ఆయన పేర్కొన్నారు. పేద పిల్లలు ఆకలితో ఉండకూడదనే ఉద్దేశంతో ప్రభుత్వ పాఠశాలల్లో అల్పాహార పథకాన్ని ప్రవేశ పెట్టామ‌న్నారు. అలాగే ఉపాధ్యాయుల కోసం కూడా అల్పాహారం, మధ్యాహ్న భోజన పథకాన్ని ప్రారంభించిన‌ట్లు ఆయన చెప్పారు. | మహబూబ్‌నగర్ జిల్లాలో గర్భిణీ స్త్రీలకు అండగా నిలిచేందుకు అప్పటి ప్రధాని ఇందిరా గాంధీ ‘బాలామృతం’ ప్లాంట్ల ఏర్పాటు కార్యక్రమాన్ని ప్రారంభించారని, అది ఇప్పుడు ఒక పెద్ద పరిశ్రమగా ఎదిగిందని ఆయన గుర్తుచేశారు. ప్రభుత్వ పాఠశాలలను కార్పొరేట్ విద్యాసంస్థలకు దీటుగా బలోపేతం చేయడానికి ప్రభుత్వం అన్ని చర్యలు తీసుకుంటోందని తెలిపారు.

విద్యపై చేసే ఖర్చును ఒక పెట్టుబడిగా భావిస్తున్నందున, విద్యార్థులకు నాణ్యమైన విద్యను అందించడమే మా లక్ష్యం. మేము ఇటువంటి పథకాలను ఓటు బ్యాంకుల కోసం కాకుండా, విద్యార్థుల ఉజ్వల భవిష్యత్తు కోసం ప్రవేశ పెడుతున్నామ‌ని ముఖ్యమంత్రి అన్నారు.